ការចាប់ឆ្នោតវគ្គចែកពូល AFC Cup 2021 បានធ្វើនៅថ្ងៃពុធទី២៧ខែមករាឆ្នាំ២០២១នេះ ដោយក្នុងនោះក្រុមជើងឯកលីគកំពូលកម្ពុជា បឹងកេត ត្រូវបានចាប់ចំពូល G ជាមួយ Hanoi FC របស់វៀតណាម, Bali United របស់ឥណ្ឌូនេស៊ី និងក្រុមឈ្នះ play-off 1។ វគ្គចែកពូលប្រចាំតំបន់អាស៊ាននឹងធ្វើពីថ្ងៃទី២២ដល់ថ្ងៃទី២៨ខែមិថុនា នៅទឹកដីកណ្ដាល ដែលនឹងត្រូវបានកំណត់ក្នុងពេលបន្ទាប់។
សូមជម្រាបថា Bali United ជាជើងឯកលីគកំពូលឥណ្ឌូនេស៊ីឆ្នាំ២០១៩ (រដូវកាល២០២០ត្រូវបានលុបចោលដោយសារកូវីដ១៩)។ ចំណែក Hanoi FC ជាជើងឯក Vietnamese Cup 2020 និងរងជើងឯកលីគកំពូលវៀតណាម២០២០។ ពួកគេធ្លាប់ឡើងដល់វគ្គពាក់កណ្ដាលផ្ដាច់ព្រ័ត្រ AFC Cup 2019 ព្រមទាំងធ្លាប់លេងពាន AFC Champions League វគ្គជម្រុះ២០១៤, ២០១៥, ២០១៦, ២០១៧ និង២០១៩ ក្នុងនាមជាជើងឯកលីគកំពូលវៀតណាមផងដែរ។ Hanoi FC នេះធ្លាប់លត់ក្រុមជើងឯកកម្ពុជា២០១៨ ណាហ្គាវើលដ៍ ដល់ទៅ១០-០ក្នុងវគ្គចែកពូល AFC Cup 2019 នៅទឹកដីពួកគេ និងស៊ី ណាហ្គាវើលដ៍ ៥-១ ទៀតនៅភ្នំពេញ។
រីឯក្រុមដែលត្រូវប្រកួត play-off 1 ដើម្បីដណ្ដើមកៅអីចូលពូល G ជាមួយ បឹងកេត គឺ Hanthawady United របស់មីយ៉ាន់ម៉ា ដែលកំពុងរង់ចាំអ្នកឈ្នះវគ្គជម្រុះបឋមរវាង Lao Toyota របស់ឡាវ និង Kasuka របស់ប្រ៊ុយណេ។
