ភ្នំពេញ៖ទីភ្នាក់ងារសហរដ្ឋអាមេរិកសម្រាប់ការអភិវឌ្ឍ អន្តរជាតិ ហៅកាត់ថា យូសេដ (USAID) បានចុះហត្ថ លេខាលើ​កិច្ចព្រម​ព្រៀង​ផ្តល់ជំនួយជាមួយគណៈកម្មការ ទន្លេមេគង្គ (MRC) ដើម្បីផ្តល់ជំនួយរហូតដល់ ៥ លាន ដុល្លារអាមេរិក សម្រាប់ភាព​ជាដៃគូថ្មីនៃអាងទន្លេមេគង្គ។ ពិធីចុះហត្ថលេខា ដែលបានធ្វើឡើងនៅលេខាធិការដ្ឋាន MRC បង្ហាញពីកិច្ចបន្តគាំទ្រ​របស់សហរដ្ឋ​អាមេរិកក្នុងការពង្រឹងកិច្ច សហការឆ្លងដែន និងការគ្រប់គ្រងទឹក ក៏ដូចជាធនធាន ពាក់ព័ន្ធផ្សេងទៀត ដែលរួមចំណែក​ដល់ការ​សម្រេចបាននូវ យុទ្ធសាស្ត្រអភិវឌ្ឍន៍អាងទន្លេរបស់ MRC ។

យោងតាមសេចក្តីប្រកាសព័ត៌មានគណៈកម្មការទន្លេមេគង្គថ្ងៃទី២៧ ខែមិថុនា ឆ្នាំ២០២៤ នាទីក្រុងវៀងចន្ទន៍ ប្រទេសឡាវ​បានឱ្យដឹងថា កិច្ចព្រមព្រៀងនេះផ្តល់ឱ្យ MRC នូវការបង្កើន ធនធានយ៉ាងសំខាន់ ដើម្បីឆ្លើយតបទៅនឹងបញ្ហាអភិវឌ្ឍន៍នៅ​ក្នុងយុទ្ធសាស្ត្រអាទិភាពរបស់ MRC។ យុទ្ធសាស្រ្តនេះផ្តល់ ជំនួយបច្ចេកទេសដល់ប្រទេសជាសមាជិករបស់ MRC រួមមាន កម្ពុជា ឡាវ ថៃ និងវៀតណាម ក្នុងការប្រមូល និងប្រើប្រាស់ ទិន្នន័យសម្រាប់ការសម្រេចចិត្តដែលផ្អែកលើព័ត៌មានគ្រប់គ្រាន់។ កិច្ចព្រម​ព្រៀងនេះក៏បានរួមបញ្ជូលភាគីពាក់ព័ន្ធនានា ដូចជាសហគមន៍មូលដ្ឋាន អង្គការសង្គមស៊ីវិល វិស័យឯកជន និង ដៃគូអភិវឌ្ឍន៍នានា ដើម្បីចូលរួមក្នុងកិច្ចពិភាក្សាដែល ជាប្រយោជន៍ដល់សុខុមាលភាពរបស់ទន្លេមេគង្គ។

ប្រភពដដែលពណ៌នាថា ភាពជាដៃគូថ្មីនេះជំរុញការប្តេជ្ញា ចិត្ត របស់ យូសេដ​ក្នុងការបញ្ជូនមូលនិធិអភិវឌ្ឍន៍​ច្រើនជាងមុន​ទៅកាន់​ដៃគូក្នុងមូលដ្ឋានដោយផ្ទាល់។ វាក៏ស្របតាម អាទិភាពនៃភាពជាដៃគូ មេគង្គ-អាមេរិក ដើម្បីគាំទ្រស្វ័យភាព និងការរីកចំរើនប្រកប​ដោយចីរភាពនៃអនុតំបន់ទន្លេមេគង្គ។

បណ្ឌិត Steven G. Olive នាយកបេសកកម្មសម្រាប់ បេសកកម្មអភិវឌ្ឍន៍ប្រចាំតំបន់ក្នុងអាស៊ីរបស់ USAID មានប្រសាសន៍ថា៖ «USAID ប្តេជ្ញាក្នុងកិច្ចសហការជាដៃគូ ជាមួយថ្នាក់ដឹកនាំក្នុងតំបន់ ដែលរួមមានរដ្ឋាភិបាលក្នុងបណ្តា ប្រទេសទន្លេមេគង្គក្រោម ដើម្បីដោះស្រាយបញ្ហាប្រឈម ស្មុគស្មាញ ពន្លឿនការអភិវឌ្ឍប្រកបដោយចីរភាព កសាង ភាពធន់នឹងអាកាសធាតុ និងលើកកម្ពស់​វិបុលភាពសេដ្ឋ កិច្ច»។

