ការប្រកួតប្រដាល់ដណ្ដើមជើងឯកទម្ងន់ធ្ងន់ពិភពលោករវាងកំពូលកីឡាករអង់គ្លេសទាំងទ្វេ Anthony Joshua និង Tyson Fury នឹងធ្វើនៅក្នុងប្រទេសអារ៉ាប៊ីសាអ៊ូឌីត។
ចំពោះទីតាំងជាក់លាក់និងកាលបរិច្ឆេទប្រកួតនៅមិនទាន់ត្រូវបានបញ្ជាក់នៅឡើយទេ។
លោក Eddie Hearn ដែលជាប្រូម៉ូទ័ររបស់ Joshua និយាយប្រាប់ Sky Sports ថាការប្រកួតអាចធ្វើនៅថ្ងៃទី៧ឬ១៤ខែសីហា។
អ្នកឈ្នះរវាង Joshua និង Fury នឹងក្លាយជាជើងឯកទម្ងន់ធ្ងន់ពិភពលោកគ្មានគូប្រៀប ព្រោះជាការប្រកួតដាក់ខ្សែក្រវាត់ទាំងអស់ដែលមាន។
Joshua វ័យ៣១ឆ្នាំ កំពុងកាន់កាប់ខ្សែក្រវាត់ WBA, WBO និង IBF ខណៈ Fury វ័យ៣២ឆ្នាំ កាន់កាប់ខ្សែក្រវាត់ WBC និង The Ring។
Joshua ប្រកួតអាជីព២៥ដង ឈ្នះ២៤ដង ផ្ដួលគូបដិបក្ខសន្លប់២២ដង និងចាញ់១ដង។
Tyson ប្រកួតអាជីព៣១ដង ឈ្នះ៣០ដង ផ្ដួលគូបដិបក្ខសន្លប់២១លើក និងស្មើ១ដង៕
