ភ្នំពេញ៖ ក្នុងឱកាសសម្ពោធការបោះពុម្ពសៀវភៅថ្មី ដែលមានចំណងជើងថា «ធម្មជាតិក្នុងចិត្ត» និពន្ធដោយអ្នកឧកញ៉ាវេជ្ជបណ្ឌិត គួច ម៉េងលី នាថ្ងៃទី១១ ខែកញ្ញា ឆ្នាំ២០២៤ នៅបណ្ណាគារ អន្តរជាតិ សាខាទួលគោក ក្នុងមូលដ្ឋានសង្លាត់បឹងកក់ទី២ ខណ្ឌទួលគោក អ្នកឧកញ៉ាវេជ្ជបណ្ឌិត គួច ម៉េងលី អគ្គនាយកប្រតិបត្តិនៃក្រុមហ៊ុនម៉េងលីជេ អេឌ្យូខេសិន បានថ្លែងដាស់តឿនមហាជន ខិតខំពង្រឹងសន្តិភាពផ្លូវចិត្ត តាមជំនឿសាសនា ដែលខ្លួនបដិបត្តិ និងបានលើកទស្សនៈវិជ្ជាមួយថា អ្វីដែលមើលមើលឃើញ ពុំគួរជឿជាក់ឡើយ ។

អ្នកឧកញ៉ាវេជ្ជបណ្ឌិត គួច ម៉េងលី បានមានប្រសាសន៍ថា វណ្ណកម្មថ្មី សៀវភៅទី១២ «ធម្មជាតិក្នុងចិត្ត» ជាការបណ្តុះផ្នត់គំនិតឱ្យស្រឡាញ់សន្តិភាព ធម្មជាតិ និងបរិស្ថាន និងឆ្លុះបញ្ចាំងពីដំណើរអញ្ជើញរបស់អ្នកឧកញ៉ា វេជ្ជបណ្ឌិត គួច ម៉េងលី និងតំណាងពុទ្ធសាសនិកកម្ពុជា នៅឯវិមានវ៉ាទីកង់ ក្នុងរាជធានីវ៉ាទីកង់ ប្រទេសម៉ូណាកូ កាលពីដើមឆ្នាំ២០២៣ កន្លងទៅ និងទៅប្រទេសមួយចំនួនក្នុងតំបន់អឺរ៉ុប ដែលមានសារសំខាន់ៗ ហើយត្រូវបានលើកយកមកពិភាក្សាទាក់ទងនឹងសន្តិភាពដែលគួរបណ្តុះពីក្នុងចិត្ត, ការចូលរួមស្រឡាញ់ និងថែរក្សាធម្មជាតិ, ការផ្សះផ្សារបួសក្នុងធម្មជាតិ, សេរីភាពក្នុងការគោរព និងបដិបត្តិសាសនាផ្សេងៗនៅក្នុងប្រទេសកម្ពុជា, វិបត្តិមនុស្សជាតិ បង្កឡើងដោយសង្គ្រាម, វិបត្តិមនុស្សជាតិ បង្កឡើងដោយជម្លោះសាសនា, វិបត្តិបរិស្ថាន បង្កឡើងដោយមនុស្សនិងសង្គ្រាម, ភាពលោភលន់ បង្កឱ្យមានវិបត្តិរ៉ាំរ៉ៃក្នុងសង្គម, ផលវិបាកចំពោះមនុស្ស និងហេដ្ឋារចនាសម្ពន្ធសង្គមក្រោយសង្គ្រាមផុតរលត់ទៅ និងបញ្ហាវិបត្តិផ្លូវចិត្តរបស់ប្រជាជនខ្មែរនៅឯបរទេស ។ វណ្ណកម្មថ្មីនេះ មានតម្លៃសម្រាប់អ្នកអានគ្រប់វ័យ ដើម្បីបង្កើនចំណេះដឹង សិក្សាស្រាវជ្រាវ និងស្វែងយល់បន្ថែមអំពីសន្តិភាព ការគោរពប្រតិបត្តិសាសនានៅកម្ពុជា និងការបង្កើតសន្តិភាពផ្លូវចិត្តតាមជំនឿសាសនាដែលយើងគោរពផងដែរ ។

