“មើលកីឡាបាល់ទាត់ពិតជាជក់ចិត្ត និងបានកែអផ្សុកផង។” នេះបើតាមការអះអាងពីស្ត្រីខ្មែរឥស្លាមវ័យចំណាស់ដែលជាអ្នកភូមិព្រែកល្ពៅ សង្កាត់ដើមមៀន ក្រុងតាខ្មៅ ខេត្តកណ្ដាលដែលបានចូលរួមទស្សនាការប្រកួតបាល់ទាត់ពានរង្វាន់៧មករាប្រចាំខេត្តរបស់ខ្លួននាពេលថ្មីៗនេះ។
អ្នកភូមិព្រែកល្ពៅទាំង២ខាងលើអះអាងថា បានចាប់អារម្មណ៍ទស្សនាកីឡាបាល់ទាត់រាប់សិបឆ្នាំមកហើយ ពោលឲ្យតែមានការប្រកួត ជាពិសេសក្នុងភូមិរបស់ខ្លួន តែងតែចូលរួមមិនសូវខកខានឡើយ ដើម្បីលើកទឹកចិត្តក្រុមផង និងបានទស្សនាកម្សាន្ដផង។
អ្នកស្រី អ៊ែល អៃសាស់ និងអ្នកស្រី សុះ អៃសាស់ អះអាងថា ដរាបណាសុខភាពនៅតែអំណោយផល អ្នកទាំងពីរនៅតែបន្តទៅទស្សនាការប្រកួតបាល់ទាត់ដោយផ្ទាល់នៅទីលាន ក៏ដូចជាលើកទឹកចិត្តដល់ក្រុមបាល់ទាត់ក្នុងភូមិរបស់អ្នកស្រី ឲ្យពួកគេមានកម្លាំងចិត្តបន្តការប្រកួតប្រជែងស្វែងរកជ័យជម្នះជាបន្តបន្ទាប់។
គួរដឹងដែរថា ការប្រកួតបាល់ទាត់ពានរង្វាន់៧មករានៅខេត្តកណ្ដាលកន្លងទៅថ្មីៗនេះពិតជាទទួលបានការគាំទ្រច្រើនពីប្រជាពលរដ្ឋក្នុងខេត្តទាំងក្មេង និងចាស់ ទាំងអ្នកធ្វើការ និងសិស្សានុសិស្ស៕
