បន្ទាប់ពីទំនេរពីការងារ មនុស្សជាច្រើនចូលចិត្តដើរកម្សាន្តទៅទីកន្លែងផ្សេងៗ មិនថាជិត ឬឆ្ងាយ ដើម្បីលំហែខួរក្បាល បំបាត់ស្ដ្រេស និងស្វែងរកអ្វីដែលថ្មីៗ សម្រាប់ធ្វើជាមួយមិត្តភក្ដិ ឬក្រុមគ្រួសារ។ តែក៏មានមនុស្សដែលមិនចូលចិត្តទៅណាទាល់តែសោះដែរ ជាពិសេសឲ្យតែបានសម្រាកពីការងារ ឬទំនេរគឺដឹងតែសំងំនៅតែក្នុងផ្ទះ នរណាហៅចេញទៅណាក៏មិនទៅ សឹងតែអាចនិយាយបានថាមានកម្មវិធីល្មមៗ ក៏មិនចង់ចូលរួម។
មែនទែនទៅ នៅពេលដែលធ្វើបែបនេះ យូរៗ ទៅ មនុស្សនៅជុំវិញនឹងចាប់ផ្ដើមគិតថា អ្នកមានបញ្ហាព្រោះមិនចូលចំណោមគេសោះ ហៅទៅណាក៏មិនទៅ។ រហូតអាចមានអ្នកខ្លះទៀតនិយាយថា កុំសំងំតែនៅផ្ទះប្រយ័ត្នរោគចិត្ត។ បើអ៊ីចឹង ចុះមនុស្សចូលចិត្តសំងំនៅផ្ទះចាត់ទុកថាមានបញ្ហាផ្លូវចិត្តទេ?
តាមពិតទៅ អាការៈ ឬសកម្មភាពទាំងអស់នេះ មិនបានចាត់ទុកថាគឺជាមនុស្សដែលមានបញ្ហាផ្លូវចិត្ត ឬចម្លែកអ្វីនោះទេ គ្រាន់តែក្រុមមនុស្សបែបនេះ ត្រូវគេស្គាល់ថាជា “Homebody”។ បើនិយាយឲ្យងាយយល់ ពួកគេជាមនុស្សដែលចូលចិត្តចំណាយពេលនៅផ្ទះច្រើនជាជាងទៅក្រៅជួបមនុស្ស និងមិនសូវចង់ដើរទៅណាផ្សេងៗ ឡើយ ទាល់តែរឿងដែលចៀសមិនផុតតែម្ដង។ ជាទូទៅពួកគេមានអារម្មណ៍ថារីករាយ និងសុវត្ថិភាពពេលនៅក្នុងផ្ទះ ហើយផ្ទះគឺជាកន្លែងកក់ក្ដៅបំផុតសម្រាប់ពួកគេ។ ថ្វីបើមិនចូលចិត្តដើរកម្សាន្តចេញក្រៅ ដូចអ្នកដទៃ តែពួកគេអាចបង្កើតសេចក្ដីសុខដោយខ្លួនឯងបានយ៉ាងងាយស្រួល ដូចជាធ្វើអាហារឆ្ងាញ់ៗ ខ្លួនឯង មើលរឿងភាគ ខ្សែភាពយន្តនានា សម្អាតផ្ទះ រៀនសូត្របន្ថែម និងធ្វើការផ្សេងៗ ទៀត។
បន្ថែមពីនេះ ប្រភេទមនុស្ស Homebody ក៏ត្រូវបានគេចាត់ទុកថាជាមនុស្សដែលរឹងមាំផង និងឆាប់ស្កប់ស្កល់ផងដែរ ព្រោះពួកគេអាចធ្វើអ្វីម្នាក់ឯងបាន មិនចាំបាច់ទាល់តែមានគ្នា ឬអ្នកហែហមឡើយ ហើយត្រឹមសកម្មភាពសាមញ្ញៗ ដែលធ្វើនៅផ្ទះអាចធ្វើឲ្យពួកគេមានអារម្មណ៍រីករាយ ស្រស់ស្រាយបានហើយ៕
អត្ថបទដោយ៖ ស្រីពេជ្រ