Manchester United នឹងតតាំងជាមួយ Villarreal ក្នុងវគ្គផ្ដាច់ព្រ័ត្រ UEFA Europa League ម៉ោង៩យប់នៅទីក្រុង Gdansk ប្រទេសប៉ូឡូញ ថ្ងៃពុធទី២៦ខែឧសភានេះ ត្រូវនឹងម៉ោង២រំលងអធ្រាត្រឈានចូលព្រឹកថ្ងៃព្រហស្បតិ៍នៅកម្ពុជា។
នេះទើបតែជាការដឹកនាំក្រុមប្រកួតផ្ដាច់ព្រ័ត្រលើកទី២ប៉ុណ្ណោះក្នុងអាជីពជាអ្នកចាត់ការរបស់លោក Ole Gunnar Solskjaer បន្ទាប់ពីឈ្នះពានខាប់ន័រវេសជាមួយ Molde ក្នុងឆ្នាំ២០១៣ ស្របពេល Man Utd ខានឈ្នះពាន៤ឆ្នាំមកហើយ។
ចំណែកអ្នកចាត់ការ Villarreal លោក Unai Emery វិញ នឹងក្លាយជាអ្នកចាត់ការជោគជ័យបំផុតក្នុងប្រវត្តិសាស្ត្រពាន Europa League ប្រសិនលោកនាំក្រុមនាវាមុជទឹកពណ៌លឿងលើកពានយប់នេះ។ លោកបានឈ្នះពានទ្វីបអឺរ៉ុបកម្រិតទី២នេះ៣លើកជាប់គ្នាកាលនៅបង្វឹក Sevilla គឺក្នុងឆ្នាំ២០១៤, ២០១៥ និង២០១៦។ ហើយក្នុងឆ្នាំ២០១៩កន្លងទៅ លោកក៏បានដឹកនាំ Arsenal ឡើងដល់វគ្គផ្ដាច់ព្រ័ត្រផងដែរ តែលេងចាញ់ Chelsea។
អីចឹងតើ យប់នេះក្រុមណាមានប្រៀបជាងក្រុមណា រវាង Villarreal និង Man Utd?
តាំងពីលោក Solskjaer ចូលបង្វឹក Man Utd ក្នុងខែធ្នូឆ្នាំ២០១៨មក ក្រុមនេះមិនទាន់ឈ្នះពានអ្វីនៅឡើយទេ។ ទោះយ៉ាងនេះក្ដី លោក Solskjaer និយាយថា៖ «នេះជាក្រុមមួយដែលពួកយើងបានកសាងក្នុងពេលពីរបីឆ្នាំចុងក្រោយនេះ។ សង្ឃឹមថានេះជាការចាប់ផ្ដើមនៃអ្វីមួយបន្ថែមទៀត»។
ទោះបី Man Utd បានត្រឹមខកចិត្តក្នុងវគ្គពាក់កណ្ដាលផ្ដាច់ព្រ័ត្រជាច្រើនលើកក្នុងពេល២រដូវកាលចុងក្រោយ លោក Solskjaer និយាយថាលោកមានទំនុកចិត្តយ៉ាងស្ងៀមស្ងាត់ក្នុងការឈ្នះ Villarreal ដែលបានបញ្ចប់ La Liga ក្នុងលេខរៀងទី៧។ លោកថាកីឡាករក្នុងក្រុមបិសាចក្រហមបាននិងកំពុងធ្វើការជាមួយគ្នា១ឆ្នាំកន្លះមកហើយ។ ជំហានបន្ទាប់សម្រាប់ពួកគេគឺការរីករាយក្នុងការប្រកួតបែបនេះ។ ពួកគេរួចរាល់សម្រាប់ការប្រកួតរាត្រីនេះ។ ប៉ុន្តែលោកនិយាយថាខាងគ្រូ Villarreal វិញមុខជាមានអារម្មណ៍បែបនេះដូចគ្នា។ ដូច្នេះថាក្ដីសង្ឃឹមគឺ៥០-៥០។ លោកថាអ្វីៗសុទ្ធតែអាចកើតឡើងក្នុងវគ្គផ្ដាច់ព្រ័ត្រ ដូចជារបូតគ្រាប់បាល់លឿនពេក, របួសកីឡាករ, កាតក្រហមកីឡាករ។ ហេតុនេះក្រុមត្រូវត្រៀមគ្រប់យ៉ាងឱ្យរួចរាល់។
