នៅថ្ងៃទី២០ ខែមេសា នេះ ឃ្លា “iQIYI ឆ្កួតហើយ” បានក្លាយជាឃ្លាដែលមានអ្នកស្វែងរកច្រើនបំផុតនៅលើកម្មវិធី Weibo ដោយទស្សនិកជនសម្ដែងការព្រួយបារម្ភចំពោះផលប៉ះពាល់នៃបច្ចេកវិទ្យាបញ្ញាសិប្បនិម្មិត​ (AI) លើវិស័យសិល្បៈចិន បន្ទាប់ពី iQIYI បានប្រកាសថា មានសិល្បករជាង ១០០រូបបានចុះកិច្ចសន្យាព្រមឱ្យប្រើប្រាស់បច្ចេកវិទ្យា AI សម្ដែងជំនួសខ្លួន។

នៅក្នុងសន្និសីទ iQIYI World Conference ដែលធ្វើឡើងក្នុងទីក្រុងប៉េកាំង iQIYI បានដាក់សម្ពោធ «បណ្ណាល័យសិល្បករ AI» ជាផ្លូវការ និងបានអះអាងថាមានសិល្បករជាង ១០០ នាក់បានចុះកិច្ចសន្យាចូលរួម។ នៅលើអេក្រង់ក៏មានបង្ហាញឈ្មោះរបស់តារាល្បីៗ ដូចជា Zhang Ruoyun,​Yu Hewei, Wang Churan, និង Li Yitong ជាដើម។

ទន្ទឹមគ្នានេះ លោក Gong Yu នាយកប្រតិបត្តិរបស់ iQIYI បាននិយាយថា “AI អាចជួយឱ្យតារាសម្ដែងបង្កើនការថតរឿងពី ៤ រឿងក្នុងមួយឆ្នាំ ទៅដល់ ១៤ រឿង”។ លោកថែមទាំងបានលើកឡើងថា ផលិតកម្មដែលមានតារាសម្ដែងពិតប្រាកដអាចនឹងកាន់តែមានតិចទៅៗនៅពេលអនាគត រហូតអាចក្លាយទៅជាទម្រង់នៃ «បេតិកភណ្ឌវប្បធម៌អរូបី» ទៀតផង។

នៅរសៀលថ្ងៃដដែលនេះ ការពិភាក្សាក្នុងចំណោមទស្សនិកជន និងការច្រានចោលពីសំណាក់តារាល្បីៗទៅកាន់ការលើកឡើងរបស់ iQIYI បានផ្ទុះឡើង។ ជាក់ស្ដែង ស្ទូឌីយោរបស់ Zhang Ruoyun បានចេញមុខនិយាយមុនគេថា៖ “តារារបស់ខ្លួនមិនដែលបានចុះហត្ថលេខាលើការអនុញ្ញាតដែលពាក់ព័ន្ធនឹង AI ណាមួយឡើយ។ ផ្នែកច្បាប់របស់ស្ទូឌីយោកំពុងចាត់វិធានការជាបន្ទាន់លើបញ្ហានេះ”។

បន្ទាប់មក Yu Hewei, Wang Churan, និង Li Yitong ក៏បានបដិសេធដូចគ្នាថា ពួកគេមិនដែលបានចុះកិច្ចព្រមព្រៀងអនុញ្ញាតឱ្យប្រើប្រាស់ AI នោះទេ។ ការដែល iQIYI ប្រើពាក្យថា “ចុះកិច្ចសន្យា” ទាំងដែលសាមីខ្លួនមិនដឹងរឿងបែបនេះ ជាការរំលោភសិទ្ធិ ប្រៀបដូចជា “ការធ្វើរួចស្រេច ទើបប្រាប់តាមក្រោយ”។

ជាមួយនឹងបញ្ហាចម្រូងចម្រាស់ខាងលើ ឃ្លា “QIYI ឆ្កួតហើយ” បានក្លាយជាប្រធានបទក្ដៅនៅបណ្ដាញសង្គមចិន មិនមែនដោយសារទស្សនិកជនប្រឆាំងនឹងការរីកចម្រើននៃបច្ចេកវិទ្យានោះទេ ប៉ុន្តែដោយសារតែទស្សនិកជនជាង ៧៤​ភាគរយ យល់ឃើញថា AI មិនអាចបង្កើតតួអង្គដែលមានព្រលឹង និងអាចបញ្ជូនអារម្មណ៍របស់តួអង្គមកកាន់អ្នកមើលបានទេ ខណៈអ្នកខ្លះបានលើកឡើងថា អ្នកមើលរឿងចង់រំភើបចិត្តទៅតាមតួអង្គ មិនមែនចង់មើលរូបភាពនិម្មិតដែលគ្មានវិញ្ញាណនោះឡើយ។

ទន្ទឹមគ្នានេះ សាធារណជនក៏បានចំអកឃ្លារបស់លោក Gong Yu ដែលថា “តារាសម្ដែងហត់នឿយណាស់” ដោយនិយាយថា បច្ចេកវិទ្យានេះកំពុង “ដណ្ដើមការងារពីសិល្បករ”។ តួយ៉ាង មតិមួយបានលើកឡើងថា៖ “បើនិយាយឱ្យពិរោះស្តាប់គឺ តារាបានសម្រាកច្រើនជាងមុន តែបើនិយាយឱ្យស្រួលស្ដាប់គឺ តារាសម្ដែងកំពុងបាត់បង់ការងារ”។

បន្ថែមពីនេះ ការរំលោភទៅលើសិទ្ធិប្រើប្រាស់រូបភាពរបស់សិល្បករក៏ជារឿងដែលអ្នកគាំទ្របង្ហាញការព្រួយបារម្ភផងដែរ។

យ៉ាងណាមិញ អ្នកប្រើប្រាស់បណ្ដាញសង្គមចិនខ្លះបានបង្ហាញការយល់ឃើញថា ចក្ខុវិស័យរបស់លោក Gong Yu មិនមែនខុសទាំងស្រុងនោះទេ តែបច្ចេកវិទ្យាបញ្ញាសិប្បនិម្មិត​ (AI) គួរតែជាបច្ចេកទេសមួយប្រើប្រាស់សម្រាប់ឈុតឆាកដែលពិបាក និងអាចបង្កគ្រោះថ្នាក់ដល់សិល្បករ មិនជាការជំនួសទាំងស្រុងនោះទេ៕