ឯកឧត្តម សួស យ៉ារ៉ា និងអនុប្រធានាធិបតីថ្មី នៃសាធារណរដ្ឋម៉ាល់ឌីវ ជំរុញកិច្ចសហប្រតិបត្តិការរវាងគ្នា ដូចជាការតភ្ជាប់គោលដៅទេសចរណ៍នៃប្រទេសទាំងពីរ ពាណិជ្ជកម្ម ការវិនិយោគ
ភ្នំពេញ៖ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន និងជាប្រធានសភាអន្តរជាតិដើម្បីភាពអត់ឱន និងសន្តិភាព (IPTP) និងឯកឧត្តម ហ៊ូសេន មូហាម៉ាត់ ឡាទីហ្វ អនុប្រធានាធិបតីថ្មី នៃសាធារណរដ្ឋម៉ាល់ឌីវ បានពិភាក្សាគ្នាលើការជំរុញកិច្ចសហប្រតិបត្តិការរវាងគ្នា ដូចជាការតភ្ជាប់គោលដៅទេសចរណ៍នៃប្រទេសទាំងពីរ ពាណិជ្ជកម្ម ការវិនិយោគ និងការផ្លាស់ប្តូរទៅវិញទៅមកលើការអភិរក្សវប្បធម៌ និងធនធានសមុទ្រ រួមគ្នាលើកកម្ពស់សន្តិភាពក្នុងតំបន់និងពិភពលោក មនុស្សធម៌ សន្តិសុខស្បៀង ព្រមទាំងការគាំទ្រគ្នាទៅវិញទៅមកលើវេទិកាអន្តរជាតិ និងអន្តរសភានានា។
ការជួបពិភាក្សាគ្នានេះ នៅក្នុងឱកាសឯកឧត្តម សួស យ៉ារ៉ា អញ្ជើញបំពេញបំពេញទស្សនកិច្ចការងារ និងបានចូលរួមជាភ្ញៀវកិត្តិយសក្នុងពិធីប្រកាសចូលកាន់តំណែងរបស់ឯកឧត្តមបណ្ឌិត មូហាម៉ាត់ មុយស៊ូ (Mohamed Muizzu) ជាប្រធានាធិបតីថ្មី និង ឯកឧត្តម ហ៊ូសេន មូហាម៉ាត់ ឡាទីហ្វ (Hussain Mohamed Latheef) ជាអនុប្រធានាធិបតីថ្មី នៅរដ្ឋធានីម៉ាល់នៃសាធារណរដ្ឋម៉ាល់ឌីវពីថ្ងៃទី១៦-១៩ ខែវិច្ឆិកា ឆ្នាំ២០២៣ តបតាមការអញ្ជើញរបស់ការិយាល័យប្រធានាធិបតីជាប់ឆ្នោតនៃសាធារណរដ្ឋម៉ាល់ឌីវ។
![](https://asset.ams.com.kh/central/media/2023/11/404151132_887953502696044_8925101471348020691_n-1024x682.jpg)
ក្នុងឱកាសនោះ ឯកឧត្តម សួស យ៉ារ៉ា បាននាំនូវការអបអរសាទរយ៉ាងកក់ក្តៅបំផុតពីសំណាក់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ជូនចំពោះឯកឧត្តមប្រធានាធិបតី និងអនុប្រធានាធិបតី។
ក្នុងជំនួបពិភាក្សាការងារដោយឡែកជាមួយ ឯកឧត្តមអនុប្រធានាធិបតី ហ៊ូសេន មូហាម៉ាត់ ឡាទីហ្វ។ ឯកឧត្តម បានលើកឡើងអំពីទស្សនកិច្ចជាប្រវត្តិសាស្ត្ររបស់សម្តេចតេជោ ហ៊ុន សែន មកកាន់ប្រទេសម៉ាល់ឌីវកាលពីខែមករា ឆ្នាំ២០២៣ និងបានថ្លែងអំណរគុណ សម្តេចតេជោ ដែលបានជ្រើសរើសផ្លូវមួយខ្សែនៅខេត្តព្រះសីហនុដាក់ឈ្មោះថា «ផ្លូវមិត្តភាពកម្ពុជា-ម៉ាល់ឌីវ» សម្រាប់អបអរខួបលើកទី៣០ឆ្នាំនៃចំណងការទូតប្រទេសទាំងពីរ។ ភាគីទាំងពីរបានពិភាក្សាលើ ការជំរុញកិច្ចសហប្រតិបត្តិការរវាងគ្នា ដូចជាការតភ្ជាប់គោលដៅទេសចរណ៍នៃប្រទេសទាំងពីរ ពាណិជ្ជកម្ម ការវិនិយោគ និងការផ្លាស់ប្តូរទៅវិញទៅមកលើការអភិរក្សវប្បធម៌និងធនធានសមុទ្រ រួមគ្នាលើកកម្ពស់សន្តិភាពក្នុងតំបន់និងពិភពលោក មនុស្សធម៌ សន្តិសុខស្បៀង ព្រមទាំងការគាំទ្រគ្នាទៅវិញទៅមកលើវេទិកាអន្តរជាតិ និងអន្តរសភានានា។
ឆ្លៀតក្នុងឱកាសនោះ ឯកឧត្តម សួស យ៉ារ៉ា ក៏បានជួបពិភាក្សាការងារជាមួយ ឯកឧត្តម អាល់ចាវ៉ាន់ (Ahmed Bin Mohammad Al-Jarwan) ប្រធានក្រុមប្រឹក្សាសកលដើម្បីសន្តិភាព និងភាពអត់ឱន (GCTP) នៃអារ៉ាប់រួមអេមីរ៉ាត លើកិច្ចសហប្រតិបត្តិការជាមួយរដ្ឋសភាកម្ពុជា ដោយផ្តោតលើការត្រៀមរៀបចំមហាសន្និបាតសភាអន្តរជាតិដើម្បីភាពអត់ឱននិងសន្តិភាព នៅខែមិថុនា ឆ្នាំ២០២៤ខាងមុខនេះ ដោយកម្ពុជាគ្រោងធ្វើជាម្ចាស់ផ្ទះ ដើម្បីពិនិត្យបង្កើតគោលការណ៍នៃកិច្ចសហប្រតិបត្តិការសន្តិភាពសកលគឺមិនយកសង្គ្រាមដើម្បីបញ្ចប់សង្គ្រាមដែលជាគំនិតផ្តួចផ្តើមរបស់ សម្តេចអគ្គមហាសេនាបតីតេជោ ហ៊ុន សែន៕
ដោយ៖ពលជ័យ
រូបភាព៖រដ្ឋសភា
![](https://asset.ams.com.kh/central/media/2023/11/404013929_887953656029362_319059079103157056_n-1024x682.jpg)
![](https://asset.ams.com.kh/central/media/2023/11/404108211_887953482696046_1095548847392811693_n-1024x682.jpg)
![](https://asset.ams.com.kh/central/media/2023/11/404270055_887953589362702_1023690149587327205_n-1024x768.jpg)
![](https://asset.ams.com.kh/central/media/2023/11/404178445_887953499362711_3725398384730241725_n-724x1024.jpg)