ក្នុងសន្និសីទសារព័ត៌មានមុនការប្រកួតជើងទី១វគ្គ១/២ UCL រវាង Paris St Germain ទល់នឹង Manchester City ម៉ោង២យប់ថ្ងៃពុធទី២៨ខែមេសានេះ Neymar អះអាងថាគេរីករាយណាស់នៅ PSG ស្របពេលមានពាក្យអេចអូចជាច្រើនជុំវិញអនាគតរបស់តារាឆ្នើមប្រេស៊ីលរូបនេះ។
ខ្សែប្រយុទ្ធវ័យ២៩ឆ្នាំនិយាយថា៖ «ខ្ញុំបាននិយាយពីរឿងនេះម្ដងហើយកាលប្រកួតមុន។ ខ្ញុំសប្បាយចិត្តណាស់នៅប៉ារីស។ ពួកយើងកំពុងជជែកកិច្ចសន្យាថ្មីជាមួយ PSG។ ខ្ញុំមានអារម្មណ៍ល្អ។ ខ្ញុំមានអារម្មណ៍រីករាយ»។
ពានឯកត្តជន Ballon d’Or ត្រូវបានគេនិយាយជាយូរមកហើយថាជាកត្តាចម្បងនៅពីក្រោយការសម្រេចចិត្តរបស់ Neymar ក្នុងការចេញពី Barcelona មក Paris St Germain។
តែ Neymar និយាយថា៖ «ខ្ញុំសប្បាយចិត្តណាស់ចំពោះរដូវកាលដែល PSG កំពុងមាន។ ខ្ញុំមិនខ្វល់ពី Ballon d’Or ទេ, វាមិនមែនជាអ្វីដែលខ្ញុំគិតឡើយ។ ខ្ញុំបានឈប់គិតអំពីវាជាយូរមកហើយ។ ខ្ញុំពិតជាមិនខ្វល់(ពី Ballon d’Or)ទេ។ ខ្ញុំចង់ឈ្នះ Champions League។ នោះជាអ្វីដែលធ្វើឱ្យមានភាពខុសគ្នាក្នុងជីវិតរបស់ខ្ញុំនិងក្នុងអាជីពរបស់ខ្ញុំ។ ពេលខ្ញុំកាន់តែចាស់ ខ្ញុំនឹងក្រឡេកក្រោយដើម្បីមើលថាខ្ញុំបានឈ្នះ Champions League ១ដង ឬ២ដង ឬ៣ដង ឬ៤ដង។ នេះទើបជារឿងសំខាន់បំផុត»។
អតីតយុវជន Santos ដែលបានផ្ទេរពី Barca ទៅ PSG ក្នុងឆ្នាំ២០១៧ក្នុងតម្លៃឯតទគ្គកម្មពិភពលោក២២២លានអឺរ៉ូ បន្តថា៖ «កាលខ្ញុំចូលរួម PSG គោលដៅរបស់ខ្ញុំគឺដើម្បីឈ្នះ Champions League (នៅទីនេះ)។ ពួកយើងបានឡើងដល់ផ្ដាច់ព្រ័ត្រជាលើកដំបូងកក្នុងប្រវត្តិសាស្ត្រក្លិបរដូវកាលមុន ហើយពួកយើងជាក្រុមដែលកំពុងបន្តរីកចម្រើន។ ពួកយើងមានគ្រប់គ្រឿងដើម្បីឈ្នះពាននេះ។ ពួកយើងស្រលាញ់គ្នាជាក្រុមមួយ ខំធ្វើការខ្លាំង ហើយបរិយាកាសគឺអស្ចារ្យ។ PSG ស្ថិតក្នុងចំណោមក្រុមល្អបំផុតក្នុងលោក»។
ពាក់ព័ន្ធនឹងការប្រកួតទល់ Man City នៅ Parc des Princes យប់នេះវិញ Neymar ថានឹងតានតឹង ព្រោះ Man City ជាក្រុមដ៏អស្ចារ្យមួយ។
ចំណែកអ្នកចាត់ការ Man City លោក Pep Guardiola ដែលបង្វឹក Barcelona ពីឆ្នាំ២០០៨ដល់២០១២នោះ បានលើកសរសើរទេពកោសល្យរបស់ Neymar ថាពេលលោកមើលឃ្លីបសកម្មភាពលេងរបស់ Neymar លោកគិតថាគេជាអធិរាជរបស់ក្លិប Santos។ ហើយប្រសិន Neymar នៅជាមួយ Barca មកទល់ពេលនេះ លោកគិតថា Barca មុខជាឈ្នះពាន UCL ២ឬ៣ដងថែមទៀត។ Neymar, Messi និង Suarez ជាដៃគូប្រយុទ្ធល្អបំផុត។ លោកថា Neymar ធ្វើឱ្យបាល់ទាត់រីករាយ។
ទាក់ទងនឹងការប្រកួតនៅផ្ទះ PSG រាត្រីនេះវិញ លោក Pep ថាលោកបានព្យាយាមគេឱ្យលក់ស្រួលយប់មិញ ហើយលោកគេងលក់ស្រួលនៅពេលមិនគិតអំពីកីឡាកររបស់ PSG។ លោកថាពួកគេជាកីឡាករលំដាប់កំពូលៗដ៏មានគុណភាពអស្ចារ្យ។ លោកថា Man City រួចរាល់ដើម្បីព្យាយាមបិទពួកគេ ដោយការពារជាក្រុម, លេងឱ្យល្អ និងព្យាយាមរកគ្រាប់បាល់៕
