ការប្រកួតបាល់ទាត់ក្នុងលីគធំៗរបស់អឺរ៉ុបក្នុងខែធ្នូឆ្នាំ២០២១នេះ មានលីគខ្លះបន្តដំណើរការធម្មតាដោយមានទស្សនិកជនពេញៗស្តាត, លីគខ្លះដំណើរការដែរតែលេងបិទទ្វារ ខណៈលីគខ្លះបានផ្អាកការប្រកួតជាច្រើនគូដោយសារការផ្ទុះការចម្លងជំងឺកូវីដ១៩ក្នុងក្លិប ព្រោះតែកីឡាករមិនទាន់បានចាក់វ៉ាក់សាំងគ្រប់គ្រាន់។ តើប្រិយមិត្តដឹងទេថាលីគធំៗរបស់អឺរ៉ុបមកទល់ពេលនេះមានកីឡាករប៉ុន្មានភាគរយបានចាក់វ៉ាក់សាំង ហើយមូលហេតុអ្វីខ្លះដែលនាំឱ្យកីឡាករមួយចំនួនមិនព្រមចាក់វ៉ាក់សាំង?
របាយការណ៍ចេញផ្សាយថ្ងៃចន្ទទី២០ខែធ្នូឆ្នាំ២០២១ កីឡាករបាល់ទាត់ដែលលេងក្នុងក្របខណ្ឌ Premier League មាន៩២%ដេលបានចាក់វ៉ាក់សាំងយ៉ាងហោច១ដូស ប៉ុន្តែអ្នកដែលចាក់បាន២ដូសមានតែ៧៧%ប៉ុណ្ណោះ។
ហើយបើតាមក្រសួងសុខាភិបាលអង់គ្លេស អត្រាអ្នកចាក់វ៉ាក់សាំង១ដូសក្នុងប្រទេសអង់គ្លេសមានចំនួន៧៨,៥%សម្រាប់ប្រជាជនអាយុចន្លោះពី២៥ដល់២៩ឆ្នាំ។ កីឡាករបាល់ទាត់ដែលលេងក្នុងក្របខណ្ឌ Premier League មានអាយុគិតជាមធ្យម២៦,៩ឆ្នាំ។
ក្មេងៗដែលមានអាយុ១២ឆ្នាំឡើង ចំនួន៨៩%នៅទូទាំងចក្រភពអង់គ្លេសបានចាក់វ៉ាក់សាំងដូសទី១, ៨២%បានចាក់ដូសទី២ និង៤៤%បានចាក់ដល់ដូសជំរុញ។
វិធានសុខាភិបាលរបស់រាជរដ្ឋាភិបាលអង់គ្លេសតម្រូវឱ្យដាក់ខ្លួនដោយឡែករយៈពេល១០ថ្ងៃសម្រាប់អ្នកមិនចាក់វ៉ាក់សាំងដែលបានប៉ះពាល់ជាមួយអ្នកវិជ្ជមានកូវីដ១៩។
នៅក្នុងលីគធំៗអឺរ៉ុប Serie A របស់អ៊ីតាលី មានកីឡាករ៩៨%បានចាក់វ៉ាក់សាំង២ដូស។ កាលពីដើមខែធ្នូនេះ ខ្សែការពារ Giorgio Chiellini បានបង្ហោះលើបណ្ដាញសង្គមជំរុញឱ្យអ្នក follow គេទាំងអស់នាំគ្នាទៅចាក់ដូសជំរុញបន្ថែមទៀត។
នៅ Ligue 1 របស់បារាំង កីឡាករចំនួន៩៥%បានចាក់វ៉ាក់សាំង២ដូស ហើយមានករណីវិជ្ជមានកូវីដ១៩តិចតួចណាស់ក្នុងលីគកំពូលបារាំង។
នៅ Bundesliga របស់អាល្លឺម៉ង់ កីឡាករចំនួន៩៤%បានចាក់វ៉ាក់សាំង២ដូស។ ខ្សែបម្រើការពារ Joshua Kimmich របស់ Bayern Munich បានឆ្លងកូវីដ១៩ក្នុងខែវិច្ឆិកា ហើយគេបាននិយាយថាគេស្ដាយក្រោយចំពោះការស្ទាក់ស្ទើរមិនហ៊ានចាក់វ៉ាក់សាំង ប៉ុន្តែឥឡូវនេះគេសម្រេចចិត្តចាក់ហើយ។
