អាមេរិក និងកូរ៉េខាងត្បូង ចាប់ផ្ដើមសមយុទ្ធកងទ័ពអាកាស ចំពេលកូរ៉េខាងជើងពង្រឹងប្រតិបត្តិការយោធាជាមួយរុស្ស៊ី
អាមេរិក៖សហរដ្ឋអាមេរិក និងកូរ៉េខាងត្បូង បានចាប់ផ្តើមសមយុទ្ធដែនអាកាសទ្រង់ទ្រាយធំកាលពីថ្ងៃចន្ទ ដោយប្រើយន្តហោះចម្បាំងចំនួន ១៣០ គ្រឿងរបស់ប្រទេសទាំងពីរដើម្បីធ្វើត្រាប់ប្រតិបត្តិការសង្គ្រាមរយៈពេល ២៤ ម៉ោង។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានរ៉យទ័រ។
កងទ័ពអាកាសកូរ៉េខាងត្បូងបាននិយាយថា សមយុទ្ធប្រចាំឆ្នាំដែលមានឈ្មោះថា Vigilant Defence នឹងដំណើរការរហូតដល់ថ្ងៃសុក្រ ដោយមានទាំងយន្តហោះចម្បាំងបំបាំងកាយ F-35 ទាំងពីសហរដ្ឋអាមេរិក និងកូរ៉េខាងត្បូង។
សមយុទ្ធនេះ មានគោលបំណងធ្វើឱ្យប្រសើរឡើងនូវអន្តរប្រតិបត្តិការរវាងយោធានៃប្រទេសទាំងពីរ ដោយអនុវត្តបេសកកម្មតាមផ្លូវអាកាសសំខាន់ៗ ដូចជាសមយុទ្ធបាញ់គ្រាប់ពិតពីអាកាសទៅដី ប្រតិបត្តិការការពារដែនអាកាស និងការហ្វឹកហ្វឺនសង្គ្រោះបន្ទាន់ជាដើម។
យោធាកូរ៉េខាងត្បូងបាននិយាយក្នុងសេចក្តីថ្លែងការណ៍មួយថា ៖ «យើងនឹងរក្សាការត្រៀមខ្លួនប្រយុទ្ធឱ្យបានបំផុត ដើម្បីឆ្លើយតបភ្លាមៗ និងដាក់ទណ្ឌកម្មយ៉ាងពេញទំហឹងចំពោះការបង្កហេតុណាមួយរបស់សត្រូវ តាមរយៈការហ្វឹកហ្វឺនយ៉ាងម៉ឺងម៉ាត់មួយ ដែលត្រាប់ធ្វើតាមស្ថានភាពជាក់ស្តែង»។
គេមើលឃើញថា សមយុទ្ធនាពេលនេះប្រព្រឹត្តទៅខណៈកូរ៉េខាងជើងបង្កើនកិច្ចសហប្រតិបត្តិការយោធាជាមួយរុស្ស៊ី ជាអ្វីដែលសហរដ្ឋអាមេរិក និងសម្ព័ន្ធមិត្តនៅអាស៊ីបានថ្កោលទោស ថាជាការខិតខំប្រឹងប្រែងរបស់កូរ៉េខាងជើងក្នុងការបង្កើនសមត្ថភាពយោធារបស់ខ្លួន ជាថ្នូរនឹងការផ្ដល់អាវុធដល់រុស្ស៊ី។
ចំណែករដ្ឋមន្ត្រីការបរទេសកូរ៉េខាងជើង លោក Choe Son Hui បាននិយាយកាលពីថ្ងៃសៅរ៍ថា វាគឺជាឆន្ទៈដ៏ខ្ជាប់ខ្ជួនរបស់ទីក្រុងព្យុងយ៉ាង ក្នុងការពង្រីកទំនាក់ទំនងជាមួយរុស្ស៊ី ដោយបន្ថែមថា ទំនាក់ទំនងរបស់ប្រទេសទាំង២ នឹងដើរតួជាធាតុផ្សំនៃយុទ្ធសាស្ត្រដ៏មានឥទ្ធិពល ប្រសិនបើសន្តិសុខក្នុងតំបន់មានគ្រោះថ្នាក់។
គួរបញ្ជាក់ថា ភាពតានតឹងក្នុងតំបន់បន្តកើនឡើង ជុំវិញការបង្កើនការបាញ់សាកល្បងអាវុធរបស់កូរ៉េខាងជើងដែលប្រដាប់ដោយនុយក្លេអ៊ែរ ក៏ដូចជាការបង្កើនសកម្មភាពយោធារបស់អាមេរិក និងសម្ព័ន្ធមិត្ត។
កូរ៉េខាងជើងទទូចថា សមយុទ្ធក្នុងតំបន់របស់អាមេរិករួមជាមួយជប៉ុន ឬកូរ៉េខាងជើង គឺជាការហាត់សមធ្វើសង្រ្គាមដើម្បីត្រៀមខ្លួនឈ្លានពានកូរ៉េខាងជើង ខណៈអាមេរិក និងសម្ព័ន្ធមិត្តដដែល លើកឡើងថា សកម្មភាពយោថាទាំងអស់ គ្រាន់តែទុកការពារខ្លួន ក៏ដូចជាការបង្ហាញសកម្មភាពប្រឆាំងនឹងការគំរាមកំហែងរបស់ក្រុងព្យុងយ៉ាងប៉ុណ្ណោះ៕
ប្រែសម្រួល៖ហួន ឌីណា
ប្រភព៖ US, South Korean warplanes kick off joint air drills
