រដ្ឋលេខាធិការមហាផ្ទៃ៖ការពង្រឹងសន្តិសុខ សណ្ដាប់ធ្នាប់ សុវត្ថិភាពព្រំដែន ជាកិច្ចការដែលរដ្ឋបាលត្រូវយកចិត្តទុកដាក់
បាត់ដំបង៖ មន្ត្រីជាន់ខ្ពស់ក្រសួងមហាផ្ទៃ បានលើកឡើង រដ្ឋបាលខេត្តបាត់ដំបងត្រូវយកចិត្តទុកដាក់ខិតខំ ពង្រឹងការថែរក្សាសន្តិសុខ ពិសេស ពង្រឹងនូវសន្តិសុខ សណ្តាប់ធ្នាប់និងសុខសុវត្ថិភាពសង្គមព្រំដែនឱ្យបានកាន់តែប្រសើរ និងត្រូវបង្រ្កាបនូវរាល់បទល្មើសគ្រប់ប្រភេទ។ ឯកឧត្តម ប្រាក់ សំអឿន រដ្ឋលេខាធិការក្រសួងមហាផ្ទៃបានបញ្ជាក់យ៉ាងដូច្នេះកាលពីរសៀលថ្ងៃទី២៦ ខែកក្កដាឆ្នាំ២០២៤ ក្នុងឱកាសអញ្ជើញចូលរួមប្រកាសចូលកាន់មុខតំណែងលោក ពិន ប្រាកដ ជាអភិបាលរងខេត្តបាត់ដំបង។
ក្នុងពិធីដែលមានវត្តមានឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តបាត់ដំបងផងនោះ ឯកឧត្តម
ប្រាក់ សំអឿន បានបន្តថា រដ្ឋបាលខេត្តក៏ត្រូវយកចិត្តទុកដាក់ ខិតខំ និងបង្កើនសកម្មភាពឱ្យកាន់តែសកម្ម ក្នុងការពង្រឹងនិង ការផ្ដល់សេវាសាធារណៈ ជូនប្រជាពលរដ្ឋឱ្យបានល្អប្រសើរ និងដោះស្រាយនូវរាល់សំណើរសំណូមពរ របស់ ប្រជាពលរដ្ឋឱ្យបានទាន់ពេលវេលា។សំដៅលើប្រសិទ្ធភាពការងារ ឯកឧត្តមរដ្ឋលេខាធិការបានរំលឹកដល់រដ្ឋបាលខេត្តត្រូវពង្រឹងនូវធ្លុងសាមគ្គីភាពផ្ទៃក្នុង និងកិច្ចសហប្រតិបត្តិការល្អ ជាមួយប្រទេសជិតខាង ពង្រឹងការគ្រប់គ្រងច្រកទ្វារព្រំដែន ដើម្បីទប់ស្កាត់រាល់បទល្មើសឆ្លងដែនគ្រប់ប្រភេទ ក្នុងគោលដៅប្រែក្លាយព្រំដែនឱ្យទៅជាព្រំដែនសុខសន្តិភាពនិងកាន់តែមានការអភិវឌ្ឍរីកចម្រើនថែមទៀត។
សូមជម្រាបថា យោងតាមអនុក្រឹត្យរបស់រាជរដ្ឋាភិបាលកម្ពុជា ស្ដីពីការផ្ទេរភារកិច្ចមន្រ្ដីរាជការបានសម្រេចផ្ទេរភារកិច្ច លោក ពិន ប្រាកដ ពីអភិបាលរងខេត្តសៀមរាប មកទទួលមុខតំណែងថ្មីជាអភិបាលរងខេត្តបាត់ដំបងជំនួសលោក អ៊ួ ដារី ដែលត្រូវបានជាប់ឆ្នោតជាសមាជិកក្រុមប្រឹក្សាខេត្តបាត់ដំបង អាណត្តិទី៤៕
អត្ថបទ-រូបភាព ៖ អ៊ុក សំអាន បប.
![](https://asset.ams.com.kh/central/media/2024/07/photo_2024-07-27_09-39-28-1024x620.jpg)
![](https://asset.ams.com.kh/central/media/2024/07/photo_2024-07-27_09-39-26-1024x584.jpg)
![](https://asset.ams.com.kh/central/media/2024/07/photo_2024-07-27_09-39-24-1024x622.jpg)
![](https://asset.ams.com.kh/central/media/2024/07/photo_2024-07-27_09-39-20-1024x670.jpg)
![](https://asset.ams.com.kh/central/media/2024/07/photo_2024-07-27_09-39-18-1024x550.jpg)
![](https://asset.ams.com.kh/central/media/2024/07/photo_2024-07-27_09-39-16-1024x687.jpg)
![](https://asset.ams.com.kh/central/media/2024/07/photo_2024-07-27_09-39-15-1024x669.jpg)