Burnley បានបញ្ចប់ការរង់ចាំជ័យជម្នះក្នុង Premier League រដូវកាល២០២០-២១នេះ នៅពេលខ្សែប្រយុទ្ធជម្រើសជាតិនូវែលហ្សេឡង់ Chris Wood រកបានគ្រាប់តែមួយគត់ជួយពួកគេឈ្នះ១-០លើ Crystal Palace យប់ថ្ងៃចន្ទទី២៣ខែវិច្ឆិកា ដែលជាជ័យជម្នះលើកដំបូងសម្រាប់ក្រុមលោក Sean Dyche ក្នុងលីគរដូវកាលថ្មីនេះ។
Burnley បានជួបភាពមិនស្គាល់ជ័យជម្នះ៧ប្រកួតដំបូងជាប់ៗគ្នា ដោយចាញ់៥ដង ស្មើ២ដង ដែលជាការចាប់ផ្ដើមរដូវកាលយ៉ាងអន់បំផុតរួមក្នុងប្រវត្តិសាស្ត្រក្លិប។
លើសពីនេះ ពួកគេក៏ជាក្រុមតែ១គត់ក្នុង Premier League រដូវកាលនេះដែលមិនទាន់មានគ្រាប់បាល់ពេលលេងក្នុងផ្ទះ មុនពេល Wood រកបានគ្រាប់៣ពិន្ទុយប់មិញក្នុងនាទីទី៨។ ជ័យជម្នះលើ Palace ដែលអវត្តមាន Wilfried Zaha ដោយសារឆ្លងកូវីដ១៩នេះបាននាំ Burnley ឡើងផុតតំបន់ក្រហម មកឈរលេខរៀងទី១៧ក្នុងតារាង មាន៥ពិន្ទុ នៅលើក្រុមលេខ១៨ Fulham ចំនួន១ពិន្ទុ។
សូមជម្រាបផងដែរថា តាំងពីចូលលេងក្នុង Premier League លើកដំបូងសម្រាប់ Burnley កាលពីថ្ងៃទី២៧ខែសីហាឆ្នាំ២០១៧ ក្រោយផ្ទេរពី Leeds United មក Wood វ័យ២៨ឆ្នាំ មកទល់ពេលនេះរកបាន៣៦គ្រាប់ក្នុងលីគកំពូលអង់គ្លេស គឺច្រើនជាងកីឡាករ Burnley ដទៃទៀតយ៉ាងហោច៩គ្រាប់។
ដោយឡែក Southampton ខកខានឱកាសឡើងទៅលេខ៣ ក្រោយស្មើ១-១នៅផ្ទះ Wolverhampton Wanderers។ Theo Walcott បានរកគ្រាប់បាល់នាំមុខក្នុងនាទី៥៨សម្រាប់ក្រុមភ្ញៀវ តែនៅនាទី៧៥ Pedro Neto តាមស្មើឱ្យ Wolves។ ឥឡូវ Southampton ឈរលេខរៀងទី៥ ខណៈ Wolves លេខ៩៕
