ហ្សាការតា៖ ទិន្នន័យផ្លូវការបានបង្ហាញឱ្យដឹងនៅថ្ងៃចន្ទនេះថា កំណើនសេដ្ឋកិច្ចរបស់ប្រទេសឥណ្ឌូនេស៊ី បានកើនឡើងយឺតកាលពីឆ្នាំ ២០២៣ ដោយសារតែការនាំចេញចុះខ្សោយ ដែលជំរុញដោយតម្លៃទំនិញធ្លាក់ចុះ។

ប្រទេសមានសេដ្ឋកិច្ចធំបំផុតរបស់អាស៊ីអាគ្នេយ៍នេះ មានកំណើនសេដ្ឋកិច្ចត្រឹម ៥.០៥ភាគរយ កើនលើសការព្យាករណ៍របស់រដ្ឋាភិបាលបន្តិច ប៉ុន្តែតួលេខនេះបានធ្លាក់ចុះ បើធៀបនឹងឆ្នាំ ២០២២ ដែលមានចំនួន ៥.៣ភាគរយ នេះបើយោងតាមស្ថិតិផ្លូវការរបស់ប្រទេសឥណ្ឌូនេស៊ី។

កំណើនក្នុងត្រីមាសទី៤ បានកើនឡើង ៥.០៤ភាគរយ តួលេខនេះល្អប្រសើរជាងមុន បើធៀបនឹងរយៈពេលដូចគ្នាក្នុងឆ្នាំ ២០២២។ ប្រធានស្ថិតិស្តីទីឥណ្ឌូនេស៊ី លោកស្រី Amalia Adininggar Widyasanti និយាយថា ការប្រើប្រាស់ក្នុងស្រុក ជាកត្តាជំរុញដ៏សំខាន់សម្រាប់កំណើនសេដ្ឋកិច្ច ដើម្បីជួយប៉ះប៉ូវការនាំចេញដែលយឺតយ៉ាវ។

លោកស្រី Widyasanti បានប្រាប់អ្នកយកព័ត៌មានយ៉ាងដូច្នេះថា អ្នកចូលរួមចំណែកសំខាន់ដល់កំណើនផលិតផលក្នុងស្រុកសរុប (GDP) រួមមានការប្រើប្រាស់ក្នុងគ្រួសារ ដែលបានកើនឡើង ៤.៨២ភាគរយ ហើយការបោះទុនវិនិយោគក៏កើនឡើងផងដែរ។

យោងតាមទិន្នន័យបានបង្ហាញថា ការនាំចេញរបស់ឥណ្ឌូនេស៊ីបានកើនឡើងត្រឹមតែ ១.៣២ភាគរយកាលពីឆ្នាំ ២០២៣ ខណៈដែលការនាំចូលវិញ ក៏បានធ្លាក់ចុះ ១.៦៥ភាគរយផងដែរ។

ជាមួយគ្នានេះ អ្នកសេដ្ឋកិច្ចបានព្រមានពីការធ្លាក់ចុះកំណើនសេដ្ឋកិច្ចរបស់ប្រទេសឥណ្ឌូនេស៊ីបន្ថែមទៀតនៅក្នុងប៉ុន្មានខែខាងមុខនេះ ដោយសារទីក្រុងហ្សាការតារឹតបន្តឹងគោលនយោបាយរូបិយវត្ថុ ហើយតម្រូវការទំនិញបន្តធ្លាក់ចុះ៕

ប្រភព៖ AFP ប្រែសម្រួលដោយ៖ ឈឹម ទីណា