ភ្នំពេញ៖ នៅក្នុងពិធីជួបសំណេះសំណាលជាមួយកម្មករនិយោជិតនៅតាមបណ្តារោង ចក្រសហគ្រាស ដែលមានមូលដ្ឋាននៅក្នុងស្រុកសំរោងទង ខេត្តកំពង់ស្ពឺ នាព្រឹកថ្ងៃទី០៩ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្តេជ្ញាចិត្តដើម្បីបន្តនៅការអនុវត្តគោលយោបាយគណបក្សប្រជាជនកម្ពុជា យកចិត្តទុកដាក់ជួយប្រជាពលរដ្ឋនៅគ្រប់វិស័យទាំងអស់។

សម្តេចធិបតី ហ៊ុន ម៉ាណែត បានថ្លែងបញ្ជាក់ថា ចំពោះខ្លួនសម្តេចដែលជាអ្នកត្រូវបន្តវេនដឹកនាំរាជរដ្ឋាភិបាល អនុវត្តគោល នយោបាយគណបក្សប្រជាជនកម្ពុជា ប្តេជ្ញាចិត្តដើម្បីបន្តនៅការអនុវត្តគោលយោបាយយកចិត្តទុកដាក់ជួយប្រជាពលរដ្ឋនៅគ្រប់វិស័យទាំងអស់។

ជាមួយគ្នានេះ សម្តេចធិបតី ហ៊ុន ម៉ាណែត ក៏អំណរគុណដល់ប្រជាពលរដ្ឋនៅខេត្តកំពង់ស្ពឺ ដែលបានផ្តល់ការគាំទ្រ និងភាពកក់ ក្តៅ និងជឿទុកចិត្តលើគណបក្សប្រជាជនកម្ពុជា នៅក្នុងការ បោះឆ្នោតកន្លងមកនេះ ដែលបានទៅបោះឆ្នោតយ៉ាងច្រើនកុះករ និងផ្តល់ការជឿទុកចិត្តទៅលើគណបក្សប្រជាជនកម្ពុជា ។ នៅខេត្តកំពង់ស្ពឺ មាន ៩០,២៨% ដែលបានទៅបោះឆ្នោត គឺអាត្រាខ្ពស់ណាស់បើប្រៀបធៀបទូទាំងប្រទេស ហើយក្នុងនោះ ៨៤,៤៩% បានបោះឆ្នោតផ្តល់ការទុកចិត្តដល់គណបក្សប្រជាជនកម្ពុជា ដើម្បីបន្តគោលនយោបាយបម្រើប្រជាពលរដ្ឋតទៅទៀត។

សម្តេចធិបតី ហ៊ុន ម៉ាណែត បានមានប្រសាសន៍បន្តថា ការបោះឆ្នោតនេះបញ្ជាក់យ៉ាងច្បាស់អំពីការពេញចិត្ត និងការជឿជាក់របស់បងប្អូនចំពោះសម្តេចតេជោ ហ៊ុន សែន ចំពោះថ្នាក់ដឹកនាំគណបក្សប្រជាជនកម្ពុជា ហើយជាពិសេសចំពោះសមិទ្ធផលដែលថ្នាក់ដឹកនាំរាជរដ្ឋាភិបាលអាណិត្តមុនដែលបានដឹកនាំប្រទេស៤៤ឆ្នាំមកនេះ ដើម្បីបម្រើកសាងសមិទ្ធផលទាំងអស់ជូនបងប្អូនប្រជាពលរដ្ឋ៕
ដោយ៖ពលជ័យ
រូបភាព៖ហ្វេសប៊ុកសម្តេចធិបតី ហ៊ុន ម៉ាណែត