សូមជម្រាបថា អ្នកឧកញ៉ា វេជ្ជបណ្ឌិត គួច ម៉េងលី, លោកឪ គង់ វៀល បូជាចារ្យព្រះសហគមន៍កាតូលិក និងលោក សាន សុជា អតីតភិក្ខុសង្ឃដ៏ល្បី ធ្លាប់បានអញ្ជើញធ្វើដំណើរទៅកាន់ប្រទេសមួយចំនួននៅទ្វីបអឺរ៉ុប ចំនួន ៦ថ្ងៃ ចាប់ពីថ្ងៃទី១៧ ដល់ថ្ងៃទី២២ ខែមករា ឆ្នាំ២០២៣។ នេះជាដំណើរពិសេសមួយ ដែលមានឈ្មោះថា «Rome Monaaco Paris (RMP) Friendship Tour January 2023 Provisional Program» ឬហៅជាខេមរភាសាថា «ដំណើរទស្សនកិច្ចមិត្តភាពទៅកាន់ទីក្រុងរ៉ូម ម៉ូណាកូ ប៉ារីស (RMP) ខែមករា ឆ្នាំ២០២៣» ។

ពួកគាត់បានចូលគាល់ សម្ដេចប៉ាប ហ្វ្រង់ស៊ីស (Holiness Pope Francis) នៅវិមានវ៉ាទីកង់, ចូលរួមកម្មវិធីពិសេសនៅទីក្រុងម៉ូណាកូ ដែលក្នុងនោះក៏មានការចូលគាល់ព្រះអង្គម្ចាស់ អាល់ប៊ឺតទី២ នៃម៉ូណាកូ (His Serene Highness Prince Albert II of Monaco) និងបានចូលរួមជាវាគ្មិនកិត្តិយស ក្នុងសន្និសីទនៅទីក្រុងប៉ារីស ប្រទេសបារាំង លើប្រធានបទស្តីអំពី «ការកែប្រែជំនឿ នេក្ខម្មបារមី និងបរិស្ថានវិទ្យា – Conversion, Spiritual Detachment and Ecology» ។ កម្មវិធីនេះ ត្រូវបានរៀបចំដោយលោកឪ គង់ វៀល ។

បើតាមលោកឪ គង់ វៀល មូលហេតុដែលលោកអញ្ជើញលោក សាន សុជា និងអ្នកឧកញ៉ា គួច ម៉េងលី ក៏ព្រោះតែមើលឃើញថា លោកទាំងពីរជាបញ្ញវន្តខ្មែរ ពូកែនិយាយរឿងសង្គម ថែមទាំងដុសខាត់គំនិតប្រជាពលរដ្ឋ ឲ្យមានចំណេះដឹង និងសន្តិភាពផ្លូវចិត្ត ។

គួរបញ្ជាក់ថា ក្រុមហ៊ុន ម៉េងលី ជេ. គួច អេឌ្យូខេសិន ម.ក តាមរយៈគ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច បានប្រើពេលអស់ជិត ២ឆ្នាំ និងចំណាយធនធានយ៉ាងច្រើន ដើម្បីគាំទ្រដល់ដំណើរការផលិតស្នាដៃនេះឱ្យលេចចេញជារូបរាងឡើង។ ចំពោះរាល់ចំណូលពីការលក់ស្នាដៃនេះ នឹងត្រូវបរិច្ចាគចូលមូលនិធិ ម៉េងលី ជេ. គួច ដើម្បីគាំទ្រដល់សកម្មភាពជួយសង្គ្រោះប្រជាជន ដែលងាយរងគ្រោះនៅទូទាំងប្រទេសកម្ពុជា ។

ប្រសិនបើប្រិយមិត្តចង់ជ្រាបកាន់តែច្បាស់ពីខ្លឹមសារសំខាន់ៗនៅក្នុងសៀវភៅ «ធម្មជាតិក្នុងចិត្ត» អាចរកទិញស្នាដៃនេះបាននៅបណ្ណាគារ អន្តរទ្វីប គ្រប់សាខា, បណ្ណាគារ អន្តរជាតិ, បណ្ណាគារ បញ្ញវន្ត, បណ្ណាគារ គីនូគុនីយា(ក្នុងផ្សារទំនើប អ៊ីអនម៉ល សែនសុខ) ជាដើម ដែលមានតម្លៃត្រឹមតែ ៣៤ ៩០០រៀល ឬ ៨.៥ដុល្លារក្នុងមួយក្បាល ៕

អត្ថបទ៖ វណ្ណលុក
រូបផាព៖សួង ពិសិដ្ឋ