ភ្នំពេញ៖ មន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា ហៅកាត់ថាស៊ីឌីស៊ី( CDC) បានជំរុញឱ្យវិនិយោគិនក្នុងស្រុកងាកទៅវិនិយោគ វិស័យកសិ​-ឧស្សាហកម្ម និងកសិកម្ម ដែលជាវិស័យមានសក្តាពុលខ្លាំងនាពេលបច្ចុប្បន្ន។

នៅក្នុងវេទិកាពិភាក្សាស្ដីអំពីធុរកិច្ចឆ្នាំ២០២៣ កាលពីថ្ងៃទី១១ ខែសីហាចុងសប្ដាហ៍កន្លងទៅ លោក ជា វុទ្ធី អគ្គលេ​ខាធិការរង​គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានលើកឡើងថា នៅក្នុងបញ្ហាប្រឈម តែ​មានកាលា​​នុវត្តភាព។កាលានុវត្តភាពដែលសំខាន់នោះគឺ វិស័យកសិកម្ម និងកសិ-ឧស្សាហកម្ម ដោយវិស័យទាំងពីរនេះ មា​នសក្តានុពលខ្លាំងណាស់ ខណៈដែលកម្ពុជា នៅមានផ្ទៃដីធំទូលាយ ដោយត្រូវខិតខំប្រឹងប្រែងទាំងអស់គ្នា​ដើម្បីធានាថាកា​រផលិតផ្គត់ផ្គង់សម្រាប់តម្រូវការក្នុងស្រុកផង និងសម្រាប់នាំចេញផង។

លោកបានលើកឡើង​ថា កំណើននៃប្រជាជននៅលើពិភពលោក មានការកើនឡើង ខណៈដែលឥណ្ឌាបច្ចុប្បន្ន មានកំ​ណើ​នប្រជាជនលើសចិន​ រហូត​​បានធ្វើឱ្យមានការ​ផ្អាកការនាំចេញអង្ករ ដែលនេះជាកាលានុវត្តសម្រាប់កម្ពុជា ក្នុងការនាំចេ​ញទៅអាមេរិក និងប្រទេសផ្សេងទៀត ដោយវិស័យឯកជនត្រូវពង្រឹងលើការកែច្នៃក្នុងស្រុក។

លោក ជា វុទ្ធី បានបញ្ជាក់ថា ៖ ​«ខ្ញុំមានជំនឿជឿ​ជាក់ថា នៅក្នុងវិស័យកសិកម្មនេះ គឺជាវិស័យមួយដែលមា​នសក្តានុពលណាស់សម្រាប់​កម្ពុជាយើង ហើយ​អ្វីដែលសំខាន់បំផុតគឺធ្វើយ៉ាងណា​បង្កើតបរិយាកាសវិនិយោគប្រក​បដោ​យភាពអំណោយផល»។

លោកបានបញ្ជាក់ទៀត​ថា ៖ «ជាការពិតណាស់ច្បាប់វិនិយោគថ្មី ដែលត្រូវបានប្រកាសឱ្យប្រើ​កាលពីខែតុលា ឆ្នាំ២០២១កន្ល​ងទៅ​ និងអនុក្រឹត្យរបស់រាជរដ្ឋាភិបាលស្តីពីការអនុវត្តច្បាប់វិនិយោគ ដែលបានដាក់ឱ្យប្រើប្រាស់កាលពីខែមិថុនា ឆ្នាំ​២០២៣ កន្លងទៅនេះ ប្រៀបបីដូចជាកង់មុខពីរនិងកង់ក្រោយពីរ ដើម្បីធ្វើឱ្យឡានដំណើរការទៅមុខ»។