មូលដ្ឋានគ្រឹះមួយទៀតនៃកិច្ចព្រមព្រៀងនេះគឺការកែលម្អបច្ចេកវិទ្យា និងឧបករណ៍សម្រាប់ការគ្រប់គ្រង អាងទន្លេ តាមរយៈ​ប្រព័ន្ធ​ចាប់សញ្ញាពីចម្ងាយ និងប្រព័ន្ធផ្កាយរណប។ លើសពីនេះទៀត ម៉ូដែលនិម្មិតនៃទីតាំង សំខាន់ៗនៅក្នុង អាងទន្លេ នឹងត្រូវបានបង្កើត​ឡើងដើម្បីវិភាគ និងប្រមើ មើលពីផលប៉ះពាល់ និងសក្ដានុពលនៃទឹកជំនន់ និងគ្រោះរាំងស្ងួតនាពេលបច្ចុប្បន្ន។

បណ្ឌិត Anoulak Kittikhoun នាយកប្រតិបត្តិនៃ MRC បានមានប្រសាសន៍ថា៖ «កិច្ចព្រមព្រៀងនេះគឺបង្ហាញពីការវិល​ត្រឡប់​របស់ USAID ក្នុងការគាំទ្រដោយផ្ទាល់ដល់ MRC ដើម្បីបំពេញតម្រូវការ និងអាទិភាព ដែលមាននៅក្នុងផែនការ យុទ្ធសាស្រ្តរបស់ MRC ឱ្យកាន់តែប្រសើរជាងមុន។ តាមរយៈភាពជាដៃគូនេះ យើងអាចគាំទ្រប្រទេសជាសមាជិក បានកាន់តែប្រសើរឡើង ជាមួយ​​នឹងទិន្នន័យ និង ឧបករណ៍ថ្មីៗ និងការជំរុញកិច្ចសន្ទនារួមជាមួយភាគី ពាក់ព័ន្ធទាំងអស់ ដែលនឹងរួមចំណែកដល់ភាព​រឹងមាំនៃសហគមន៍ទាំងអស់ដែលពឹងផ្អែកលើទន្លេមេគង្គដ៏អស្ចារ្យមួយនេះ»។

កិច្ចសហការរវាង MRC និង USAID គូសបញ្ជាក់ពីការប្តេជ្ញា ចិត្តរួមគ្នាចំពោះការអភិវឌ្ឍប្រកបដោយចីរភាព និងស្ថិរភាព ក្នុងតំបន់។ ដោយសារតែទន្លេមេគង្គបន្តប្រឈមមុខនឹង សម្ពាធកាន់តែខ្លាំងឡើងពីការប្រែប្រួល អាកាសធាតុ កំណើន ប្រជាជន និងការអភិវឌ្ឍ​ហេដ្ឋារចនាសម្ព័ន្ធ កិច្ចខិតខំប្រឹង ប្រែងរួមគ្នាដែលសម្របសម្រួលដោយជំនួយនេះនឹងដើរតួយ៉ាងសំខាន់ក្នុងការធានានូវសុខភាព និងភាពរឹងមាំរបស់ទន្លេ មេគង្គ។

សូមជម្រាបថា ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍ អន្តរជាតិ (USAID) គឺជាទីភ្នាក់ងារអភិវឌ្ឍន៍អន្តរជាតិ​ឈាន​មុខគេរបស់ពិភពលោក និងជាកាតាលីករជំរុញលទ្ធផលនៃការ អភិវឌ្ឍ។ ការងាររបស់ USAID គឺជំរុញសន្តិសុខជាតិ និងវិបុលភាពសេដ្ឋកិច្ច បង្ហាញពីទឹកចិត្តសប្បុរសរបស់អាមេរិក និងជំរុញនួវវិថីឆ្ពោះទៅរកអ្នកទទួលដែលពឹងផ្អែកលើខ្លួនឯង និងមានភាពធន់។ ចំណែកគណៈកម្មការទន្លេមេគង្គ គឺ ជាស្ថាប័នអន្តររដ្ឋាភិបាល ដែលបានបង្កើតឡើងក្នុងឆ្នាំ ១៩៩៥ ដើម្បីជំរុញកិច្ចសន្ទនា និង កិច្ចសហប្រតិបត្តិការក្នុងតំបន់ នៅក្នុងអាងទន្លេមេគង្គក្រោម។ ដោយផ្អែកទៅតាមកិច្ច ព្រមព្រៀងទន្លេមេគង្គ រវាងប្រទេសកម្ពុជា ឡាវ ថៃ និង វៀតណាម MRC បំពេញតួនាទីជាវេទិកាថ្នាក់តំបន់ សម្រាប់ការទូតទឹក ក៏ដូចជាជាមជ្ឈមណ្ឌលប្រមូលផ្តុំចំណេះ ដើម្បីគ្រប់គ្រងធនធានទឹក និងគាំទ្រការអភិវឌ្ឍន៍តំបន់ប្រកប ដោយចីរភាព៕
ដោយ៖មុនី

រូបថតៈគណៈកម្មការទន្លេមេគង្គ