អ្នកស្រុកសៀមរាប បន្តសិប្បកម្មបុរាណដ្បិតចង់រក្សាទម្លាប់ប្រើសម្ភារៈបែបខ្មែរតជំនាន់

ក្នុងនាមជាជាតិសាសន៍ដូចគ្នា ខ្លាចអ្វីនិងគាំទ្រផលិតផលក្នុងស្រុកដែលផលិតដោយកូនខ្មែរ ជាពិសេសស្នាដៃរបស់អ្នកស្រុកសៀមរាបផងនោះ។ សិប្បកម្មផលិតឧបករណ៍ប្រើប្រាស់បែបបុរាណនៅតែបន្តដង្ហើមដ្បិតប្រជាជនក្នុងតំបន់នៅតែបន្តធ្វើតជំនាន់។

ពិតជាគួរឱ្យសរសើរ ខណៈសិប្បកម្មផលិតឧបករណ៍ប្រើប្រាស់បែបបុរាណ ក្នុងភូមិទឹកវិល សង្កាត់ទឹកវិល ក្រុងសៀមរាប នៅបន្តមានរូបរាងរហូតមកដល់សព្វថ្ងៃ។ សិប្បកម្មបែបបុរាណ ប៉ុន្តែអ្នកស្រុកក្នុងភូមិខាងលើ នៅតែបន្តធ្វើតជំនាន់ ហើយថែមទាំងមានទីផ្សារថែមទៀត ពោលគឺមិនត្រឹមអាចបន្តថែរក្សានូវទម្លាប់ប្រើប្រាស់សម្ភារៈបែបខ្មែរ ដែលជាកេរដំណែលដូនតាបានបន្សល់ទុកឱ្យទេ ថែមអាចបង្កើតការងារនិងប្រាក់ចំណូលក្នុងគ្រួសារបានទៀតផង។

តាមការឱ្យដឹងបន្ថែមនៅលើផេកផ្លូវការរបស់មន្ទីរព័ត៌មានខេត្តសៀមរាប សិប្បកម្មបែបបុរាណនេះកំពុងទទួលបានការគាំទ្រយ៉ាងខ្លាំងពីសំណាក់អតិថិជន ជាពិសេសភ្ញៀវជាតិ-អន្តរជាតិ ដែលបានទៅទស្សនាតំបន់ប្រាសាទ ក៏ដូចជាតាមតំបន់រមណីយដ្ឋាននានាក្នុងខេត្តសៀមរាប៕