លោក​បន្តថា វិបត្តិនៅតែមាន តែគួរប្រើវិបត្តិឱ្យទៅជាកាលានុវត្តភាព និងដំណោះស្រាយ ដោយក្រសួងស្ថាប័នពាក់ព័ន្ធត្រូវសហការគ្នា ជាមួយវិស័យឯកជន ដោយវិស័យឯកជនត្រូវហ៊ានលើកឡើងនូវបញ្ហា ដែលខ្លួនបានជួបប្រទះ ដើម្បីលើកទៅរដ្ឋាភិបាល ដោយមានការសម្របសម្រួលពីស៊ីឌីស៊ី ដើម្បីដោះស្រាយនូវបញ្ហាប្រឈមទាំងអស់នោះ ដោយធ្វើយ៉ាងណាឱ្យបរិយាកាសវិនិយោគទាំងនោះកាន់តែមានភាពអំណោយផល។

ច្បាប់វិនិយោគថ្មី បានផ្តល់នូវការលើកទឹកចិត្តប្រសើរជាងច្បាប់វិនិយោគចាស់ច្រើនណាស់ ជាពិសេសពាក់ព័ន្ធនឹងការទិញចូលនូវធាតុចូលផលិតកម្ម ដើម្បីយកទៅផលិត។

ចំណែក លោក ហ៊ុន ឡាក់ អគ្គលេខាធិការសមាគមឧកញ៉ាកម្ពុជា និងជាវិនិយោគិនក្នុងវិស័យកសិកម្ម និងកសិឧស្សាហក​ម្មនៅកម្ពុជា បានលើកឡើងនូវ​យោបល់បន្ថែមថា អ្នកវិនិយោគក្នុងស្រុក គួរតែគិតគូរវិនិយោគទៅលើអ្វី ដែលជាតម្រូវការទីផ្សា​រ ជាពិសេសផលិតកម្មកែច្នៃ និងការប្រមូលទិញ។

លោក ហ៊ុន ឡាក់ បានបន្ថែមថា វិស័យឯកជន​​គួរតែមានការពិភាក្សាគ្នា ហើយលើកជាសំណើតាមរយៈក្រុមប្រឹក្សាអភិវឌ្ឍន៍​កម្ពុជា ឬក្រសួងពាក់ព័ន្ធដើម្បីធ្វើយ៉ាងណាផ្តល់ការគាំទ្រដល់វិស័យឯកជន ដែលមានបំណងចង់វិនិយោគលើកា​រប្រមូលទិញស្តុកទុកសម្រាប់ផលិត និងកែច្នៃជាបន្តបន្ទាប់ក្រោយពេលរដូវប្រមូលផល។

លោកបានរំលេចថា ៖ «​កម្ពុជាយើងនាំចេញតែផលិតផលវត្ថុធាតុដើម ដោយបានធ្វើឱ្យយើងបាត់នូវផលចំណេ​ញជាច្រើន ក្នុងពេលប្រទេសជិតខាងគាត់ស្រូបយកផលិតផលទាំងនេះទៅកែច្នៃ ហើយដាក់ផ្លាកថាជាផលិតផលរបស់​គេ។ ដូច្នេះការវិនិយោគលើការកែច្នៃនិងប្រមូលទិញមានសារៈសំខាន់ណាស់»។

ទោះជាបែបនេះក្តី លោក ហ៊ុន ឡាក់ បានបង្ហាញពីជំនឿថា នាពេលខាងមុខនេះ នៅតែមានសញ្ញាជាវិជ្ជមានចំពោះការនាំចេ​ញក្នុងវិស័យកសិកម្ម ប៉ុន្តែត្រូវមានការប្រយ័ត្នប្រយែងឱ្យបានខ្ពស់ជាពិសេសការនាំចេញទៅចិន ដោយប្រទេសនេះកំ​ពុ​ងមានបញ្ហាទំនិញចុះថោក លើប្រភេទគ្រឿងឧបភោគបរិភោគ ដោយសារការកាត់បន្ថយចំណាយរបស់ប្រជាជនចិន៕

ដោយ៖វណ្ណ សុជាតា