ក្រោយ​ពលរដ្ឋ​បាន​ប្រទះ​ឃើញ និង​បាន​រាយការណ៍​អំពី​ការ​រក​ឃើញ​វត្ថុ​បុរាណ​មួយ​នៅ​ក្នុង​ចំណុច​ទីតាំង​ភូមិ​កន្ទួត ឃុំ​កន្ទួត ស្រុក​ជាំ​ក្សាន្ត ខេត្ត​ព្រះ​វិហារ ពេល​នេះ​អាជ្ញាធរ​និង​អ្នក​ជំនាញ​បាន​ចុះ​ដល់​ទី​តាំង​ហើយ។

កាលពី​ថ្ងៃ​ ២៥ ខែឧសភា ឆ្នាំ ២០២៦ នាយកដ្ឋានស្រាវជ្រាវ បណ្ដុះបណ្ដាល និងតម្កល់ឯកសារ និងនាយកដ្ឋានសណ្ដាប់ធ្នាប់ និងសហប្រតិបត្តិការ បានដឹកនាំមន្ត្រី ចុះទៅភូមិកន្ទួត ឃុំកន្ទួត ស្រុកជាំក្សាន្ត ខេត្តព្រះវិហារ ដើម្បីទទួលវត្ថុបុរាណ ១ ពីមេភូមិកន្ទួត (ក្រោយ​ពលរដ្ឋ​បាន​រាយការណ៍​និង​ប្រគល់​ជូន​ដើម្បី​រក្សា​ទុក)។

វត្ថុបុរាណនេះត្រូវបាននាំយកទៅរក្សាទុក ការពារ និងសិក្សាស្រាវជ្រាវបន្តនៅសារមន្ទីរធម្មជាតិសកល សម្តេចតេជោ ហ៊ុន សែន ព្រះវិហារ។ ក្នុងការចុះពិនិត្យទីតាំងផ្ទាល់ ស្ថិតនៅខាងត្បូងភូមិកន្ទួតប្រមាណ៣គីឡូម៉ែត្រ ក្រុមការងារបានសង្កេតឃើញទីតាំងនោះជាទួលបុរាណមានត្រពាំងបុរាណ សំណល់បំណែកកុលាលភាជន៍ប្រភេទផុយ និងប្រភេទរឹងមានស្រទាប់រលោង។ គួរឱ្យដឹងថា វត្ថុ​បុរាណ​ដែល​ទទួល​បាន​នា​ពេល​នេះ​ត្រូវ​បាន​អ្នកជំនាញអាជ្ញាធរជាតិព្រះវិហារអះអាងថា​ជា ដងខ្លួនទេវរូបធ្វើពីថ្មភក់ រចនាបថបាភួន សតវត្សរ៍ទី​១១៕

រូបភាព ក្រសួងវប្បធម៌ និងវិចិត្រសិល្បៈ