ព្រឹត្តិការណ៍ Gumball 3000 នឹងបង្កើតកំណត់ត្រាពិភពលោកនៅមុខប្រាសាទអង្គវត្ត
ភ្នំពេញ៖ ដូចការគ្រោងទុកព្រឹត្តិការណ៍ត្រៀមមុនសម្រាប់ព្រឹត្តិការណ៍ហ្កាំប៊ល ៣០០០ រ៉ាល់លីនៅព្រះរាជាណាចក្រកម្ពុជា (Pre-Gumball 3000 Rally in Cambodia )ដែលដឹកនាំរៀបចំ និងសម្របសម្រួលដោយក្រសួងទេសចរណ៍សហការ ជាមួយក្រុមហ៊ុន ជីប ម៉ុង និងស្ថាប័នពាក់ព័ន្ធនានាបានប្រព្រឹត្តទៅនៅថ្ងៃទី៣១ ខែសីហា និងថ្ងៃ១ខែកញ្ញា ឆ្នាំ២០២៤ នៅខេត្តសៀមរាប និងអតីតអាកាសយានដ្ឋានអន្តរជាតិខេត្តសៀមរាប។តាមរយៈព្រឹត្តិការណ៍ហ្កាំប៊ល ៣០០ រ៉ាល់លីនៅកម្ពុជានឹងបង្កើតកំណត់ត្រាពិភពលោកហ្គីណេស “ការចូលរួមចតឡានច្រើនជាងគេនៅមុខប្រាសាទអង្គរវត្ត”។
ដោយឡែកចំពោះព្រឹត្តិការណ៍ហ្កាំប៊ល ៣០០០ រ៉ាល់លី កម្ពុជានឹងប្រារព្ធជាផ្លូវការនៅថ្ងៃទី១៥-១៧ ខែកញ្ញា ឆ្នាំ២០២៤ ខាងមុខនេះនៅរាជធានីភ្នំពេញនិងខេត្តសៀមរាប។រាល់ថវិកាដែលទទួលបានពីព្រឹត្តិការណ៍នេះនឹងត្រូវបរិច្ចាគទៅកាន់មន្ទីរពេទ្យកុមារអង្គរនៅខេត្តសៀមរាប។
នៅថ្ងៃទី១ ខែកញ្ញា នេះមានការបើកបរសាកល្បង (Drag Race) រថយន្ត Gumball 3000 ចំនួនប្រមាណ៦០ គ្រឿង និងមានអ្នកចូលរួមទស្សនាយ៉ាងច្រើនកុះករ ។កម្មវិធីបើកបរសាកល្បងនៅអតីតអាកាសយានដ្ឋានអន្តរជាតិសៀមរាប នាថ្ងៃទី១ ខែកញ្ញា មានការចូលរួមដោយផ្ទាល់ពីឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍ លោក ទៀ ស្យាម ស្ថាបនិកសមាគមវប្បធម៌រថយន្តកម្ពុជា ឧកញ៉ា លាង ពៅ (ភីធើរ) អគ្គនាយកពហុពាណិជ្ជកម្មនៃក្រុមហ៊ុន ជីប ម៉ុង គ្រុប ហើយក៏មានការសម្ដែងទេពកោសល្យបើកបររថយន្តពីសំណាក់កញ្ញា លីអូណាកំពូលនារីអ្នកប្រណាំងរថយន្តមក ពីប្រទេសម៉ាឡេស៊ីផងដែរ។
សូមជម្រាបថា ក្រសួងទេសចរណ៍កាលពីថ្ងៃទី២៨ ខែសីហា បានចេញសេចក្តីជូនដំណឹងស្តីពីការរៀបចំព្រឹត្តិការណ៍ត្រៀមមុន “Pre-Gumball 3000 Rally in Cambodia” នៅខេត្តសៀមរាបចាប់ពីថ្ងៃទី៣១ ខែសីហា ដល់ថ្ងៃទី១ ខែកញ្ញា។សេចក្តីជូនដំណឹងបានប្រាប់ទៅសមាគមទេសចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ-អន្តរជាតិ សាធារណជន និងភាគីពាក់ព័ន្ធនានាថា ក្រសួងទេសចរណ៍ សហការជាមួយ ក្រុមហ៊ុន ជីប ម៉ុង រដ្ឋបាលខេត្តសៀមរាប ក្រសួង-ស្ថាប័នពាក់ព័ន្ធ រួមជាមួយផ្នែកឯកជននឹងរៀបចំ ព្រឹត្តិការណ៍ត្រៀមមុន “Pre-Gumball 3000 Rally in Cambodia” ក្រោមប្រធានបទ “Gumball 3000 Rally in Cambodia ដើម្បីទេសចរណ៍” ដែលមានការតាំងបង្ហាញសាកល្បងពិព័រណ៍រថយន្តទំនើបប្រមាណ៨០គ្រឿង រួម ជាមួយ ម៉ូតូធំចំនួន១០០គ្រឿង និងមានការប្រគំតន្ត្រីខ្នាតតូចនៅបរិវេណសួនព្រះរាជ ដំណាក់ ថ្ងៃទី៣១ ខែសីហា និងការបើកបរសាកល្បង នៅបរិវេណព្រលានយន្តហោះចាស់ខេត្តសៀមរាប ថ្ងៃទី១ ខែកញ្ញា ។