នៅ La Liga របស់អេស្ប៉ាញ កីឡាករជាង៩០%បានចាក់វ៉ាក់សាំង២ដូស ហើយកីឡដ្ឋាននីមួយៗនៅតែបន្តអនុញ្ញាតឱ្យទស្សនិកជនចូលទស្សនាផ្ទាល់ពេញៗ។
ថ្ងៃចន្ទម្សិលមិញនេះ កីឡាករនិងបុគ្គលិកចំនួន៩០នាក់ក្នុងក្របខណ្ឌ Premier League បានតេស្តវិជ្ជមានកូវីដ១៩ ដែល ជាតួលេខខ្ពស់បំផុតក្នុងរយៈពេល១សប្ដាហ៍ចុងក្រោយ។
នៅក្នុងលីគទី២ ទី៣ និងទី៤ អង់គ្លេស ដែលស្ថិតក្រោមស្ថាប័នឈ្មោះថា English Football League វិញ មានកីឡាករចំនួន២៥%និយាយថាពួកគេមិនចង់ចាក់វ៉ាក់សាំងទេ។
មនុស្សមួយចំនួនដែលមិនចង់ចាក់វ៉ាក់សាំងនិយាយថាដោយសារពួកគេខ្វះទំនុកចិត្តលើវ៉ាក់សាំង, ខ្លះថាបារម្ភអំពីការជះឥទ្ធិពលរបស់វ៉ាក់សាំងដល់រាងកាយរបស់ពួកគេនៅពេលខាងមុខ និងខ្លះទៀតថាដោយសារខ្លាចម្ជុល។ មួយចំនួនតូចផ្សេងទៀតមិនហ៊ានចាក់វ៉ាក់សាំងដោយសារពួកគេទទួលបានព័ត៌មានមិនពិត និងការភូតភរផ្សេងៗនៅលើអ៊ិនធឺណិតនិងប្រព័ន្ធផ្សព្វផ្សាយសង្គម។ នៅលើប្រព័ន្ធផ្សព្វផ្សាយសង្គម មានអ្នកខ្លះបានភ្ជាប់បញ្ហាបេះដូងរបស់កីឡាករ Christian Eriksen, Sergio Aguero និង Charlie Wyke ថាដោយសារផលប៉ះពាល់នៃវ៉ាក់សាំងកូវីដ១៩។
អ្នកចាត់ការក្លិបនានា រួមទាំងនាយកប្រតិបត្តិ Premier League បានជំរុញឱ្យកីឡាករទាំងអស់ចាក់វ៉ាក់សាំង និងកុំជឿតាមព័ត៌មានក្លែងក្លាយ។
ជាក់ស្ដែង នាយកប្រតិបត្តិ Premier League លោក Richard Masters បានប្រាប់ដល់ក្លិបទាំងអស់ក្នុងលីគសូមជំរុញកីឡាករឱ្យចាក់វ៉ាក់សាំងឱ្យបានគ្រប់ៗគ្នា។
លោក Jurgen Klopp អ្នកចាត់ការ Liverpool បាននិយាយប្រកបដោយក្ដីស្រលាញ់ថា «សូមជឿជាក់លើអ្នកជំនាញ, សូមស្ដាប់អ្នកជំនាញ កុំស្ដាប់អ្នកនិយាយកុហក និងកុំជឿព័ត៌មានក្លែងក្លាយ។ នៅពេលអ្នកស្ដាប់អ្នកជំនាញ អ្នកនឹងយល់ព្រមចាក់វ៉ាក់សាំងនិងដូសជំរុញ»។
លោក Pep Guardiola អ្នកចាត់ការ Manchester City និយាយថា «ខ្ញុំគិតថាវេជ្ជបណ្ឌិត ក្រសួងសុខាភិបាល អាចធ្វើវាបាន ដូច្នេះកីឡាករត្រូវដឹងថាការចាក់វ៉ាក់សាំងគឺដើម្បីការពារពួកគេ ការពារគ្រួសាររបស់ពួកគេ និងការពារមនុស្សទាំងអស់នៅក្នុងសង្គម»។