ចំពោះលោក Emery ដែលត្រូវបាន Arsenal បណ្ដេញពីតំណែងក្រោយដឹកនាំបាន១៨ខែ និយាយថាការប្រកួតយប់នេះមិនមែនជាការសងសឹកទល់នឹងក្រុមអង់គ្លេសឬមនុស្សណាទេ។ ផ្ទុយទៅវិញ លោកផ្ដោតលើការយកពានទ្វីបអឺរ៉ុបឱ្យ Villarreal ជាលើកដំបូងក្នុងប្រវត្តិសាស្ត្រអាយុ៩៨ឆ្នាំរបស់ក្លិបនេះ។ Villarreal បានផ្ដួល Arsenal ក្នុងវគ្គពាក់កណ្ដាលផ្ដាច់ព្រ័ត្រ មុនឡើងមកប៉ះ Man Utd នេះ។ ក្រុមរបស់អេស្ប៉ាញមួយនេះលេងមិនទាន់ចាញ់ឡើយក្នុងពានអឺរ៉ុបរដូវកាល២០២០-២១នេះ ដោយឈ្នះ១២ប្រកួត និងស្មើ២ប្រកួត។ លោកថា Man Utd ជាក្រុមគួរឱ្យខ្លាចមួយ ប៉ុន្តែកីឡាករ Villarreal មិនព្រឺសម្បុរឡើយ។
កីឡាករសំខាន់ៗណាខ្លះលេងបាននិងណាខ្លះរបួស?
ខាង Man Utd៖ មន្ទិលនៅតែមានចំពោះប្រធានក្រុម Harry Maguire។ ខ្សែការពារកណ្ដាលរូបនេះបានរបួសកជើងកន្លះខែមុនអំឡុងការប្រកួតទល់ Aston Villa បណ្ដាលឱ្យខកខានការប្រកួត៤លើកចុងក្រោយរបស់ក្រុម។ តែគេបានធ្វើដំណើរទៅប៉ូឡូញជាមួយក្រុម ប៉ុន្តែម្សិលមិញមិនបានហាត់ជាមួយក្រុមឡើយ។ ខ្សែប្រយុទ្ធ Anthony Martial អវត្តមាន២ខែមកហើយដោយសាររបួសជង្គង់អំឡុងពេលលេងឱ្យជម្រើសជាតិបារាំងក្នុងខែមីនា។ គេរួមជាមួយខ្សែការពារ Phil Jones នឹងគ្មានវត្តមានឡើយយប់នេះ។ ចំពោះតំណែងចាំទី លោក Solskjaer នឹងត្រូវពិចារណាយ៉ាងលំបាករវាង David De Gea និង Dean Henderson។ De Gea បានសង្គ្រោះបាល់ល្អៗមួយចំនួនក្នុងវគ្គពាក់កណ្ដាលផ្ដាច់ព្រ័ត្រទល់ Roma តែ Henderson ក៏បានបង្ហាញភាពប្រកួតប្រជែងកៅអីដៃទី១ដែរក្នុងរយៈពេលចុងក្រោយ។
ខាង Villarreal៖ ក្រុមលោក Emery បាត់ខ្សែប្រយុទ្ធស្លាបដ៏លឿន Samuel Chukwueze ដោយសាររបួស។ ប៉ុន្តែនៅមានខ្សែប្រយុទ្ធជម្រើសជាតិអេស្ប៉ាញ Gerard Moreno ដែលបង្ហាញគុណផលលេចធ្លោរដូវកាលនេះ។ គេរកបាន២៩គ្រាប់ក្នុងគ្រប់ពានរង្វាន់។ ខ្សែបម្រើកណ្ដាល Dani Parejo មានសមត្ថភាពគ្រប់គ្រងការប្រកួតយ៉ាងល្អដូចដែលគេបានធ្វើទល់នឹង Arsenal ខណៈ Alfonso Pedraza ក៏មានភាពគំរាមកំហែងនៅស្លាបខាងឆ្វេងផងដែរ។
