នៅថ្ងៃទី៦ ខែឧសភា BTS បានចូលជួបជាមួយប្រធានាធិបតីម៉ិកស៊ិក លោកស្រី Claudia Sheinbaum មុនការប្រគំតន្ត្រីរបស់កំលោះទាំង ៧ រូបក្នុងទីក្រុងម៉ិកស៊ិកូ ដែលនេះសបញ្ជាក់ឱ្យឃើញពីប្រជាប្រិយភាពដ៏ខ្លាំងក្លា និងឥទ្ធិពលវប្បធម៌របស់ក្រុមនៅក្នុងប្រទេសម៉ិកស៊ិក។

នៅក្នុងសន្និសីទសារព័ត៌មានពេលព្រឹក លោកស្រី Claudia Sheinbaum បានបញ្ជាក់ប្រាប់សារព័ត៌មានក្នុងស្រុកថា BTS មកបំពេញទស្សនកិច្ចនៅការិយាល័យប្រធានាធិបតីនាថ្ងៃពុធ ទី៦ ខែឧសភា និងចេញមកស្វាគមន៍អ្នកគាំទ្រពីរានហាលនៃវិមានជាតិ។ លោកស្រីបានពណ៌នា BTS ថា ជាក្រុមតន្ត្រីដែលតែងតែនាំមកនូវសារនៃមិត្តភាព សន្តិភាព និងក្ដីស្រឡាញ់។​

ផ្អែកតាមសារព័ត៌មាន The Korea Herald សមាជិកម្នាក់ៗបានចេញមកស្វាគមន៍អ្នកគាំទ្រប្រមាណ ៥ម៉ឺននាក់ ដែលបានមកប្រមូលផ្ដុំគ្នានៅពីមុខវិមានជាតិ ដោយពេលនោះ RM ក៏បានអរគុណដល់អ្នកគាំទ្រម៉ិកស៊ិកសម្រាប់ការស្វាគមន៍ថា៖ “សូមអរគុណខ្លាំងណាស់ដែលបានទទួលស្វាគមន៍ពួកយើង។ យើងកំពុងតែរង់ចាំការប្រគំតន្ត្រីនៅថ្ងៃស្អែកនេះ។ តស់! មកសប្បាយជាមួយគ្នា”។

មេក្រុម BTS រូបនេះបាននិយាយបន្ថែមជាភាសាអេស៉្បាញថា៖ “ខ្ញុំស្រឡាញ់អ្នក។​ ខ្ញុំស្រឡាញ់អ្នកខ្លាំងណាស់”។

ចំណែកឯ V ក៏បាននិយាយទៅកាន់អ្នកគាំទ្រជាភាសាអេស្ប៉ាញផងដែរថា លោក និងសមាជិកក្នុងក្រុមពិតជានឹកប្រទេសម៉ិកស៊ិក មុននឹងបន្ថែមថា៖ “ថាមពលនៅទីនេះពិតជាអស្ចារ្យណាស់។ សូមអរគុណខ្លាំងណាស់ដែលស្រឡាញ់ពួកយើង”។

ជំនួបនេះបានកើតឡើងមុនការប្រគំតន្ត្រីទេសចរណ៍ពិភពលោក Arirang របស់ BTS នៅកីឡដ្ឋាន Estadio GNP Seguros ដែលគ្រោងធ្វើឡើងនៅថ្ងៃទី៧ ទី៩ និងទី ១០ ខែឧសភានេះ ​ ខណៈសំបុត្រចូលទស្សនាដែលដាក់លក់តាំងពីខែមករា បានលក់ចេញអស់គ្មានសល់។

ការប្រគុំតន្ត្រីវិលត្រឡប់មកវិញនេះ ​ រំពឹងថានឹងជះផលចំណេញដល់សេដ្ឋកិច្ចប្រទេសម៉ិកស៊ិក។ យោងតាមសភាពាណិជ្ជកម្មទីក្រុងម៉ិកស៊ិកូ ការប្រគំតន្ត្រីនេះត្រូវបានប៉ាន់ប្រមាណថា នឹងបង្កើតសកម្មភាពសេដ្ឋកិច្ចដែលមានតម្លៃប្រហែល ១០៧.៥ លានដុល្លារអាមេរិក៕