ហាណូយ៖ កាសែតវៀតណាម VNexpress បានចេញផ្សាយ កាលពីថ្ងៃពុធថា នគរបាលវៀតណាមទាំងអស់នឹងមិនត្រូវបានអនុញ្ញាតឲ្យផឹកស្រាស្រវឹង ទោះបីក្នុងកាលៈទេសៈណា ក៏ដោយ។ ក្រៅពីនេះ ក៏មានបំរាមមិនឲ្យនគរបាលជក់បារី និងបំរាមករណីផ្សេងៗទៀត ផងដែរ នេះបើតាមសេចក្តីព្រាងសារាចរណែនាំស្តីពីក្រមសីលធម៌របស់ប៉ូលីស ថ្មីមួយ ដែលចងក្រងដោយនាយកដ្ឋានកិច្ចការបក្ស និងនយោបាយ នៃក្រសួងសន្តិសុខសាធារណៈ។

ប្រភពបានឲ្យដឹងថា សេចក្តីព្រាងនេះ មានចែងពីការដាក់កំហិតមន្រ្តីនគរបាល មិនឲ្យទទួលទានគ្រឿងស្រវឹង ទាំងមុន ឬ អំឡុងពេលម៉ោងធ្វើការ រួមទាំង ពេលសម្រាកផងដែរ គ្រប់ទីកន្លែង ទាំងអស់។ ក្រសួងសន្តិសុខសាធារណៈបានអះអាងថា បច្ចុប្បន្ន សេចក្តីព្រាងនេះ កំពុងស្វែងរកមតិគាំទ្រ ជាសាធារណៈ មុនពេលអាចអនុវត្តបាន។

ក្រសួងបានបញ្ជាក់ថា វិធានការទាំងនេះ មានគោលបំណង រក្សាមុខមាត់វិជ្ជាជីវៈ របស់មន្ត្រីនគរបាល។ បើតាមខ្លឹមសារនៃសេចក្តីព្រាងសារាចរណែនាំ ក៏បានចែងដែរថា មន្ត្រីនគរបាលនឹងមិនត្រូវលាបពណ៌សក់ ក្រៅតែពីពណ៌ខ្មៅ ,ហាមបណ្តុះក្រចកដៃ ឬ ក្រចកជើង មិនឲ្យវែងពេក ឬ ត្រូវចាក់ទម្លុះលើដងខ្លួន រួមទាំង ការចោះរន្ធច្រចៀក ប៉ុន្តែ ការចោះក្រវិលនេះ លើកលែង សម្រាប់នគរបាល ជាស្ត្រី។ ក្រៅពីនេះ ក៏រួមបញ្ចូលផងដែរ នូវការហាមឃាត់ទាំងស្រុង លើការលេងល្បែងស៊ីសង ក្នុងទម្រង់ណា ក៏ដោយ។

ជាងនេះទៀត គោលការណ៍ថ្មីនេះ ក៏មានហាមឃាត់ការស្លៀកពាក់ឯកសណ្ឋានប៉ូលីស ពេលកំពុងញ៉ាំអាហារ ឬ ផឹកស្រា នៅភោជនីយដ្ឋាន តាមដងផ្លូវ លុះត្រាតែជាកាតព្វកិច្ចការងារ ដែលត្រូវបានកំណត់ ជាបេសកកម្ម។

ចំពោះការជក់បារី ក៏ត្រូវបានហាមប្រាមផងដែរ សម្រាប់មន្ត្រីនគរបាលពេលបំពេញកាតព្វកិច្ច នៅកន្លែងធ្វើការ, បន្ទប់សន្និសីទ, និងតំបន់ផ្សេងទៀត គឺត្រូវរឹតបន្តឹង សម្រាប់ប៉ូលីសទាំងអស់។

យ៉ាងណាមិញ កម្រិតនៃការផាកពិន័យ ចំពោះនគរបាលដែលបំពាន មិនទាន់ត្រូវបានបង្ហាញ ឲ្យដឹងនៅឡើយទេ នេះបើតាមកាសែត VNexpress ដដែល៕

ប្រភពពី VNexpress ប្រែសម្រួល៖ សារ៉ាត