ប្រធានគោលនយោបាយការទេសរបស់សហភាពអឺរ៉ុប បាននិយាយថា ប្លុកមួយនេះនឹងរៀបចំផែនការប្រើប្រាស់ទ្រព្យសម្បត្តិរបស់រុស្ស៊ី ដែលបង្កកបាន ដើម្បីផ្តល់ជាអាវុធ ដល់ប្រទេសអ៊ុយក្រែន។

លោក Josep Borrell បាននិយាយ កាលពីថ្ងៃអង្គារថា ប្រទេសប៊ែលហ្សិកនឹងស្នើទៅបណ្តាប្រទេស ដែលជាសមាជិកសហភាពអឺរ៉ុប ជុំវិញរឿងនេះ។ ទ្រព្យសម្បត្តិរបស់រុស្ស៊ី ដែលជាប់គាំងនៅអឺរ៉ុប ត្រូវបានប៉ាន់ស្មានថា មានតម្លៃ ៣ពាន់លានអឺរ៉ូ ឬ ជាង៣.២ពាន់លានដុល្លារអាមេរិក ក្នុងមួយឆ្នាំ។

នៅថ្ងៃពុធនេះ គឺជាថ្ងៃចាប់ផ្តើមប្រជុំដំបូង ហើយត្រៀមសម្រាប់កិច្ចប្រជុំកំពូលនៃមេដឹកនាំទាំង ២៧ ប្រទេស ដែលផ្តោតលើការគាំទ្រ សម្រាប់ទីក្រុង Kyiv នាពេលខាងមុខនេះ។

លោក Josep Borrell បាននិយាយថា ភាគច្រើន ប្រើសម្រាប់ការចំណាយលើថ្លៃដើមអាវុធ ដល់អ៊ុយក្រែន។ ក្រៅពីនេះ ១០ភាគរយ ប្រើប្រាស់ដើម្បីជួយបង្កើនសមត្ថភាពឧស្សាហកម្មការពារជាតិ របស់អ៊ុយក្រែន។

ផែនការនេះត្រូវបានបង្កើតឡើង ក្នុងពេលដែលគម្រោងជំនួយ ៦០ពាន់លានដុល្លារអាមេរិក របស់អាមេរិក ដល់អ៊ុយក្រែន បានជាប់គាំង នៅត្រឹមសភាអាមេរិក។ ការផ្គត់ផ្គង់សព្វាវុធ ដែលថយចុះ ក្នុងរយៈពេលពីរឆ្នាំ បានធ្វើឱ្យកងកម្លាំងអ៊ុយក្រែន អស់អាវុធ នៅជួរមុខ ខណៈដែលរុស្ស៊ីបន្តសម្រុក ដណ្តើមការកាន់កាប់តំបន់នានា បន្ថែមទៀត៕ ប្រភពពី AFP ប្រែសម្រួល៖ សារ៉ាត