ជម្រើស១១នាក់ដំបូងរបស់ក្រុមទាំង២យប់នេះអាចជា៖
Villarreal: Rulli; Foyth, Albiol, Torres, Pedraza; Pino, Capoue, Parejo, Trigueros: Moreno, Bacca
Man Utd: De Gea; Wan-Bissaka, Bailly, Lindelöf, Shaw; McTominay, Fred; Rashford, Bruno Fernandes, Pogba; Cavani
ប្រវត្តិជួបគ្នា
Man Utd និង Villarreal ធ្លាប់ប៉ះគ្នា៤ដងក្នុងពានរង្វាន់ផ្លូវការ គឺក្នុងពាន UEFA Champions League ហើយបានបញ្ចប់ក្នុងលទ្ធផលស្មើគ្នា០-០ទាំង៤ប្រកួតក្នុងរដូវកាល២០០៥-០៦ និង២០០៨-០៩។
រឿងសំខាន់ៗគួរដឹងបន្ថែម
នេះជាលើកដំបូងដែល Villarreal ឡើងដល់ផ្ដាច់ព្រ័ត្រពានខ្នាតធំទ្វីបអឺរ៉ុប។ មុនឡើងដល់វគ្គផ្ដាច់ព្រ័ត្ររដូវកាលនេះ Villarreal បានឈ្នះលេខ១ពូល I រួចទម្លាក់ក្រុមខ្លាំងៗដូចជា RB Salzburg ៤-១ក្នុងវគ្គ៣២ក្រុម, ឈ្នះ 4-0 លើ Dynamo Kyiv ក្នុងវគ្គ១៦ក្រុម, ឈ្នះ 3-1 លើ Dinamo Zagreb ក្នុងវគ្គ៨ក្រុម និងឈ្នះ 2-1 លើ Arsenal ក្នុងវគ្គ៤ក្រុមចុងក្រោយ។ ចំណែក Man Utd បានធ្លាក់ពីពូល Champions League ក្នុងនាមលេខ៣មកចូល Europa League រួចឈ្នះ 4-0 លើ Real Sociedad ក្នុងវគ្គ៣២ក្រុម, ឈ្នះ 2-1 លើ AC Milan ក្នុងវគ្គ១៦ក្រុម, ឈ្នះ 4-0 លើ Granada ក្នុងវគ្គ៨ក្រុម និងឈ្នះ 8-5 លើ Roma ក្នុងវគ្គពាក់កណ្ដាលផ្ដាច់ព្រ័ត្រ។
គួរជម្រាបផងដែរថា នេះជាការប្រកួតផ្ដាច់ព្រ័ត្រពានអឺរ៉ុបលើកទី៨របស់ Man Utd ដែលជាក្រុមអង់គ្លេសឡើងដល់ផ្ដាច់ព្រ័ត្រញឹកជាងគេទី២បន្ទាប់ពី Liverpool។ ផ្ដាច់ព្រ័ត្រ៧ដងមុន Man Utd ឈ្នះ៥ដងនិងចាញ់២ដង គឺបរាជ័យក្រោមថ្វីជើង Barcelona ក្នុងផ្ដាច់ព្រ័ត្រ Champions League 2008-09 និង 2010-11។
នេះជាលើកទី៥ដែលក្រុមរបស់អេស្ប៉ាញប៉ះក្រុមរបស់អង់គ្លេសក្នុងវគ្គផ្ដាច់ព្រ័ត្រ UEFA Cup ឬ Europa League។ ភាគច្រើនក្រុមរបស់អេស្ប៉ាញជាអ្នកឈ្នះ ជាក់ស្ដែង Sevilla បានផ្ដួល Middlesbrough, Atletico Madrid បានផ្ដួល Fulham និងចុងក្រោយបំផុត Sevilla ផ្ដួល Liverpool ក្នុងឆ្នាំ២០១៦។ មានតែម្ដងគត់ដែលក្រុមរបស់អង់គ្លេសលេងឈ្នះក្រុមរបស់អេស្ប៉ាញក្នុងពាននេះ គឺ Liverpool ផ្ដួល Deportivo Alaves ៥-៤ក្នុងឆ្នាំ២០០១។
