សប្បុរសជនល្បីឈ្មោះ លោកស្រី សុភា បុត្រឈរ ត្រូវព្រះមហាក្សត្រចេញព្រះរាជក្រឹត្យ ត្រាស់បង្គាប់ផ្តល់គោរមងារជា «ឧកញ៉ា»

ស្រ្តីខ្មែរដែលបានរៀបការជាមួយបុរសអាល្លឺម៉ង់ ហើយមហាជនតែងហៅលោកស្រីថា សេដ្ឋិនីចិត្តធម៌ លោកស្រី សុភា បុត្រឈរ ត្រូវបាន ត្រូវព្រះមហាក្សត្រ ចេញព្រះរាជក្រឹត្យ ត្រាស់បង្គាប់ផ្ដល់គោរមងារជា «ឧកញ៉ា»។ ដោយមើលឃើញថាស្ត្រីខ្មែរដែលមានស្វាមីជនជាតិអាល្លឺម៉ង់ ជាម្ចាស់ក្រុមហ៊ុន Böttcher AG ដែលជាក្រុមហ៊ុនលក់សម្ភារៈការិយាល័យដ៏ល្បី។

ណូ សុភា (ឈ្មោះកំណើត លោកស្រី សុភា បុត្រឈរ) ត្រូវបានព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្ដល់គោរមងារជា«ឧកញ៉ា» ដោយយោងតាមសេចក្ដីក្រាបបង្គំទូលថ្វាយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

សម្រាប់លោកស្រី សុភា បុត្រឈរ នៅពេលទទួលបានព្រះរាជក្រឹត្យត្រាស់បង្គាប់ផ្ដល់គោរមងារជា «ឧកញ៉ា» ធ្វើឲ្យមហាជនខ្មែរ បានអបអរសាទរ ដោយសារស្ត្រីខ្មែររូបនេះពិតជាស័ក្ដិសមជាមួយងារមួយនោះ។ ឧកញ៉ា គឺជាគោរមងារ សម្រាប់រូបវន្តបុគ្គល ដែលបានបរិច្ចាគធនធានទ្រព្យសម្បត្តិផ្ទាល់ខ្លួន ដើម្បីកសាងសមិទ្ធផលជូនជាតិមាតុភូមិ ហើយបច្ចុប្បន្ន ការផ្ដល់គោរមងារនេះ ក៏ត្រូវបានកំណត់ដោយច្បាប់ផងដែរ។ ចំណុចនេះលោកស្រី សុភា បុត្រឈរ ពិតជាត្រូវម៉ាច់តែម្ដងដោយកាលពីឆ្នាំ ២០២៥ អំឡុងសង្គ្រាមឈ្លានពានពីសំណាក់ថៃមកលើដែនអធិបតេយ្យភាពខ្មែរ លោកស្រី និងស្វាមី បរិច្ចាគទឹកប្រាក់រាប់លានដុល្លារ តាមរយៈសប្បុរសជនល្បីៗ និងស្ថាប័នខ្មែរជាច្រើន។ មិនមែនតែពេលដែលថៃឈ្លានពានខ្មែរកាលពីឆ្នាំ ២០២៥ នោះទេ ស្រ្តីខ្មែរដែលមានប្រភពមកពីខេត្តកំពង់ធំនោះ បានជួយអ្នកមានពិការភាព ចាស់ជរា អ្នកគ្មានផ្ទះសម្បែង សូម្បីតែសត្វត្រូវការជំនួយ។

បច្ចុប្បន្ននេះ លោកស្រី និងស្វាមីបានបរិច្ចាគប្រាក់លើសពី ១២ លានអឺរ៉ូ ទៅដល់ប្រទេសកម្ពុជា អាល្លឺម៉ង់ និងប្រទេសផ្សេងៗ។ អ្នកទាំង២ ក៏បានសាងសង់ផ្ទះ និងផ្ដល់អាហារ ការអប់រំ និងសុវត្ថិភាពដល់មនុស្សក្នុងតំបន់ដែលរងការឈឺចាប់ ជាពិសេសដោយសារសង្គ្រាមជាច្រើន។ លោកស្រីបញ្ជាក់ថា “ការធ្វើសប្បុរសធម៌សម្រាប់ខ្ញុំមិនមែនជាកាតព្វកិច្ចទេ វាជាស្មារតី ដែលនាំមកពីបេះដូង”។ សុភា បុត្រឈើ ជាស្ត្រីកម្ពុជាដែលបង្ហាញគំរូភាពសាមញ្ញ ភាពសប្បុរស និងការរស់នៅ ដើម្បីជួយអ្នកដទៃ លោកស្រីក៏ជាឧត្ដមភរិយារបស់សេដ្ឋី ហើយក៏ជាម្ដាយនៃសេចក្ដីសង្ឃឹម សម្រាប់មនុស្សជាច្រើនជុំវិញពិភពលោក។ស្រ្តីកម្ពុជាដែលមានស្វាមីជាសេដ្ឋីអាល្លឺម៉ង់រូបនេះ ក៏មានមុខមាត់ពាក់ព័ន្ធវិស័យសិល្បៈដែរ ដោយធ្លាប់បានចូលរួមក្នុងកម្មវិធីធំៗលំដាប់ពិភពលោកជាច្រើនរួចមកហើយ៕

រូបភាព៖ Sophea MD

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត