នៅព្រឹកថ្ងៃទី១២ ខែមីនានេះ គណនីបណ្ដាញសង្គមក្រុមអ្នកគាំទ្រ Enhypen Engene Cambodia បានចែករំលែកថា រថយន្តតវ៉ាដែលក្រុមអ្នកគាំទ្រកម្ពុជា រួមគ្នាបញ្ជូនទៅតវ៉ាសុំឱ្យ Heeseung ចូលក្រុមវិញ បានទៅដល់ទីតាំងមុខអាគារ HYBE លើទឹកដីប្រទេសកូរ៉េខាងត្បូងហើយ។

ភ្ជាប់ជាមួយនឹងរូបភាព ៥ សន្លឹក  CAM-ENGENE បានបញ្ជាក់អត្ថន័យទាមទារទៅកាន់ទីភ្នាក់ងារ BELIFT LAB ថា ​​៖ “ពួកយើងសង្ឃឹមថានឹងមានឱកាសឱ្យ Lee Heeseung អា​ចធ្វើការងារទោល ស្របពេលដែលបន្តឈ្មោះជាសមាជិកក្រុម ENHYPEN”។

បន្ថែមពីនេះ​ ក្រុមអ្នកគាំទ្រជនជាតិខ្មែរក៏បានទាមទារឱ្យទីភ្នាក់ងារខាងលើបញ្ជូលតារាប្រុសវ័យ ២៤ ឆ្នាំជាសមាជិកឡើងវិញ ដោយបញ្ជាក់ថា ក្រុម ENHYPEN ត្រូវតែមានសមាជិក ៧នាក់។

រូបភាព៖ Enhypen Engene Cambodia

សកម្មភាពតវ៉ាខាងលើនេះ បានកើតឡើងក្រោយពី BELIFT LAB បានប្រកាសពីព័ត៌មាននៃការចាកចេញរបស់ Heeseung តាមរយៈកម្មវិធី Weverse កាលពីថ្ងៃទី១០ ខែមីនា កន្លងទៅ ដោយបានពន្យល់ថា ក្រោយមានការពិភាក្សាជាច្រើនទាក់ទងនឹងទិសដៅ និងគោលដៅអនាគតរបស់ក្រុម លទ្ធផលបានបង្ហាញថា Heeseung មានចក្ខុវិស័យចង់បន្តធ្វើតន្ត្រីផ្ទាល់ខ្លួន ជាសិល្បករទោល។

ទន្ទឹមគ្នានេះ តារាប្រុសវ័យ ២៤ឆ្នាំ ក៏បានចែករំលែកសំបុត្រសរសេរដោយដៃ បង្ហាញពីអារម្មណ៍របស់ខ្លួ​នផងដែរថា ក្នុងពេលកន្លងមក លោកបានចំណាយពេលវេលាជាច្រើនក្នុងការធ្វើចម្រៀងផ្ទាល់ខ្លួន និងបានគិតគូរយ៉ាងខ្លាំងពីរបៀបដែលលោកនឹងចែករំលែកវាទៅកាន់អ្នកគាំទ្រ។ ដោយចង់ផ្ដោតលើការងារទោល តែមិនចង់ប៉ះពាល់ដល់ក្រុម Heeseung បានសរសេរថា៖ “ទោះបីជាមានរឿងជាច្រើនដែលខ្ញុំចង់បង្ហាញ ប៉ុន្តែខ្ញុំមិនចង់យកមហិច្ឆតាផ្ទាល់ខ្លួនរបស់ខ្ញុំ មកដាក់នៅពីមុខការងារក្រុមនោះទេ”។

នៅថ្ងៃបន្ទាប់ ENHYPEN ក៏បានបង្ហោះសំណេរមួយបង្ហាញពីអារម្មណ៍ពិបាកចិត្តរបស់សមាជិកទាំង ៦នាក់ ដែលបានធ្វើឱ្យអ្នកគាំទ្រព្រួយបារម្ភ និងឈឺចាប់ចំពោះការចាកចេញនេះ។ យ៉ាងណាមិញ សមាជិកម្នាក់ៗបានគោរពការសម្រេចចិត្តរបស់ Heeseung ខណៈសន្យាថា ពួកគេនឹងខំប្រឹងបន្តការងារក្រុមដើម្បីអ្នកគាំទ្រ៕