ដល់រដូវហើយ! ផ្កាក្ងោកខេត្តកែប ចាប់ផ្ដើមរីកដាសពេញផ្លូវ ស្អាតខ្លាំងណាស់

ផ្កាក្ងោក ខេត្តកែប ចាប់ផ្ដើមបញ្ចេញសម្រស់ត្រកាល ដេរដាសលើដងផ្លូវស្អាតទាក់ចិត្តទេសចរឱ្យចង់ទៅលេងកម្សាន្ត និងផ្ដិតយករូបភាពដ៏ស្រស់ស្អាតនៃពូជផ្កាធម្មជាតិ ពណ៌ក្រហមស្រស់មួយនេះ ត្បិត១ឆ្នាំផ្កានេះរីកតែម្ដងប៉ុណ្ណោះ។

ក្នុង១ឆ្នាំម្ដង វត្តមានផ្កាក្ងោកក្រហមលើទឹកដីខេត្តកែប ចាប់ផ្ដើមរីកបន្តកន្ទុយគ្នាត្រសងអមលើដងផ្លូវបង្កើតបានជាទស្សនីយភាពធម្មជាតិយ៉ាងស្រស់ស្អាត រហូតត្រូវបានអ្នកក្នុងតំបន់ហៅ ក្រុងផ្កាក្ងោកក្រហម។ តាមដងផ្លូវដែលមានចាក់ក្រាលកៅស៊ូយ៉ាងស្រស់ស្អាត អមដោយផ្កាក្ងោកធម្មជាតិពណ៌ក្រហមស្រស់ ប្រៀបដូចគំនូរធម្មជាតិ អមដោយក្លិននិងខ្យល់សមុទ្រផងនោះបានធ្វើទេសចរទទួលបានអារម្មណ៍មួយប្លែក ស្រស់ស្រាយ ហាក់បានរំសាយអស់នូវទុក្ខកង្វល់។ ក្នុងអំឡុងពេលនេះគឺសក្ដិសមបំផុតសម្រាប់ការទៅទស្សនា និងផ្ដិតយករូបភាពស្អាតៗ ដែលអាចទៅជាលក្ខណៈគ្រួសារ មិត្តភ័ក្ដិ ឬគូស្នេហ៍ក៏បាន។

គួរបន្ថែមថា ក្រៅពីការទស្សនាទេសភាពផ្កាក្ងោក ភ្ញៀវទេសចរអាចរីករាយជាមួយសម្រស់ធម្មជាតិដទៃទៀតរបស់ក្រុងកែប ដូចជា ឆ្នេរសមុទ្រ អាហារសមុទ្រស្រស់ៗ ខ្យល់អាកាសបរិសុទ្ធ ក្នុងខេត្តដែលជាគោលដៅទេសចរណ៍ដ៏ពេញនិយមមួយនៅកម្ពុជា៕

រូបភាព ៖ KEP the paradise

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។