អ្នកចាត់ការ Arsenal លោក Mikel Arteta ដែលធ្លាប់បានឆ្លងជំងឺកូវីដ១៩ផងនោះ បានជំរុញឱ្យកីឡាកររបស់លោកចាក់វ៉ាក់សាំង។ លោកនិយាយថា «វេជ្ជបណ្ឌិតបានធ្វើការយ៉ាងល្អក្នុងការព្យាយាមពន្យល់គ្រប់គ្នាអំពីវ៉ាក់សាំង ព្រោះមានអ្នកគិតអីចេះគិតអីចុះចំពោះវ៉ាក់សាំង។ ពួកយើងត្រូវព្យាយាមអប់រំពួកគេដើម្បីជំរុញពួកគេឱ្យធ្វើការសម្រេចចិត្ត។ ប៉ុន្តែរឿងចម្បងគឺពួកគេត្រូវជឿជាក់លើវ់ាក់សាំង»។
លោក Antonio Conte អ្នកចាត់ការ Tottenham និយាយថាលោកជំរុញឱ្យកីឡាករទាំងអស់ចាក់វ៉ាក់សាំង តែលោកមិនបង្ខំពួកគេទេ។ លោកនិយាយថា «និយាយស្មោះត្រង់ នេះជាបញ្ហាផ្ទាល់ខ្លួនរបស់ម្នាក់ៗចំពោះវ៉ាក់សាំង។ ខ្ញុំបានចាក់វ៉ាក់សាំងរួចហើយ ហើយគ្រួសារខ្ញុំ កូនស្រីខ្ញុំ និងភរិយាខ្ញុំ បានចាក់វ៉ាក់សាំងរួចដូចគ្នា។ ខ្ញុំចង់ឱ្យអ្នកដទៃធ្វើបែបនេះដែរ ប៉ុន្តែមនុស្សម្នាក់ៗត្រូវការធ្វើការសម្រេចចិត្តល្អបំផុតសម្រាប់ពួកគេផ្ទាល់»។
រីឯ ខ្សែបម្រើជម្រើសជាតិអង់គ្លេសវ័យ១៨ឆ្នាំ Jude Bellingham ដែលលេងឱ្យ Borussia Dortmund ក្នុងប្រទេសអាល្លឺម៉ង់ និយាយថាគេបានចាក់វ៉ាក់សាំងប្រឆាំងជំងឺកូវីដ១៩គ្រប់២ដូសនិងថែមទាំងបានចាក់ដូសទី៣ដែលជាដូសជំរុញរួចរាល់ថែមទៀតផង ហើយគេលើកទឹកចិត្តដល់កីឡាករបាល់ទាត់ដទៃទៀតដែលមិនទាន់បានចាក់វ៉ាក់សាំង សូមឱ្យទៅចាក់វ៉ាក់សាំងគ្រប់ដូសរហូតដល់ដូសជំរុញដូចគេអីចឹងដែរ។
Bellingham និយាយថាកីឡាករមានទំនួលខុសត្រូវនៅក្នុងសង្គម។ គេថា «ខ្ញុំបានចាក់វ៉ាក់សាំងគ្រប់២ដូសនិងចាក់ដូសជំរុញថែមទៀតដើម្បីសុវត្ថិភាព។ ខ្ញុំមិនចង់ចម្លងជំងឺដល់គ្រួសាររបស់ខ្ញុំ ហើយក៏មិនចង់ខកខានការប្រកួតរបស់ក្រុមខ្ញុំដែរ។ ខ្ញុំមិនមែនអង្គុយទីនេះដើម្បីនិយាយថាគ្រប់គ្នាត្រូវតែចាក់វ៉ាក់សាំងទេ វាជាជម្រើសផ្ទាល់ខ្លួនរបស់ម្នាក់ៗ។ ពិតណាស់ ខ្ញុំចង់ឱ្យគ្រប់គ្នាមានសុវត្ថិភាព ដូច្នេះខ្ញុំប្រហែលជាផ្ដល់យោបល់ឱ្យពួកគេចាក់វ៉ាក់សាំង»៕
ប្រភព៖ BBC
