ក្រសួងធំៗ៣ រួមគ្នាអំពាវនាវឱ្យបញ្ឈប់ផលិតមាតិកាអសីលធម៌ ប៉ះពាល់តម្លៃស្ត្រីខ្មែរ

ក្រសួងធំៗ ៣ របស់កម្ពុជា រួមមាន ក្រសួងវប្បធម៌ និងវិចិត្រសិល្បៈ, ក្រសួងព័ត៌មាន និងក្រសួងកិច្ចការី បានរួមគ្នាជាធ្លុងមួយ ធ្វើការហាមឃាត់នូវការផលិត ផ្សព្វផ្សាយ និងចែកចាយមាតិកានៅលើគ្រប់បណ្ដាញសង្គម ដែលបង្កការប៉ះពាល់ដល់ វប្បធម៌ ប្រពៃណី ទំនៀមទម្លាប់ កិត្តិយស និងសេចក្ដីថ្លៃថ្នូរ របស់ស្ត្រីខ្មែរ។

កិច្ចការលើកនេះ ផ្ដោតជាសំខាន់លើ ៦ ចំណុចដូចខាងក្រោម ដែលមានដូចជា៖

១. បញ្ឈប់រាល់ការផលិត ផ្សព្វផ្សាយ និងចែកចាយមាតិកាទាំងឡាយណា ដែលប្រើប្រាស់សម្ដីអសុរោះ ឬកាយវិការ មិនសមរម្យ ពោលគឺផ្ទុយសីលធម៌ ប្រពៃណី។

២. បញ្ឈប់ការយករូបរាងកាយស្ត្រី និងសកម្មភាពពាក់ព័ន្ធស្ត្រី មកធ្វើជាឧបករណ៍ទាក់ទាញការ Like , share & View ឬក្នុងន័យជាប្រយោជន៍ផ្ទាល់ខ្លួនណាមួយ។

៣. ចូលរួមផលិត ផ្សព្វផ្សាយ ចែកចាយ មាតិកាល្អៗ ដែលបង្ហាញពីគុណតម្លៃស្ត្រី វប្បធម៌ ប្រពៃណី ក្នុងសង្គម និងលើឆាកអន្តរជាតិ។

៤. ចៀសវាងប្រើរូបភាព ឬភាសាបង្កប់ការរើសអើងភេទ និងបំពានលើសេចក្ដីថ្លៃថ្នូររបស់មនុស្សគ្រប់រូបចំពោះការផ្សាយពាណិជ្ជកម្មផលិតផល ឬសេវាកម្មនានា

៥. គ្រប់តួអង្គពាក់ព័ន្ធ ត្រូវប្រកាន់ខ្ជាប់ក្រមសីលធម៌ ដោយមិនត្រូវចែករំលែក ផលិត ផ្សព្វផ្សាយ មាតិកាជះឥទ្ធិពលអវិជ្ជមានដល់ស្ត្រី។

៦. ជំរុញ និងលើកទឹកចិត្តដល់ការផលិតមាតិកា ដែលមានភាពច្នៃប្រឌិត ការអប់រំ បំណិនជីវិត សិល្បៈ វប្បធម៌ ប្រពៃណី ទំនៀមទម្លាប់ខ្មែរ ជាពិសេសលើកកម្ពស់យេនឌ័រក្នុងសង្គមខ្មែរបច្ចុប្បន្ន និងអនាគត។

ជាមួយគ្នា ក្រសួងនឹងចាត់វិធានយ៉ាងតឹងរឹងទៅចាប់ច្បាប់ចំពោះនិតិបុគ្គល ឬរូបវន្តបុគ្គលដែលនៅតែផលិត ផ្សព្វផ្សាយ ក៏ដូចជាចែកចាយនូវមាតិកាដែលផ្ទុយខ្លឹមសារនៃសេចក្ដីណែនាំមួយនេះ ក្រោយទទួលវិធានអប់រំ៕

រូបភាព ៖ ក្រសួងទាំង ៣ ខាងលើ

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។