អ្នកចាត់ការជោគជ័យបំផុតក្នុងបាល់ទាត់អង់គ្លេស លោក Sir Alex ក៏បានធ្វើដំណើរទៅប៉ូឡូញជាមួយក្រុមបិសាចក្រហមដែរដើម្បីទស្សនាការប្រកួតផ្ដាច់ព្រ័ត្ររបស់ក្រុម។ លោក Solskjaer និយាយថា Sir Alex ជាមនុស្សដ៏ពិសេសម្នាក់ ប្រៀបដូចជា encyclopedia នៃកីឡាបាល់ទាត់អីចឹង។ ពេលមាន Sir Alex នៅក្បែរ និងញ៉ាំអាហារជាមួយគ្នាដូច្នេះ កីឡាករអាចសួរវីរបុរសរូបនេះបានអំពីអ្វីដែលពួកគេចង់ដឹង។
ថ្ងៃទី២៦ឧសភាជាថ្ងៃពិសេសសម្រាប់ Man Utd
ថ្ងៃនេះកាលពី២២ឆ្នាំមុន Solskjaer បានស៊ុតបញ្ចូលទីគ្រាប់ជ័យជម្នះឱ្យ Man Utd ផ្ដួល Bayern Munich យកពាន Champions League សម្រាប់ក្រុមលោក Sir Alex Ferguson។ ថ្ងៃ២៦ឧសភានេះក៏ជាថ្ងៃកំណើតរបស់ Sir Matt Busby ដែលត្រូវបានចាត់ទុកជាបិតាស្ថាបនិករបស់ Manchester United។ លោកបានកើតនៅថ្ងៃទី២៦ខែឧសភាឆ្នាំ១៩០៩។ លោកបានដឹកនាំ Man Utd លើកទី១ពីឆ្នាំ១៩៤៥ដល់១៩៦៩ ឈ្នះពានលីគកំពូលអង់គ្លេស៥ដង, FA Cup ២ដង, FA Charity Shield ៥ដង និង European Cup (សព្វថ្ងៃគឺ Champions League) ១ដង។ លោកបានដឹកនាំ Man Utd លើកទី២ក្នុងរដូវកាល១៩៧០-៧១ ដែលជារដូវកាលចុងក្រោយនៃអាជីពអ្នកចាត់ការរបស់លោក។
Carlos Bacca បានស៊ុតចូល២គ្រាប់ម្នាក់ឯងក្នុងវគ្គផ្ដាច់ព្រ័ត្រជាមួយ Sevilla ឆ្នាំ២០១៥។ បើយប់នេះគេទាត់ចូលទៀត គេនឹងក្លាយជាកីឡាករទី១ដែលរកបានគ្រាប់បាល់ក្នុងវគ្គផ្ដាច់ព្រ័ត្រពានអឺរ៉ុបសម្រាប់ក្លិប២ផ្សេងគ្នាដែលស្ថិតក្នុងលីគតែ១ បន្ទាប់ពី Hernan Crespo បានធ្វើសម្រាប់ Parma ក្នុងវគ្គផ្ដាច់ព្រ័ត្រ UEFA Cup 1998-99 និង AC Milan ក្នុងវគ្គផ្ដាច់ព្រ័ត្រ Champions League 2004-05។
បើ Villarreal ឈ្នះយប់នេះ លោក Emery នឹងក្លាយជាអ្នកចាត់ការទី៤ដែលឈ្នះពានខ្នាតធំទ្វីបអឺរ៉ុប៤ដង បន្ទាប់ពីលោក Jose Mourinho, Bob Paisley និង Giovanni Trappatoni៕
