PPDW ឆ្នាំនេះ ប្រមូលផ្ដុំទៅដោយអ្នកច្នៃម៉ូដល្បីៗ ក្រោមប្រធានបទ «Artistic Freedom»

កម្មវិធី Phnom Penh Designers Week ឆ្នាំ ២០២៦ នេះបានរៀបចំឡើងយ៉ាងគគ្រឹកគគ្រេងដែលមានការចូលរួមច្រើនពីសំណាក់អ្នកចូលរួម និងអ្នកច្នៃម៉ូដល្បីៗនៅក្នុងប្រទេសកម្ពុជា។ អ្នករចនាទាំងអស់ បានបង្ហាញពីសមត្ថភាពមានទាំងប៉ុន្មាន នៅក្នុង Collection Spring/Summer 2026 ដែលបានញ៉ាំងកម្មវិធីទាំងមូលកាន់តែអស្ចារ្យ។

Phnom Penh Designers Week 2026 បានធ្វើឡើង ២ថ្ងៃចាប់ពីថ្ងៃ ៥ ដល់ថ្ងៃ ៦ ខែមិថុនា ឆ្នាំ ២០២៦ ដោយថ្ងៃ ៥ គឺជាការបង្ហាញម៉ូដសម្លៀកបំពាក់ Womenswear ហើយថ្ងៃ ៦ ខែមិថុនា គឺជាវេនរបស់ Menswear។ Phnom Penh Designers Week 2026 គឺជាការលាយបញ្ចូលគ្នានូវសិប្បកម្មបេតិកភណ្ឌជាមួយនឹងម៉ូដសហសម័យតាមរយៈការបង្ហាញការប្រមូលផ្ដុំនិទាឃរដូវ/រដូវក្តៅ ឆ្នាំ២០២៦។

សម្រាប់សម្លៀកបំពាក់បុរសមានមកពីខាង Ambre Men របស់លោក Thomas Jaffre, Drewe Taylor និង Don Protasio។ ចំណែកផ្នែក សម្លៀកបំពាក់នារីវិញ រួមមានម៉ាក A.N.D., Semurian, Phoung By S និងលោក Eric Raisina។ អ្វីដែលកាន់តែពិសេសនោះ គឺការបង្ហាញខ្លួនជាលើកដំបូងនៅក្នុងកម្មវិធី PPDW ពីសំណាក់អ្នករចនាម៉ូដ Puthy Von និង Lyny Po។

Phnom Penh Designers Week 2026 រៀបចំឡើងនៅសណ្ឋាគារ Rosewood ព្រមជាមួយការចូលរួមជាមួយសហគមន៍អ្នករចនាដែលឲ្យតម្លៃលើស្មារតីនៃភាពប្រណីត ភាពទំនើប និងឧត្ដមភាពនៃការច្នៃប្រតិដ្ឋដូចគ្នា។ សម្រាប់កម្មវិធីនេះដែរ មានតារាប្រុសស្រីល្បីៗចូលរួមទស្សនា ហើយក៏មានជនបរទេសចាប់អារម្មណ៍ចូលរួមដូចគ្នា។

គួរបញ្ជាក់ថា Phnom Penh Designers Week គឺជាព្រឹត្តិការណ៍ប្រចាំឆ្នាំដែលបង្កើតឡើងក្នុងគោល បំណងលើកកម្ពស់ឧស្សាហកម្មម៉ូដនៅកម្ពុជា ដោយផ្ដល់នូវវេទិកាវិជ្ជាជីវៈសម្រាប់អ្នករចនាម៉ូដក្នុងការបង្ហាញស្នាដៃរបស់ពួកគេទៅកាន់ ទស្សនិកជនក្នុងតំបន់ និងអន្តរជាតិ៕