Skip to content
សង្វៀនលុម្ពិនីត្រូវបានធ្វើកំណែទម្រង់ថ្មីដើម្បីទប់ស្កាត់ការភ្នាល់របស់ជនជាតិថៃ
    ទំព័រដើម  »  កីឡាជាតិ

សង្វៀនលុម្ពិនីត្រូវបានធ្វើកំណែទម្រង់ថ្មីដើម្បីទប់ស្កាត់ការភ្នាល់របស់ជនជាតិថៃ

កង​យោធពល​ភូមិន្ទ​ថៃ​បាន​ប្រកាស​ចុង​សប្ដាហ៍​មុន​ថា​សង្វៀន​ប្រដាល់​លុម្ពិនី​នឹង​លក់​សំបុត្រ​សម្រាប់​តែ​ជន​បរទេស​ប៉ុណ្ណោះ​ដើម្បី​ទប់ស្កាត់​សកម្មភាព​ភ្នាល់​របស់​ជនជាតិ​ថៃ​នៅ​​​ក្នុង​​សង្វៀន​ដ៏​ល្បីល្បាញ​របស់​ថៃ​មួយ​នេះ​។

មេទ័ព​ថៃ នាយ​ឧត្ដមសេនីយ៍ Narongphan Jitkaewtae បាន​និយាយ​ថា​ការ​លក់​សំបុត្រ​សម្រាប់​តែ​ជន​បរទេស​​នៅ​ក្រោយ​​ពេល​វិបត្តិ​កូវីដ​១៩​រលត់​ទៅនោះ​គឺ​ដើម្បី​​ជួយ​ជំរុញ​កំណើន​ទេសចរណ៍​បរទេស​មក​កាន់​ប្រទេស​ថៃ​និង​ក៏​ដើម្បី​លើក​ទឹក​ចិត្ត​ឱ្យ​ទេសចរណ៍​បរទេស​ស្វែង​យល់​អំពី​ប្រដាល់​ថៃ​ផង​ដែរ​។

នាយ​ឧត្ដមសេនីយ៍​ដដែល​បន្ត​ថា​ទង្វើ​នេះ​ជា​ផ្នែក​មួយ​នៃ​​​ការ​ព្យាយាម​របស់​កង​ទ័ព​ក្នុង​ការ​ផ្លាស់ប្ដូរ​កេរ្តិ៍ឈ្មោះ​​ឡើង​វិញ​ចំពោះ​សង្វៀន​ចំណាស់​៦៤​ឆ្នាំ​​ខាង​លើ​ដែល​​ល្បី​ឈ្មោះ​ខាង​​ការ​ភ្នាល់​ស៊ីសង​ជា​យូរ​មក​ហើយ​។

តាម​លោក Narongphan ដដែល ការ​លក់​សំបុត្រ​សម្រាប់​តែ​ជន​បរទេស​នោះ​នឹង​បញ្ចប់​​សកម្មភាព​ភ្នាល់​នៅជាប់​​សង្វៀន​។

ឈ្មោះ​សង្វៀន​នេះ​ក៏​ត្រូវ​បាន​ប្ដូរ​ផង​ដែរ​ទៅ​ជា មជ្ឈមណ្ឌល​កីឡា​កង​យោធពល​ភូមិន្ទ​ថៃ (Royal Thai Army Sports Centre)។

សកម្មភាព​ប្រកួត​ដទៃ​ទៀត​ដែល​ធ្វើ​នៅ​មជ្ឈមណ្ឌល​នេះ​ក៏​នឹង​បើក​ឱ្យ​បាន​ឃើញ​ដល់​​សាធារណជន​​ទូទៅ​ផង​ដែរ មិនមែន​សម្រាប់​តែ​ទាហាន​ប៉ុណ្ណោះ​ទេ​។

លើស​ពីនេះ ​លោក Narongphan បាន​និយាយ​ថា​កង​យោធពល​ភូមិន្ទ​ថៃ​​គ្រោង​ផ្លាស់​ប្ដូរ​របៀប​របប​គ្រប់គ្រង​​សង្វៀន​ប្រដាល់​ខាង​លើ​ដោយ​រៀប​ចំ​គណកម្មការ​គ្រប់គ្រង​ថ្មី​ដែល​មាន​ចំណេះ​ដឹង​និង​ជំនាញ​ក្នុង​ការ​គ្រប់គ្រង​កីឡដ្ឋាន ពោល​គឺ​មិនមែន​ជា​សមាជិក​មក​ពី​នាយកដ្ឋាន​ឧបត្ថម្ភធន​កងទ័ព​​ទៀត​ឡើយ​។

សូម​ជម្រាប​ថា សង្វៀន​​ប្រដាល់​លុម្ពិនី​ត្រូវ​បាន​បង្កើត​ឡើង​ដោយ​សេនា​ប្រមុខ Praphas Charusathien កាល​ពី​៦៤​ឆ្នាំ​មុន ដោយ​ដាក់​ក្រោមការ​គ្រប់គ្រង​របស់​នាយកដ្ឋាន​ឧបត្ថម្ភធន​កង​ទ័ព​ ហើយ​ចំណូល​បាន​ពី​ការ​ប្រកួត​ត្រូវ​បាន​ផ្ដល់​ជូន​កង​យោធពល​ភូមិន្ទ​ថៃ​​។ ក្រុមប្រឹក្សា​ភិបាល​បច្ចុប្បន្ន​​របស់​សង្វៀន​នេះ​សុទ្ធ​តែ​ជា​ទាហាន​៕