កត់សម្គាល់ថា ចាប់តាំងពីថ្ងៃទី៣១ ខែសីហា រថយន្តប្រណីតៗជាច្រើនគ្រឿងបានមក ប្រមូលផ្តុំគ្នានៅខេត្តសៀមរាបដើម្បី ចូលរួមក្នុងកម្មវិធីផ្សេងៗត្រៀមមុនព្រឹត្តិការណ៍ Gumball 3000 Rally in Cambodia។ក្នុងនោះមានការតាំងបង្ហាញសាកល្បង នូវពិព័រណ៍រថយន្តទំនើបៗនៅបរិវេណសួនច្បារមុខព្រះរាជដំណាក់ក្រុងសៀមរាបដែលអនុញ្ញាតឱ្យប្រជាពលរដ្ឋនិងភ្ញៀវទេសចរ ចូលទស្សនា និងថតរូបទុកជាអនុស្សាវរីយ៍ដោយសេរី។
ព្រឹត្តិការណ៍ GUMBALL 3000 Rally នឹងប្រារព្ធចាប់ពីថ្ងៃទី១៥ រហូតដល់ថ្ងៃទី ១៧ ខែកញ្ញាដោយមានរថយន្តទំនើបៗរួម មាន Supercar Hypercar Sportcar ប្រមាណ ១៣០ ទៅ ១៥០ គ្រឿង មកពីបណ្ដាប្រទេសជាង ៤០ ចម្រុះដោយ ៤០ជាតិសាសន៍ផ្សេងៗគ្នាចូលរួម ។
ឯកឧត្ដម គុជ បញ្ញាសា និងឧកញ៉ា លាង ពៅ បានបញ្ជាក់ដូចគ្នាកាលពីថ្ងៃទី២៧ ខែសីហាថា នៅថ្ងៃទី១៥ ខែកញ្ញាខាងមុខ នៅរាជធានីភ្នំពេញក្បួនរថយន្តរបស់សមាជិក GUMBALL 3000 ប្រមាណ១៣០ ទៅ ១៥០គ្រឿងរួមជាមួយរថយន្ត ទំនើបៗរបស់អ្នកចូលក្នុងប្រទេសកម្ពុជាប្រមាណជាង ៣០០គ្រឿងទៀត នឹងធ្វើការចតនៅបរិវេណវិមានឯករាជ្យរហូតដល់ ជិតរង្វង់មូលសម្ដេចព្រះសង្ឃរាជ ជួន ណាត រយៈពេលជាង ១ម៉ោង ចាប់ពីម៉ោង ២រសៀល ដើម្បីឱ្យមហាជនបានទស្សនា ក៏ដូចជាផ្ដិតយករូបភាពដ៏អស្ចារ្យបំផុតក្នុងប្រវត្តិសាស្ត្រ។
អ្វីដែលកាន់តែអស្ចារ្យលើសនេះទៀតនោះ ក្បួនរថយន្ត GUMBALL 3000 នឹងធ្វើការចតនៅមុខប្រាសាទអង្គរ នៅថ្ងៃទី១៧ ខែកញ្ញា ដើម្បីបំបែកឯកគ្គទកម្មពិភពលោក ដែលនេះគឺជាលើកដំបូងក្នុងប្រវត្តិសាស្ត្រហើយ ដែលរថយន្តទំនើបៗរាប់រយគ្រឿង បានចតនៅមុខប្រាសាទអង្គរ។ តាមរយៈរូបភាពដ៏អស្ចារ្យនេះនឹងត្រូវបានផ្សព្វផ្សាយយ៉ាងទូលំទូលាយទៅកាន់ពិភពលោក ហើយនេះជាផលចំណេញដ៏ធំសម្រាប់ប្រទេសកម្ពុជា ក្នុងការផ្សព្វផ្សាយវិស័យទេសចរណ៍។
គប្បីជម្រាបជូនថា ការនាំយកនូវព្រឹត្តិការណ៍ GUMBALL 3000 មកកម្ពុជា មានគោលបំណងសំខាន់៤ គឺ ៖ ១.ការជំរុញ វិស័យទេសចរណ៍នៅកម្ពុជានិងកេរ្តិ៍ឈ្មោះរបស់ប្រទេសទៅកាន់ពិភពលោក។២.ការចូលរួមចំណែកក្នុងសប្បុរសធម៌ដ៏ធំទៅមន្ទីរពេទ្យកុមារអង្គរ ខេត្តសៀមរាប។៣.ការបើកឱកាសរវាងវិនិយោគិនឯកជនបរទេស និងនៅក្នុងស្រុកបានជួបគ្នានិង ៤. ការបង្កើតកំណត់ត្រាពិភពលោកហ្គីណេស «ការចូលរួមចតឡានច្រើនជាងគេនៅមុខប្រាសាទអង្គរវត្ត»៕
ដោយ៖មុនី
