ស្រ្តីអ្នកជំនួញដើមកំណើតខ្មែរ អ៊ុង ពីយ៉ាណេ ទៅមហោស្រពភាពយន្តកាន ត្រូវទស្សនាវដ្ដី Vanity Fair ចាប់អារម្មណ៍

ក្រោយបង្ហាញវត្តមានជាច្រើនថ្ងៃ នៅមហោស្រពភាពយន្តកាន លើកទី ៧៩ លោកស្រី អ៊ុង ពីយ៉ាណេ ដែលជាស្ត្រីអ្នកជំនួញដើមកំណើតខ្មែរ ត្រូវបានបង្ហាញខ្លួននៅលើ ទស្សនាវដ្ដី Vanity Fair របស់អាមេរិក នាថ្ងៃបិទកម្មវិធី កាលពីថ្ងៃ ២៣ ខែឧសភា ឆ្នាំ ២០២៦ កន្លងទៅថ្មីៗនេះ។

អ្នកជំនួញស្ត្រីខ្មែររូបនេះ បានអញ្ជើញឲ្យចូលរួមសម្ពោធកម្មវិធីចាក់បញ្ចាំងលើកដំបូងនៃរឿង Diamond ផលិតដោយលោក Andy Garcia នៅឆ្នាំនេះ នា Cannes film festival 2026 កាលពីថ្ងៃ ១៩ ខែឧសភា ឆ្នាំ ២០២៦ និងបន្តចូលរួមនាថ្ងៃបន្ទាប់មកទៀត ហើយក៏បានប្រើប្រាស់ឈុតឡើងនៅកម្ពុជាផងដែរ។

រហូតមកដល់ថ្ងៃ ២៣ ខែឧសភា ឆ្នាំ ២០២៦ Cannes film festival 2026 បានបិទ ដោយមានតារាល្បីៗលំដាប់ពិភពលោក ព្រមទាំងអ្នកជំនួញចូលរួម។ ក្នុងនោះស្ថាបនិក នាយក និងនាយកប្រតិបត្តិគ្រឿងថែរក្សាសម្រស់ Nalia Skin បានដើរលើកកម្រាលព្រំក្រហម ដោយគ្រងឈុត Amit GT របស់អ្នករចនាជនជាតិឥណ្ឌា។ ឈុត Couture ពណ៌ស្វាយខ្ចី របស់ Amit GT សមគ្នាជាមួយកាបូបដៃ CHRISTIAN DIOR ហើយលោកស្រីក៏បន្ថែមដោយគ្រឿងអលង្ការពេជ្រ និងគជ់ខ្យង។

ទស្សនាវដ្ដី Vanity Fair សរសេរពី “ម៉ូដសម្លៀកបំពាក់ទាំងអស់ពីមហោស្រពភាពយន្តកាន ឆ្នាំ ២០២៦ តាមដានរូបភាពទាំងអស់នៅលើកម្រាលព្រំក្រហម និងការថតរូបពីការប្រារព្ធពិធីរយៈពេល ១២ ថ្ងៃតាមបណ្ដោយ French Riviera” ដោយមានរូបភាពតារាល្បីៗ និងលោកស្រី អ៊ុង ពីយ៉ាណេ ដ៏ឆើតឆាយ។

ក្រៅពីទស្សនាវដ្ដី Vanity Fair ស្ថាប័ន Getty Images និងកាមេរ៉ា Cannes Film Festivalក៏បានចាប់អារម្មណ៍លើ អ៊ុង ពីយ៉ាណេ ដូចគ្នាដែរ។ គួរបញ្ជាក់ផងដែរថា Vanity Fair គឺជាទស្សនាវដ្តីប្រចាំខែរបស់អាមេរិកស្តីពីវប្បធម៌ពេញនិយម ម៉ូដ និងព្រឹត្តិការណ៍បច្ចុប្បន្ន ដែលមានទាំង Platform Digital និងសៀវភៅ។

ស្ត្រីខ្មែរដែលរស់នៅ និងបញ្ចប់ការសិក្សានៅប្រទេសអូស្ត្រាលី អ៊ុង ពីយ៉ាណេ បានចូលរួមកម្មវិធីមហោស្រពភាពយន្តកាន ឆ្នាំ ២០២៦ រយៈពេល ៤ ថ្ងៃ។ លោកស្រី ពីយ៉ាណេ គឺជាសហគ្រិន អ្នកនិពន្ធ និងជាអ្នកតស៊ូមតិសុខភាពផ្លូវចិត្តដ៏ល្បីល្បាញម្នាក់ ដោយសារ Style ផ្ទាល់ខ្លួន និងផលប៉ះពាល់ជាសកលរបស់គាត់។

ក្នុងនាមជាស្ថាបនិក Nalia Skin និងជាអ្នកនិពន្ធសៀវភៅ Good Girl: The Five Foundations លោកស្រីផ្ដល់អំណាចដល់ស្ត្រីតាមរយៈការព្យាបាល ការផ្ដល់តម្លៃដល់ខ្លួនឯង និងការច្នៃប្រតិដ្ឋឡើងវិញ៕

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត