កាលពីថ្ងៃទី ២៣ ខែមេសា នេះ Jisoo បានបង្ហាញខ្លួននៅលើកម្រាលព្រំពណ៌ផ្កាឈូក ក្នុងពិធីបើកមហោស្រព Cannes International Series Festival ឆ្នាំ ២០២៦ បើទោះបីជាបញ្ហារឿងបងប្រុសនៅតែរកាំរកូសនៅឡើយ។

ក្នុងមហាស្រពលើកទី ៩ ធ្វើឡើងនៅប្រទេសបារាំង Jisoo បានឈ្នះពានរង្វាន់ Madame Figaro Rising Star Award ជាការទទួលស្គាល់នូវសមត្ថភាពសម្ដែងដ៏ឆ្នើម និងប្រជាប្រិយភាពជាសកលរបស់តារាស្រីវ័យ ៣១ឆ្នាំ តាមរយៈខ្សែភាពយន្តភាគរឿង Newtopia និងរឿង Boyfriend on Demand។

នៅគ្រាឡើងទទួលពានរង្វាន់ តារាចម្រៀងប្រែខ្លួនជាតារាសម្ដែងរូបនេះបាននិយាយថា៖ “ខ្ញុំចង់បង្ហាញរូបភាពថ្មីៗរបស់ខ្លួនឯងតាមរយៈគម្រោងការងារខុសៗគ្នា ហើយខ្ញុំពិតជាមានសេចក្តីសុខណាស់ដែលបានទទួលពានរង្វាន់ដែលតំណាងឱ្យការគាំទ្ររបស់អ្នកទាំងអស់គ្នា”។  

“ខ្ញុំបានរៀនសូត្រអ្វីថ្មីៗពីគម្រោងការងារនីមួយៗ ហើយក៏មានមនុស្សជាច្រើនដែលចាំជួយខ្ញុំ។ រាល់ការលើកទឹកចិត្តទាំងអស់ បានផ្ដល់កម្លាំងចិត្តឱ្យខ្ញុំបន្តបោះជំហានទៅមុខទៀត”។ សមាជិក BLACKPINK រូបនេះបន្ថែមដូច្នេះ។

លោក Richard Gianorio តំណាងទស្សនាវដ្តី Madame Figaro បានសរសើរថា Jisoo មិនមែនគ្រាន់តែជាអ្នកថ្មីថ្មោងក្នុងវិស័យសម្ដែងនោះទេ ប៉ុន្តែនាងគឺជាតារាលំដាប់សកលដែលមានឥទ្ធិពលលើសពីវិស័យតន្ត្រី ហើយនាងមានភាពក្លាហានក្នុងការដើរចេញពីតំបន់សុវត្ថិភាព ដើម្បីមកទទួលជោគជ័យក្នុងវិស័យសម្ដែង។

ស្របពេលជាមួយនឹងភាពជោគជ័យនេះ ក៏មានសេចក្តីរាយការណ៍ជុំវិញរឿងអាស្រូវដែលពាក់ព័ន្ធនឹងបងប្រុសបង្កើតរបស់តារាស្រីដែលត្រូវបានចាប់ខ្លួនពីបទបៀតបៀនផ្លូវភេទ និងរងការចោទប្រកាន់ពីបទហិង្សាក្នុងគ្រួសារពីសំណាក់ភរិយា។ បញ្ហាកាន់តែពាក់ព័ទ្ធនឹងតារាស្រីនៅពេលដែល ឈ្មោះបងប្រុសនាងក៏មានស្ថិតនៅក្នុងបញ្ជីក្រេឌីតរឿង Boyfriend on Demand ផងដែរ។

ពាក់ព័ន្ធនឹងបញ្ហានេះ ទីភ្នាក់ងារ BLISSOO ដែលជាក្រុមហ៊ុនផ្ទាល់ខ្លួនរបស់ Jisoo បានចេញសេចក្តីថ្លែងការណ៍តាមរយៈក្រុមហ៊ុនមេធាវី Kim & Chang ដើម្បីបញ្ជាក់ថា សមាជិកគ្រួសាររបស់តារាស្រីគ្រាន់តែបានជួយការងារបន្តិចបន្តួចកាលពីដំណាក់កាលបង្កើតក្រុមហ៊ុនដំបូងប៉ុណ្ណោះ ប៉ុន្តែមិនមានសិទ្ធិសម្រេចចិត្ត ឬចូលរួមក្នុងការគ្រប់គ្រងឡើយ។

តំណាងផ្លូវច្បាប់បានបញ្ជាក់បន្ថែមថា Jisoo បានរស់នៅដោយឯករាជ្យតាំងពីសម័យនៅជាតារាហ្វឹកហាត់ ដូច្នេះនាងមិនបានដឹង ឬពាក់ព័ន្ធនឹងរឿងរ៉ាវឯកជនរបស់សមាជិកគ្រួសារឡើយ។

ទាក់ទិននឹងឈ្មោះក្រេឌីតនៅលើរឿង Boyfriend on Demand គឺជាឈ្មោះពីឯកសារចាស់ដែលធ្វើឡើងចន្លោះឆ្នាំ ២០២៤ – ២០២៥។ នៅពេល Jisoo ដឹងថាមានឈ្មោះបងប្រុសនាងក្នុងនោះ នាងបានស្នើសុំឱ្យលុបចេញភ្លាមៗ ដោយបានចំណាយប្រាក់ផ្ទាល់ខ្លួនជាង ១០ លានវ៉ុន ឬប្រហែល ៧ ០០០ ដុល្លារ ដើម្បីកែសម្រួលព័ត៌មាននោះចេញ៕