កំពង់ចាម៖ក្រុមហ៊ុន ស៊ិនទ្រីទទួលបានសិទ្ធប្រមូលដឹកជញ្ជូនសំរាម សំណល់ រឹង នៅទីប្រជុំជនក្រុងកំពង់ចាមក្នុងរយៈ ពេល ១០ឆ្នាំ ។ពិធី ចុះហត្ថលេខា លើកិច្ចសន្យាបាន ធ្វើឡើងនៅសាលប្រជុំសាលាខេត្ត កំពង់ចាម កាលពីថ្ងៃទី៤ ខែមីនា ឆ្នាំ២០២៤ ដោយមានការអញ្ជើញ ចូលរួម ធ្វើជាសាក្សីពីសំណាក់ ឯកឧត្តម អ៊ុន ចាន់ដា អភិបាលខេត្ត កំពង់ចាម និងឯកឧត្តម ចាយ សាមិត្ត រដ្ឋលេខាធិការក្រសួងបរិស្ថាន ។

បញ្ជាក់ក្នុងពិធីនេះឯកឧត្តម អ៊ុន ចាន់ដា អភិបាលខេត្តកំពង់ចាម បានឱ្យដឹងថា ក្រុមហ៊ុនស៊ីនទ្រី បានទទួលការសាកល្បងធ្វើបានល្អ នៃការប្រមូលដឹកសំរាម ក្នុងក្រុងកំពង់ចាម រយៈពេលមួយឆ្នាំ ដែល នោះជាបទពិសោធន៍ សម្រាប់អនុវត្តការងារនេះឱ្យមាននិរន្តរភាព រយៈពេលយូរអង្វែង ។ប៉ុន្តែនៅថ្ងៃនេះរដ្ឋបាលក្រុងកំពង់ចាម បាន ចុះហត្ថលេខា លើកិច្ចសន្យាផ្ដល់សិទ្ធិឱ្យក្រុមហ៊ុន ស៊ិនទ្រី រយៈពេល ១០ឆ្នាំ ដើម្បីប្រមូលដឹកសំរាម សំណល់រឹង ក្នុងក្រុងកំពង់ចាម ។

ឯកឧត្តមបន្តថា ការអនុវត្តប្រមូលដឹកសំរាមក្នុងក្រុងកំពង់ចាម គឺខាង ក្រុមហ៊ុនសិនទ្រី។រីឯរដ្ឋបាលក្រុងកំពង់ចាម មានភារកិច្ច ប្រមូល ថ្លៃសេវា តាមខ្នងផ្ទះ និងបង់ថ្លៃសេវាឱ្យទៅក្រុមហ៊ុនស៊ិនទ្រី ក្នុងសំរាមមួយតោន តម្លៃ ១៧ដុល្លារ ។

ឯកឧត្តម ចាយ សាមិត្ត បានថ្លែងថា ខេត្តកំពង់ចាម គឺជាខេត្តមួយ ឈានមុខគេ នៃបណ្ដាខេត្ត នៅទូទាំងប្រទេស លើការអនុវត្ត អនុក្រឹត្យ លេខ ១១៣ ។ រដ្ឋបាលក្រុងកំពង់ចាម អាចមានលទ្ធភាព បង់ថ្លៃសេវា នៃការប្រមូលសំរាមនេះ ដោយមិនត្រូវការ ថវិកាជំនួយពីរដ្ឋបាលខេត្ត ។ការងាររបស់រដ្ឋបាលក្រុងកំពង់ចាមនេះ អាចជាបទពិសោធន៍ សម្រាប់ ធ្វើការផ្សព្វផ្សាយ ទៅតាម បណ្ដាក្រុង នៃខេត្តផ្សេងៗទៀត យកគំរូ តាម។

ចំណែកលោក លី សុវណ្ណ អភិបាលក្រុងកំពង់ចាម រាយការណ៍ថា លទ្ធផលការងារដែលបានអនុវត្តក្នុងឆ្នាំ២០២៣ កន្លងទៅ ឃើញថា ប្រជាពលរដ្ឋទូទាំងក្រុង មានការសប្បាយរីករាយ ចំពោះ សេវា ប្រមូលសំរាមថ្មី និងចូលរួមបង់សេវាមានការកើនឡើងច្រើន ជាងពេល គ្រប់គ្រងដោយក្រុមហ៊ុនឯកជន ។ កាលពីការគ្រប់គ្រងដោយ ក្រុម ហ៊ុនឯកជន មានប្រជាពលរដ្ឋចូលរួមបង់សេវា ចំនួន ៣.៧០០ទីតាំង តែបច្ចុប្បន្នគិតត្រឹមចុង ឆ្នាំ២០២៣ នេះ មានការកើនឡើង ដោយ ប្រជាពលរដ្ឋ មកភ្ជាប់សេវា ជាមធ្យម ៥.៨០៤ទីតាំង ឯណោះ ៕

ដោយ៖លី ពៅ