ប្លែក ស្អាត ច្នៃប្រតិដ្ឋ! កម្ពុជា ធ្វើកម្រងផ្កាពីក្រដាសប្រាក់រៀលខ្មែរ ជូនបេក្ខភាពបវរកញ្ញា Miss Planet International

តំណាងស្ថាប័ន Miss Planet Cambodia បានស្វាគមន៍ការមកដល់របស់បវរកញ្ញាភពផែនដីអន្តរជាតិនៅប្រទេសកម្ពុជា ជាមួយកម្រងផ្កាដែលធ្វើអំពីប្រាក់រៀលរបស់ខ្មែរ ដែលមើលទៅមិនត្រឹមមានភាពច្នៃប្រតិដ្ឋខ្ពស់ ថែមទាំងស្រស់ស្អាតទៀតផង។

ការមកដល់របស់បេក្ខភាព Miss Planet International 2025 នាថ្ងៃនេះទទួលបានស្វាគមន៍យ៉ាងកក់ក្ដៅពីសំណាក់ម្ចាស់ស្ថាប័ន Miss Planet នៅកម្ពុជា។ ជាមួយគ្នា ការទទួលស្វាគមន៍បេក្ខភាព Miss Planet International ដែលតំណាងប្រទេសនីមួយៗ ក្នុងថ្ងៃនេះ ក្រុមការងារកម្ពុជាបានរៀបចំជាកម្រងផ្កាយ៉ាងស្រស់ស្អាត ដែលធ្វើឡើងពីប្រាក់រៀលរបស់ខ្មែរ ដែលមិនត្រឹមតែមើលទៅស្រស់ស្អាត និងទាក់ទាញនោះទេ ថែមទាំងបង្ហាញពីភាពច្នៃប្រឌិតរបស់កម្ពុជាផងដែរ។

ថ្ងៃនេះ បវរកញ្ញាដែលបានធ្វើដំណើរមកដល់កម្ពុជាមានដូចជា Miss Planet Iceland , Miss Planet HMONG, Miss Planet France , Miss Planet Indonesia , Miss Planet Russia , Miss Planet Sweden , Miss Planet Ireland , Miss Planet BENIN … ។ ដោយឡែក បវរកញ្ញាតំណាងប្រទេសផ្សេងទៀតកំពុងនឹងធ្វើដំណើរជាបន្តបន្ទាប់មកកាន់កម្ពុជា។

គួរឱ្យដឹងដែរថា ការបង្ហាញវត្តមានរបស់ Miss Planet International ទាំង ៤៥ ប្រទេស មកកាន់ប្រទេសកម្ពុជា គឺដើម្បីចូលរួមពិធីបើកជាផ្លូវការ «បវរកញ្ញាភពផែនដី អន្តរជាតិ លើកទី៥ ឆ្នាំ២០២៥»។ ដោយឡែក កម្ពុជា ដែលជាម្ចាស់ផ្ទះក្នុងការរៀបចំការប្រកួត Miss Planet International ក្នុងឆ្នាំនេះក៏មានការអញ្ជើញចូលរួមពីសំណាក់ Miss Planet Cambodia ២០២៥ កញ្ញា Sydney Marith ផងដែរ៕

រូបភាព ៖ Miss Planet International

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។