ក្រសួងកសិកម្ម និងអង្គការ FAO ចុះកិច្ចព្រមព្រៀងលើការផ្ដល់មូលនិធិសម្រាប់គម្រោង ការទប់ស្កាត់ ការត្រៀមបង្ការ និងការឆ្លើយតបចំពោះជំងឺរាតត្បាត
(ភ្នំពេញ)៖ ក្រសួងកសិកម្ម រុក្ខាប្រមាញ់ និងនេសាទ និង អង្គការស្បៀង និងកសិកម្មនៃសហប្រជាជាតិ (FAO) ប្រចាំកម្ពុជា បានឯកភាពគ្នាក្នុងការកសាងកិច្ចសហប្រតិបត្តិការថ្មីបន្ថែមទៀត ដោយក្នុងនេះបានចុះហត្ថលេខាលើកិច្ចព្រមព្រៀងផ្ដល់មូលនិធិសម្រាប់គម្រោងការទប់ស្កាត់ ការត្រៀមបង្ការ និងការឆ្លើយតបចំពោះជំងឺរាតត្បាត (CamPPR) នៅកម្ពុជា។
ពិធីចុះហត្ថលេខានេះបានធ្វើឡើងនៅ អគ្គនាយកដ្ឋានសុខភាពសត្វ និងផលិតកម្មសត្វ ដែលនេះត្រូវបានគេចាត់ទុកថាជាការបញ្ជាក់ពីជំហានដ៏រឹងមាំឆ្ពោះទៅរកការពង្រឹងសុវត្ថិភាពសុខភាពសាធារណៈនៅកម្ពុជា និងក្នុងតំបន់ តាមរយៈអភិក្រមសុខភាពតែមួយ (One Health)។
បើយោងតាមអង្គការ FAO បានឱ្យដឹងនៅថ្ងៃទី ៣១ ខែ កក្កដា ឆ្នាំ ២០២៤នេះថា កិច្ចព្រមព្រៀងនេះត្រូវបានចុះហត្ថលេខាជាផ្លូវការក្រោមអធិបតីភាព ឯកឧត្តម តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ និងលោកស្រី រេប៊ែកកា ប៊ែល តំណាងអង្គការស្បៀង និងកសិកម្មនៃសហប្រជាជាតិ (FAO) ប្រចាំកម្ពុជា។
តាមរយៈពិធីចុះហត្ថលេខានេះ វាក៏នឹងជួយបង្កើនកិច្ចសហការយូរអង្វែងរវាងអង្គការស្បៀង និងកសិកម្មនៃសហប្រជាជាតិ (FAO) ជាមួយនឹងអគ្គនាយកដ្ឋានសុខភាពសត្វ និងផលិតកម្មសត្វមួយកម្រិតបន្ថែមទៀតផងដែរ ដោយភាគីទាំងសងខាងនឹងផ្តោតការយកចិត្តទុកដាក់ជាសំខាន់ទៅលើការពង្រឹងសមត្ថភាពទូទៅ ក៏ដូចជាសមត្ថភាពនៃការតាមដាន សេវាមន្ទីរពិសោធន៍ និងធនធានមនុស្សនៅក្នុងប្រព័ន្ធសុខភាពសត្វរបស់កម្ពុជា។
គួរបញ្ជាក់ថាគម្រោងការទប់ស្កាត់ ការត្រៀមបង្ការ និងការឆ្លើយតបចំពោះជំងឺរាតត្បាត (CamPPR) មានគោលបំណងបង្កើនការការពារ ការត្រៀមលក្ខណៈ និងការឆ្លើយតបទៅនឹងស្ថានភាពអាសន្នផ្នែកសុខភាពសាធារណៈ ដែលបង្កដោយជំងឺរាតត្បាត តាមរយៈការអនុវត្តអភិក្រមសុខភាពតែមួយ (One Health)។ អភិក្រមនេះរួមបញ្ចូលសុខភាពមនុស្ស សត្វ រុក្ខជាតិ និងបរិស្ថាន និងលើកកម្ពស់និរន្តរភាពកសិកម្ម សុវត្ថិភាពចំណីអាហារ ព្រមទាំងគ្រប់គ្រងភាពស៊ាំនៃឱសថប្រឆាំងមេរោគ (AMR) ក៏ដូចជាសន្តិសុខស្បៀង និងអាហារូបត្ថម្ភផងដែរ។ វាជារឿងចាំបាច់ ដែលត្រូវចូលរួម បង្ការ ទប់ស្កាត់ និងគ្រប់គ្រងជំងឺឆ្លងពីសត្វមកមនុស្ស និងពីមនុស្សទៅសត្វ ក៏ដូចជាស្វែងរកដំណោះស្រាយចំពោះភាពស៊ាំនៃឱសថប្រឆាំងមេរោគ (AMR) ព្រមទាំងធានាបាននូវសុវត្ថិភាពម្ហូបអាហារ និងដោះស្រាយរាល់ការគំរាមកំហែងសុខភាពបរិស្ថាននានា។ លើសពីនេះ អភិក្រមសុខភាពតែមួយ (One Health) គឺពិតជាសំខាន់ព្រោះវានឹងជួយសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs)។
សម្រាប់មូលនិធិសម្រាប់ជំងឺរាតត្បាតត្រូវបានបង្កើតឡើងជាផ្លូវការកាលពីឆ្នាំ២០២២ ហើយនៅពេលនោះធនាគារពិភពលោកដើរតួជាអ្នកគ្រប់គ្រងដំណើរការទាំងមូល។ នៅខែឧសភា ឆ្នាំ២០២៣ ដែលជាការអំពាវនាវសម្រាប់ការដាក់ពាក្យលើកដំបូង មូលនិធិទទួលបានពាក្យស្នើសុំចំនួន១៧៩ពីបណ្ដាប្រទេសចំនួន ១៣៣។ បន្ទាប់មកនៅថ្ងៃទី១៩ ខែកក្កដា ឆ្នាំ២០២៣ ក្រុមប្រឹក្សាភិបាលនៃមូលនិធិជំងឺរាតត្បាតបានផ្តល់ជំនួយជុំទី១ដល់ប្រទេសចំនួន៣៧ ដើម្បីជួយបង្កើនសមត្ថភាពរបស់ពួកគេក្នុងការត្រៀម បង្ការ និងឆ្លើយតបទៅនឹងជំងឺរាតត្បាត ដោយក្នុងនោះប្រទេសកម្ពុជាក៏ទទួលបានការគាំទ្រនេះផងដែរ។
ក្រៅពីនេះក្នុងរយៈពេលបីឆ្នាំខាងមុខ អង្គការស្បៀង និងកសិកម្មនៃសហប្រជាជាតិ (FAO) រួមជាមួយអគ្គនាយកដ្ឋានសុខភាពសត្វ និងផលិតកម្មសត្វនឹងចុះអនុវត្តគម្រោង CamPPR នេះ ដោយមានការចូលរួមក្នុងនាមភាពជាដៃគូពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) និងធនាគារពិភពលោក (World Bank)។ គំនិតផ្តួចផ្តើមនេះនឹងជួយលើកកម្ពស់សមត្ថភាពវិស័យសុខភាពសត្វក្នុងការទប់ស្កាត់ ការត្រៀមបង្ការ និងការឆ្លើយតបប្រកបដោយប្រសិទ្ធភាពខ្ពស់ចំពោះជំងឺរាតត្បាត៕
ដោយ៖ម៉ាដេប៉ូ
