ភ្នំពេញ៖ កីឡាការិនីកូនកាត់កម្ពុជា-ម៉ិចស៊ិក អាមេរិក ខាន់ ចេសា ឈ្នះខ្សែក្រវ៉ាត់ Who Number One នឹងឡើងទៅកាន់សង្វៀន Evolve Ur Game ដោយត្រូវប្រកួតជាមួយកីឡាការិនីមកពីប្រទេសប្រេស៊ីល Thamires Aquino។ ហើយនេះជាការប្រកួត Superfight ដែលធ្វើនៅទីក្រុងឡាវ៉េហ្គាស់ រដ្ឋណេវ៉េដា សហរដ្ឋអាមេរិក ថ្ងៃទី០៣ ខែមេសា ឆ្នាំ២០២១។
នេះជាការបង្ហាញខ្លួនជាថ្មីម្តងទៀតរបស់ ចេសា បន្ទាប់ពីឈ្នះកីឡាការិនី Danielle Kelly ក្នុងកម្មវិធី Who Number One នៅតិចសាស កាលពីពេលថ្មីៗកន្លងទៅនេះ។ ដោយមានឪពុកជាកូនកាត់កម្ពុជា-អាមេរិក និងម្តាយកូនកាត់ម៉ិស៊ិក-អាមេរិក ខាន់ ចេសា ត្រូវបានគេចាត់ទុកជាកីឡាការិនីជូជីតសូល្អបំផុតក្នុងពិភពលោក ដោយឈ្នះជើងឯកពិភពលោក ៣ដង, ជើងឯកទ្វីបអាមេរិក ៤ដង, ជើងឯកពិភពលោក NoGi ៣ដង និងជើងឯកអឺរ៉ុប ២ដង។ នៅឆ្នាំ២០១៨ និង២០១៩ កីឡាការិនីរូបនេះប្រកួតតំណាងកម្ពុជា ហើយដណ្តើមបានមេដាយមាសកីឡាអាស៊ីនៅឥណ្ឌូនេស៊ី និងកីឡាអាស៊ីអាគ្នេយ៍នៅហ្វីលីពីន៕
