Skip to content
ប្រធានរៀបចំពិធីបើកនិងពិធីបិទតូក្យូអូឡាំពិកលាលែងពីតំណែងក្រោយប្រើសម្ដីលើសលស់លើតារាកំប្លែងស្រីម្នាក់
    ទំព័រដើម  »  កីឡាជាតិ

ប្រធានរៀបចំពិធីបើកនិងពិធីបិទតូក្យូអូឡាំពិកលាលែងពីតំណែងក្រោយប្រើសម្ដីលើសលស់លើតារាកំប្លែងស្រីម្នាក់

នាយក​ផ្នែក​រៀប​ចំ​ពិធី​​នៃ​ព្រឹត្តិការណ៍​តូក្យូ​អូឡាំពិក​ដាក់​ពាក្យ​លាលែង​ពី​តំណែង បន្ទាប់​ពី​លោក​​បាន​ប្រើ​សម្ដី​ខ្វះ​ការ​គោរព​ចំពោះ​អ្នក​កំប្លែង​ស្រី​ម្នាក់​របស់​ជប៉ុន។

លោក Hiroshi Sasaki បាន​ប្រកាស​ពី​ការ​សម្រេច​ចិត្ត​របស់​លោក បន្ទាប់​ពី​មាន​សេចក្ដី​រាយការណ៍​មួយ​កាល​ថ្ងៃ​ពុធ​ម្សិលមិញ​ដែល​ទម្លាយ​ថា​លោក​បាន​ស្នើ​ឱ្យ​អ្នក​កំប្លែង​មាឌ​​ធាត់​ល្បី​ឈ្មោះ​ Naomi Watanabe តែង​ខ្លួន​ជា​សត្វ​ជ្រូក​នៅ​ក្នុង​ពិធី​បើក​តូក្យូ​អូឡាំពិក​។

លោក Hiroshi ​បាន​និយាយ​ក្នុង​សេចក្ដី​ថ្លែងការណ៍​របស់​លោក​ថ្ងៃ​ព្រហស្បតិ៍​នេះ​ថា​៖ «គំនិត​របស់​ខ្ញុំ​គឺ​ជា​ការ​ប្រមាថ​យ៉ាង​ធំ​ចំពោះ​អ្នក​ស្រី Naomi Watanabe​។ អ្វីដែល​បាន​និយាយ​ហួស​ទៅ​ហើយ​នោះ​មិន​អាច​​យកមក​វិញ​បាន​ទេ​។ ខ្ញុំ​សោកស្ដាយ​​អស់​ពី​​បេះដូង​​ហើយ​ខ្ញុំ​សូម​ទោស​យ៉ាង​ជ្រាលជ្រៅ​ចំពោះ​គាត់​និង​គ្រប់គ្នា​ដែល​រង​ការ​ប៉ះពាល់​អារម្មណ៍​ដោយសារ​តែ​សម្ដី​នេះ»។

លោក Sasaki ​បាន​និយាយ​ទៅ​កាន់​ប្រធាន​ព្រឹត្តិការណ៍​តូក្យូអូឡាំពិក អ្នក​ស្រី Seiko Hashimoto រួច​ហើយ​អំពី​ការ​សុំ​លាលែង​ពី​តំណែង​នេះ​។

សូម​រំឭក​ថា លោក Sasaki ត្រូវ​បាន​តែងតាំង​ជា​នាយក​ផ្នែក​ច្នៃប្រតិដ្ឋ​សម្រាប់​ពិធី​បើក​និង​បិទ​ព្រឹត្តិការណ៍​តូក្យូ​អូឡាំពិក​២០២០ និង​ប៉ារ៉ាឡាំពិក​ កាល​ពី​ខែ​ធ្នូ​ឆ្នាំ​មុន​។

ការ​លាលែង​របស់​លោក Sasaki នេះ​​កើត​ឡើង​មិន​យូរ​ប៉ុន្មាន​ក្រោយ​អតីត​ប្រធាន​តូក្យូអូឡាំពិក លោក Yoshiro Mori បាន​ចុះចេញ​ពី​តួនាទី​ បន្ទាប់​ពី​និយាយ​ថា​«ស្ត្រី​និយាយ​ច្រើន​ពេក​»ក្នុ​ងអង្គ​ប្រជុំ​៕