Manchester United បានទាក់ទងលោក Ernesto Valverde អតីតអ្នកចាត់ការ Barcelona ដើម្បីជជែកអំពីតួនាទីអ្នកចាត់ការស្ដីទីនៅក្លិបបិសាចក្រហមជំនួសលោក Ole Gunnar Solskjaer ត្រឹមចប់រដូវកាល២០២១-២២។
នាខណៈនេះ លោក Michael Carrick កំពុងដឹកនាំក្រុមធំ Man Utd បណ្ដោះអាសន្នបន្តពីលោក Ole Gunnar Solskjaer ដែលត្រូវបានក្លិបបញ្ចប់កិច្ចសន្យាក្រោយជួបលទ្ធផលអាក្រក់ជាបន្តបន្ទាប់។ Man Utd បានបញ្ជាក់ថាក្លិបនឹងតែងតាំងអ្នកចាត់ការស្ដីទីដើម្បីដឹកនាំក្រុមជាបណ្ដោះអាសន្នដល់ចប់រដូវកាល មុនពេលតែងតាំងអ្នកចាត់ការពេញសិទ្ធិក្នុងរដូវក្ដៅ។
លោក Valverde វ័យ៥៧ឆ្នាំ ជាបេក្ខជនមានសក្ដានុពលម្នាក់ក្នុងចំណោមបេក្ខជនមួយចំនួនដែល Man Utd ចង់តែងតាំងជាអ្នកចាត់ការបណ្ដោះអាសន្ន មុនពេលតែងតាំងអ្នកចាត់ការអចិន្ត្រៃយ៍នៅក្នុងរដូវក្ដៅខាងមុខ។
អតីតខ្សែប្រយុទ្ធជម្រើសជាតិអេស្ប៉ាញដើមទសវត្សរ៍១៩៩០រូបនេះ ជាគ្រូបង្វឹកមានបទពិសោធជោគជ័យមួយរូប។
ជាក់ស្ដែង លោក Valverde បានដឹកនាំ Barcelona ឈ្នះជើងឯក La Liga ២លើកជាប់គ្នាក្នុងរដូវកាល២០១៧-១៨ និង២០១«៨-១៩ ព្រមទាំងឈ្នះពាន Copa del Rey ២០១៧-១៨ផងដែរ មុនត្រូវបានបណ្ដេញពីតួនាទីក្នុងខែមករាឆ្នាំ២០២០ បន្ទាប់ពីកាន់តំណែងបាន៣ឆ្នាំ។
បុរសជនជាតិអេស្ប៉ាញរូបនេះក៏បានដឹកនាំ Olympiacos ឈ្នះជើងឯក Super League Greece ៣ដង (២០០៨-០៩, ២០១០-១១, ២០១១-១២), Greek Cup ២ដង (២០០៨-០៩, ២០១១-១២), ដឹកនាំ Atheltic Bilbao ឈ្នះ Supercopa de Espana 2015 និងដឹកនាំ Espanyol រងជើងឯក UEFA Cup 2006-07 ផងដែរ។ លោកមិនធ្លាប់ធ្វើការក្នុងបាល់ទាត់អង់គ្លេសទេ ប៉ុន្តែគ្រូបង្វឹកដែលធ្លាប់ដឹកនាំ Villarreal និង Valencia ផងដែរនោះ ចេះនិយាយភាសាអង់គ្លេស។
ក្លិបបិសាចក្រហមគិតថាការតែងតាំងលោក Mauricio Pochettino ភ្លាមៗក្នុងដំណាក់កាលនេះប្រហែលមិនសូវចាំបាច់ពេកដូចការលើកឡើងមួយចំនួនឡើយ។
ហើយម្យ៉ាងទៀត លោក Pochettino ដែលនឹងដឹកនាំ Paris St Germain ប្រកួត Champions League ក្នុងទីក្រុង Manchester នៅទឹកដី Man City យប់ថ្ងៃពុធនេះ និយាយថាលោកកិច្ចសន្យារបស់លោកជាមួយ PSG មានសុពលភាពដល់ឆ្នាំ២០២៣។ លោក«សប្បាយចិត្តណាស់នៅ PSG»និងថាអ្វីដែលក្លិបដទៃកំពុងធ្វើមិនមែនជាកិច្ចការរបស់លោកឡើយ។ លោកជាអតីតកីឡាករ PSG, លោកស្រឡាញ់ក្លិបនិងស្រឡាញ់អ្នកគាំទ្រក្លិបនេះ។ លោកផ្ដោត១០០%លើការងារនៅ PSG ដែលកំពុងប្រកួតប្រជែងយកពាន Ligue 1 និង Champions League។ លោកមិននិយាយអ្វីផ្សេងពីនេះឡើយ ព្រោះខ្លាចមានកំហុស។ លោករំឭកថាកាលលោកនៅ Espanyol លោកបាននិយាយថាក្ដីស្រមៃរបស់លោកគឺចង់ជួប Sir Alex Ferguson។ ប៉ុន្តែពេលនេះលោកមិននិយាយអ្វីឡើយព្រោះវានឹងត្រូវបានគេយល់ច្រឡំហើយខុសបរិបទ៕
