ស្របពេលដំណើរប្រជែងរកអ្នកស្នងតំណែងលោក Zinedine Zidane នៅ Real Madrid កាន់តែកើនកម្ដៅឡើងៗ បេក្ខជនថ្មីម្នាក់ទៀតបានលេចមុខឡើង ហើយគ្រូម្នាក់នោះជាបុគ្គលដែលអ្នកគាំទ្រ Real Madrid ស្គាល់ច្បាស់ គឺលោក Carlo Ancelotti។
អ្នកចាត់ការ Everton បច្ចុប្បន្ន ជាអ្នកជំនាញតាក់ទិចជនជាតិអ៊ីតាលីទី៣ដែលត្រូវបានភ្ជាប់នឹងតំណែងគ្រូបង្គោលថ្មីនៅ Real Madrid បន្ទាប់ពីលោក Massimiliano Allegri ដែលបានព្រមព្រៀងវិលចូលបង្វឹក Juventus វិញហើយ និងម្នាក់ទៀតគឺលោក Antonio Conte ដែលបានចែកផ្លូវជាមួយ Inter Milan ក្រោយនាំក្រុមលើកពាន Serie A ថ្មីៗ។
បេក្ខជនផ្សេងទៀតដែលត្រូវបានភ្ជាប់នឹងការងារក្នុងក្លិបលោក Florentino Perez គឺ Mauricio Pochettino ដែលកំពុងបង្វឹក Paris St Germain, លោក Raul ដែលកំពុងបង្វឹកក្រុមយុវជនរបស់ Real Madrid និងអតីតខ្សែបម្រើរបស់ពួកគេ Xabi Alonso ដែលកំពុងបង្វឹកក្រុម B របស់ Real Sociedad។
El Larguero រាយការណ៍ថាឥឡូវនេះ គ្រូបង្វឹកជោគជ័យបំផុតមួយរូបរបស់អ៊ីតាលី លោក Ancelotti ជាជម្រើសមួយទៀតដែលលោក Perez ចាប់ផ្ដើមទាក់ទងជាបណ្ដើរៗ។
លោក Ancelotti បានដឹកនាំក្រុម Real Madrid បន្តពីលោក Jose Mourinho ពីឆ្នាំ២០១៣ដល់២០១៥ ហើយបាននាំក្រុមអធិរាជសឈ្នះ Champions League 2014, ឈ្នះ Copa del Rey, Supercopa de Espana និង FIFA Club World Cup ផងដែរ។
គ្រូបង្វឹកវ័យ៦១ឆ្នាំរូបនេះក៏បានឈ្នះពានសំខាន់ៗជាច្រើនកាលដឹកនាំក្រុម Juventus, AC Milan, Chelsea, Paris St Germain និង Bayern Munich៕
