៣ខែដើមឆ្នាំ មេធំ Facebook ចំណេញជាង ១២ពាន់លានដុល្លារ
សាន់ហ្វ្រាន់ស៊ីស្កូ៖ ក្រុមហ៊ុន Meta ដែលជាមេធំរបស់ Facebook បានប្រកាសនៅថ្ងៃពុធថា ប្រាក់ចំណេញសុទ្ធរបស់ខ្លួន ក្នុងអំឡុងខែមករា ដល់ខែមីនា ឆ្នាំ២០២៤ បានកើនឡើងដល់ ១២.៤ពាន់លានដុល្លារ ជាមួយនឹងប្រាក់ចំណូលសរុប ភាគច្រើនរកបានពីការលក់ការផ្សាយពាណិជ្ជកម្មមានចំនួន ៣៦.៥ពាន់លានដុល្លារ កើនឡើងចំនួន ២៧ភាគរយ។
![](https://asset.ams.com.kh/central/media/2024/04/photo_2024-04-25_19-39-49-1024x682.jpg)
លោក Mark Zuckerberg ដែលជានាយកប្រតិបត្តិក្រុមហ៊ុន Meta បានគូសបញ្ជាក់ថា យើងប៉ាន់ប្រមាណថា មនុស្សជាង ៣.២ពាន់លាននាក់ប្រើប្រាស់យ៉ាងហោចណាស់កម្មវិធីមួយរបស់យើងជារៀងរាល់ថ្ងៃ ហើយយើងកំពុងមើលឃើញកំណើនដ៏រឹងមាំនៅក្នុងសហរដ្ឋអាមេរិក។
ទន្ទឹមគ្នា អ្នកវិភាគបាននិយាយថា ការរីកចម្រើនរបស់ក្រុមហ៊ុន Meta គឺដោយសារតែឧបករណ៍ផ្សាយពាណិជ្ជកម្មដ៏ទំនើបរបស់ខ្លួន និងភាពជោគជ័យនៃ “Reels” ដែលជាកម្មវិធីវីដេអូខ្លីៗ មានលក្ខណៈស្រដៀងគ្នាទៅនឹងកម្មវិធី TikTok។
![](https://asset.ams.com.kh/central/media/2024/04/photo_2024-04-25_19-39-50-1024x682.jpg)
ការជំរុញមួយផ្សេងទៀតដល់អាជីវកម្មរបស់ខ្លួន គឺនៅចុងឆ្នាំ២០២៤នេះ ក្រុមហ៊ុន Meta គ្រោងនឹងចាប់ផ្តើមលក់ការផ្សាយពាណិជ្ជកម្មនៅលើ Threads ដែលជាវេទិកាផ្ញើសារ ស្រដៀងទៅនឹងបណ្តាញសង្គម X។
គួរបញ្ជាក់ថា ការកើនឡើងនៃការលក់ និងប្រាក់ចំណេញរបស់ក្រុមហ៊ុន Meta បានបន្តការស្ទុះងើបឡើងវិញចាប់តាំងពីឆ្នាំ២០២៣ ដោយសារតែយុទ្ធសាស្រ្តកាត់បន្ថយការចំណាយច្រើន រួមទាំងការបញ្ឈប់បុគ្គលិកពីការងារយ៉ាងច្រើននៅក្នុងអ្វីដែលលោក Zuckerberg ហៅថា “ឆ្នាំដ៏មានប្រសិទ្ធភាព” ឬ “Year of efficiency”។
បើតាមការបញ្ជាក់របស់ក្រុមហ៊ុន Meta កម្លាំងពលកម្មសកលរបស់ខ្លួន ឥឡូវនេះមានចំនួនជិត ៧ម៉ឺននាក់ (៦៩.៣២៩នាក់) ពោលគឺច្រើនជាងត្រីមាសមុនបន្តិច ប៉ុន្តែធ្លាក់ចុះពីចំនួនបុគ្គលិកច្រើនជាង ៨ម៉ឺននាក់ (៨៧.០០០នាក់) ក្នុងឆ្នាំ២០២២៕ ប្រភព៖ AFP ប្រែសម្រួលដោយ៖ ឈឹម ទីណា
![](https://asset.ams.com.kh/central/media/2024/04/photo_2024-04-25_19-39-51-1024x687.jpg)