តារាបង្ហាញម៉ូដ នេត រក្សា រៀបចំមង្គលការនៅលើទឹកដីអាល្លឺម៉ង់ខាងស្វាមី

អតីតលំដាប់រងទី៣ Miss Universe Cambodia 2020 នេត រក្សា ដែលកំពុងទទួលបានការចាប់អារម្មណ៍ពីសំណាក់មហាជន និងអ្នកគាំទ្រខ្មែរ ចំពោះជីវិតឯកជនរបស់អ្នកនាង និងគ្រួសារ។ ដោយតារាបង្ហាញម៉ូដ និងជាអ្នកជំនួញស្រីមួយរូបនេះ បានរៀបមង្គលការ នៅអឺរ៉ុប និងនៅហុងកុង និងមិនទាន់រៀបចំរបៀបខ្មែរនៅឡើយទេ។

ស្វាមីរបស់អ្នកនាង នេត រក្សា ជាជនជាតិអាល្លឺម៉ង់ ឈ្មោះ Marco Ryan Heer ហើយមុនរៀបមង្គលការ រក្សា និងស្វាមីអាល្លឺម៉ង់បានថត Pre-wedding ទាំងបែបប្រពៃណី និងបែប Fashion។ ងាកទៅមើលកម្មវិធី civil wedding នៅទីក្រុងហុងកុង កាលពីដើមខែ ៤ កន្លងទៅ ម្ចាស់ប្រេន Clothing by MODE ក៏បានគ្រងរ៉ូបស ដើម្បីចុះអេតាស៊ីវិល និងមានពាក្យសច្ចាប្រណិធាននៅចំពោះមុខមេធាវី ជាភាពស្របច្បាប់របស់ប្ដីប្រពន្ធ។

មកដល់ដើមខែមិថុនា ឆ្នាំ ២០២៦ នេះដែរ នេត រក្សា បានទៅរៀបការនៅលើទឹកដីនៃប្រទេសអាល្លឺម៉ង់ ដោយមានមិត្តភ័ក្ដិខ្មែរ ដូចជាកញ្ញា Mélia Constantin និងអ្នកបង្កើតមាតិកា Peachy ដែលមានស្វាមីនៅអាល្លឺម៉ង់នោះតែម្ដង។ មង្គលការរបស់ រក្សា តាមបែបប្រពៃណីអាល្លឺម៉ង់មានការចូលរួមពីសំណាក់សាច់ញាតិខាងស្វាមី និងមនុស្សស្និទ្ធស្នាលគ្នាតែប៉ុណ្ណោះ។

គួរបញ្ជាក់ថាគូស្នេហ៍របស់ នេត រក្សា បានលុតជង្គង់សុំអ្នកនាងរៀបការនៅពីមុខប្រាសាទអង្គរវត្ត កាលពីចុងឆ្នាំ ២០២៥ ដោយទទួលបានការចាប់អារម្មណ៍ខ្លាំង ទាំងក្នុងស្រុក និងក្រៅស្រុក។ នេត រក្សា បានបន្តការសិក្សា និងប្រកបអាជីពនៅហ្វីលីពីនច្រើនឆ្នាំមកហើយដែរ៕

រូប Pre-wedding នៅសៀមរាប