ឧត្តមក្រុមប្រឹក្សាពិគ្រោះ និងផ្តល់យោបល់ក្នុងអាណត្តិទី៧នឹងអាចចេញជារូបរាងនៅក្នុងខែកញ្ញា ឬខែតុលាខាងមុខ
ភ្នំពេញ៖លេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានបង្ហាញសុទិដ្ឋិនិយមថា ឧត្តមក្រុមប្រឹក្សាពិគ្រោះ និងផ្តល់យោបល់នៅក្នុងអាណត្តិទី៧នៃរាជរដ្ឋាភិបាលថ្មីនេះ នឹងអាចចេញជារូបរាងនៅក្នុងខែកញ្ញា ឆ្នាំ២០២៣នេះ។
ឯកឧត្តម ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ បានប្រាប់ឱ្យដឹងដូចនេះកាលពីថ្ងៃទី១៨ ខែកញ្ញា។ឯកឧត្តមបញ្ជាក់ថា ប៉ុន្តែការកើតចេញជារូបរាងឆាប់ៗនេះ ក៏អាស្រ័យទៅលើការត្រួតពិនិត្យទៅលើសំណុំឯកសាររបស់គណបក្សនយោបាយនីមួយៗ និងពេលវេលារបស់សម្ដេចធិបតីនាយករដ្ឋមន្ត្រី ហ៊ុន ម៉ាណែតផងដែរ។
សម្រាប់អាណត្តិថ្មីនេះ មានគណបក្សនយោបាយចំនួន ៣០ ក្នុងចំណោមគណបក្សនយោបាយដែលបានចុះបញ្ជីបានត្រឹមត្រូវនៅក្រសួងមហាផ្ទៃជាង ៤០ គណបក្ស ដែលបានដាក់ពាក្យស្នើសុំចូលរួមជាសមាជិកនៃឧត្តមក្រុមប្រឹក្សាពិគ្រោះ និងផ្តល់យោបល់នាអាណត្តិថ្មីនេះ ។
ឯកឧត្តម ឈឹម ផលវរុណ បានបញ្ជាក់បន្ថែមថា ក្រោយពីបិទបញ្ចប់ទទួលពាក្យស្នើសុំចូលរួមជាសមាជិកឧ ត្តមក្រុមប្រឹក្សា និងពិគ្រោះយោបល់របស់គណបក្សនយោបាយទាំងនេះ លេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ បានពិនិត្យលើសំណុំឯកសារបស់គណបក្សនយោបាយទាំងនោះរួចរាល់ និងបានបញ្ជូនទៅខុទ្ទកាល័យរបស់សម្ដេចធិបតីនាយករដ្ឋមន្ត្រី ហ៊ុន ម៉ាណែត រួចហើយដែរ កាលពីពាក់កណ្តាលសប្តាហ៍មុនដើម្បីពិនិត្យ និងសម្រេច។
ឯកឧត្តមបានបន្ថែមថា ពេលវេលាក្នុងការវិនិច្ឆ័យសម្រាប់គណបក្សនីមួយៗចំពោះលក្ខណៈសម្បត្តិជាសមាជិក គឺអាស្រ័យពេលវេលារបស់លោកនាយករដ្ឋមន្ត្រី ពីព្រោះគណបក្សចូលរួមមានរហូតដល់ ៣០ គណបក្សដូចនេះ មិនអាចធ្វើប្រញាប់ប្រញាល់បាននោះទេ។
សូមរម្លឹកដែរថា ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យស្តីពីការរៀបចំ និងការប្រព្រឹត្តទៅនៃឧត្តមក្រុមប្រឹក្សាពិគ្រោះ និងផ្តល់យោបល់ កាលពីចុងខែសីហាកន្លងទៅ ដោយមាន ៧ ជំពូក និង២១ មាត្រា៕
ដោយ៖គឹម យុត្ថារ៉ូ
