ភ្នំពេញ៖ខណៈយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥​ដើម្បីគាំទ្រ​ដល់មូលនិធិគន្ធបុប្ផាកម្ពុជាដែលនឹងចាប់ផ្តើមនៅថ្ងៃទី១ ខែមិថុនា ឆ្នាំ​២០២៥ យើងសូមគូសរំលេចពីសកម្មភាពមន្ទីរពេទ្យគន្ធបុប្ផាសៀមរាបបន្តិច។

មន្ទីរពេទ្យគន្ធបុប្ផាសៀមរាបទទួលពិនិត្យផ្ទៃពោះដល់ស្រ្តី ពី ៣០០ ទៅ ៥០០នាក់ និងសម្រាលកូន ពី ៦០ និង ៨០នាក់ ក្នុងមួយថ្ងៃៗ ដោយក្នុង​នោះមាន ១០ និង ១៥ករណី ជាស្រ្តីដែលមានហានិភ័យ ដូចជាកូនខ្សោយ​បញ្ហាលើសសម្ពោធ​ឈាម និងជំងឺបង្រុងក្រឡាភ្លើង ជាដើម។

ចាប់តាំងពីបើកដំណើរការផ្នែកសម្ភពនៅឆ្នាំ២០០១ មក រហូតមកដល់បច្ចុប្បន្ន, មន្ទីរពេទ្យជ័យវរ្ម័នទី៧ ឬមន្ទីរពេទ្យ​គន្ធបុប្ផា​សៀមរាប បានដើរតួយ៉ាងសំខាន់​ក្នុងការជួយសង្រ្គោះម្ដាយ និងទារក។

ការព្យាបាលប្រកបដោយគុណភាព ក្រមសីលធម៌ និងវិជ្ជាជីវៈ បានធ្វើឱ្យមន្ទីរ​ពេទ្យ​នេះ ក្លាយជាមន្ទីរពេទ្យសម្ភព​ឈានមុខ​មួយ ដែលជាទីទុកចិត្ត​បំផុត​សម្រាប់ពលរដ្ឋ ជាពិសេសសម្រាប់ស្រ្តីមានផ្ទៃពោះទាំងអស់នៅកម្ពុជា។

ដើម្បីចូលរួមគាំទ្រ យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥, សូមបរិច្ចាគ​តាមរយៈគណនីរបស់មូលនិធិគន្ធ​បុប្ផា​កម្ពុជា នៅធនាគារអេស៊ីលីដា លេខ ០០០១-០៣៤១២៧៣៨១៣ សម្រាប់ប្រាក់រៀល និង ០០០១-០៣៤១២៧៣៨២៤ សម្រាប់ប្រាក់ដុល្លារអាម៉េរិក ឬតាមរយៈ QR Code ដូចមានក្នុងរូបភាពខាងលើ។

ការបរិច្ចាគរបស់លោកអ្នកពិត ជាមានតម្លៃណាស់ ក្នុងជួយសង្រ្គោះជីវិត ទារក និងកុមារនៅកម្ពុជា៕
ដោយ៖ម៉ាដេប៉ូ