ទើបទិញកំពូលឡានស្ព័រ Lamborghini ឥឡូវ នី រតនា បង្ហាញវីឡាធំស្កឹមស្កៃ១ទៀត

កាលពីដើមខែឧសភា ឆ្នាំ ២០២៦ កន្លងទៅនេះ តារាចម្រៀង នី រតនា ទើបបង្ហាញរថយន្តកំពូល Lamborghini ពណ៌ទឹកក្រូចតម្លៃរាប់សែនដុល្លារថ្មីៗក្ដៅៗ ស្រាប់តែម្សិលមិញ ម្ចាស់បទ «កូនក្រមុំបងគ្រាន់តែជាមនុស្សស្រីធម្មតា» បានបង្ហាញវីឡាធំស្កឹមស្កៃ១ បន្ថែមទៀត។

ផ្ទះធំមានតម្លៃរាប់ម៉ឺនដុល្លារត្រូវសមាជិកគ្រួសារ ៥ នាក់ របស់ នី រតនា ពិតជាធ្វើឲ្យមហាជនស្ញប់ស្ញែង និងកោតសរសើរពីការខិតខំប្រឹងប្រែងរបស់ប្ដីប្រពន្ធអ្នកទាំង ២។ ដោយ នីរតនា នៅតែមានទីផ្សារការងារសិល្បៈ ហើយភរិយាលោក បន្តរបររកស៊ីតាមអនឡាញ ដែលជាផលិតផលថែរក្សាសម្រស់ដដែល។

ទាំងអ្នកគាំទ្រ ក៏ដូចជាមិត្តរួមអាជីព ម្នាក់ៗលាន់មាត់លាន់មាត់ពីសមិទ្ធផលដែល នី រតនា និង Tessa តាំងពីចាប់ដៃគ្នាមក កាន់តែរីកចម្រើន និងកាក់កបរហូត។ មិនតែប៉ុណ្ណោះគូស្វាមីភរិយាវ័យក្មេងទាំង ២ មានកូនប្រុសស្រីដល់ទៅ ៣ នាក់ ទាំងសុខភាពល្អ ស្រស់ស្អាត ហើយម្នាក់ៗពិតជាគួឲ្យស្រលាញ់។

ម្ចាស់បទ «ម្ចាស់បេះដូង» ក៏បានសរសេររៀបរាប់ អមដោយរូបភាពក្រុមគ្រួសារដ៏កក់ក្ដៅថា “ថ្ងៃលាភ ថ្ងៃជ័យ ថ្ងៃមកទទួលកូនសោរផ្ទះនៃសុភមង្គលរបស់យើង អបអរសាទរក្តីស្រមៃធំមួយទៀតរបស់យើងប្រពន្ធសម្លាញ់ Tessa Womea ភាពស្មោះត្រង់ និងអត់ធ្មត់ នាំអោយជីវិតប្តីប្រពន្ធយើងរីកចំរើនជានិច្ច“។

សម្រាប់តារាប្រុសម្ចាស់ពានរង្វាន់ Cambodia Idol រដូវកាលទី ១ មិនបានបញ្ជាក់ពីតម្លៃនៃអចលនទ្រព្យទាំង ២ ដែលលោក និងគ្រួសារទើបសម្រេចបាននោះទេ។ តែអាចស្មានបានថា Lamborghini គឺជាឡានកំពូលដែលមានតម្លៃខ្ពស់កប់ពពក ហើយផ្ទះវីឡាដែលតារាប្រុសមានប្រភពមកពីខេត្តកំពង់ធំនោះ ក៏ខ្ទង់សែនដុល្លារដែរ។

គួរបញ្ជាក់ផងដែរថា បើទោះជាមិត្តរួមជំនាន់បានចាកចេញពីទ្រនំចាស់ជាបន្តបន្ទាប់ តែ នី រតនា នៅតែបន្តជ្រកកោននៅផលិតកម្មរស្មីហង្សមាសដដែល៕