មេបញ្ជាការ៖ កងទ័ពចាំបាច់ត្រូវហ្វឹកហ្វឺន លត់ដំ បំប៉នជំនាញ ទាំង តួនាទីភារកិច្ច វិន័យ និងសេចក្ដីថ្លៃថ្នូរ
កំពង់ធំ៖ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានលើកឡើងថា កងទ័ពប្រៀបបានទៅនឹងសរសៃឈាមរបស់រាជរដ្ឋាភិបាល។ត្រូវត្រៀមខ្លួនជានិច្ចក្នុងការទទួលភារកិច្ច អនុវត្តតាមបទបញ្ជាពីថ្នាក់លើ ដូច្នេះត្រូវមានសុខភាពល្អ និងមានគុណភាព ទាំងចំណេះដឹង តួនាទីភារកិច្ច គោរពវិន័យ និងសេចក្ដីថ្លៃថ្នូររបស់កងយោធពលខេមរភូមិន្ទ ។ឧត្តមសេនីយ៍ទោ លើកឡើងដូច្នេះក្នុងឱកាសចុះសួរសុខទុក្ខ សិក្ខាកាមនៃបញ្ជាការដ្ឋានតំបន់ប្រតិបត្តិការសឹករងកំពង់ធំក្នុងទីលានហ្វឹកហ្វឺនហាត់ ទីបញ្ជាការកងវរសេនាតូចលេខ១ ស្ថិតនៅភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ នៅថ្ងៃទី១៦ ខែសីហា ឆ្នាំ២០២៤។
លោកវរសេនីយ៍ទោ ថនស៊ី សក្តា មេបញ្ជាការកងវរសេនាតូចលេខ១ និងជាអនុប្រធានអចិន្ត្រៃយ៍គណៈកម្មការគ្រប់គ្រងវគ្គហ្វឹកហ្វឺន បានបញ្ជាក់ថា នេះគឺជាការហ្វឹកហ្វឺនរៀនសូត្រពង្រឹងនាយទាហាន នាយទាហានរង និងពលទាហានប្រចាំឆ្នាំ២០២៤ រយៈពេលមួយខែ។ វគ្គនេះ មានប្រាក់ឧបត្ថម្ភបំប៉នហ្វឹកហ្វឺនរបស់សម្តេចតេជោ ហ៊ុន សែន និងការជួយឧបត្ថម្ភម្ហូបអាហារបន្ថែមពីតាមបណ្តាកងឯកភាពនៅផ្នែកសឹករងក្រុងស្រុកទាំងប្រាំបួន។
ឧត្តមសេនីយ៍ទោ សោម ស៊ុន ដល់សិក្ខាកាមទាំងអស់ត្រូវស្តាប់គ្រូយោធាចារ្យបង្រៀន និងរៀនសូត្រតាមផែនការដែលថ្នាក់លើបានប្រគល់ជូន ។ទី១-មានស្មារតីទទួលខុសត្រូវឱ្យទទួលបានលទ្ធផលល្អ, ទី២-ត្រូវត្រៀមបម្រុងកម្មវិធីហ្វឹកហ្វឺនយុទ្ធដំណើរទ័ពមុនពេលកម្មវិធីបិទហ្វឹកហ្វឺន មានចម្ងាយផ្លូវពី១៥ទៅ២០គីឡូម៉ែត្រ នៅក្នុងតំបន់ព្រៃឡង់ , ទី៣-យោធិនគ្រប់រូប ត្រូវតែស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ការពារឱ្យបានរាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោត ។
ក្នុងឱកាសនេះឧត្តមសេនីយ៍ទោ សោម ស៊ុន បាននាំយកអង្ករ១.៣០០គីឡូក្រាម និងត្រីខកំប៉ុង៤កេស ជាការឧបត្ថម្ភរបស់ឧត្តមសេនីយ៍ទោ ស៊ិន ស៊ីណាត នាយកដ្ឋានផ្គត់ផ្គង់របស់ក្រសួងការពារជាតិ ប្រចាំទិសយោធភូមិភាគទី៤ និងគ្រឿងឧបភោគបរិភោគមួយចំនួនទៀតរបស់បញ្ជាការដ្ឋានតំបន់ប្រតិបត្តិការសឹករងកំពង់ធំឧបត្ថម្ភដល់វគ្គហ្វឹកហ្វឹននេះ ៕
ដោយ៖ ប៊ុន រដ្ឋា