ភ្នំពេញ៖មន្រ្តីជាន់ខ្ពស់ក្រសួងព័ត៌មានបានអះអាងថា ចាប់តាំងពីថ្ងៃ​ចេញ​សេចក្តីជូនដំណឹងជាសាធារណកាលពីថ្ងៃទី២៨ ខែសីហា ឆ្នាំ២០២៤ អំពីការចែកជូនកូន​សៀវភៅ​ធម្មនុញ្ញ​វិជ្ជាជីវៈសារព័ត៌មាន​មក ក្រសួងព័ត៌មានបានបន្តទទួលសំណើសុំកូនសៀវភៅ​នេះជាច្រើន និងជាបន្តបន្ទាប់ ពីអ្នកសារព័ត៌​មាន អ្នកផលិតមាតិកា និងអ្នកធ្វើការងារ​ក្នុងវិស័យព័ត៌មាននិងសោតទស្សន៍។

ឯកឧត្តម ទេព អស្នារិទ្ធ អនុរដ្ឋលេខាធិការនិងជាអ្នកនាំពាក្យក្រសួង​ព័ត៌មាន​បានបញ្ជាក់ឱ្យដឹងតាមរយៈសារអេឡិចត្រូនិក​នៅ​រសៀល​ថ្ងៃទី២៥ ខែកញ្ញា ឆ្នាំ២០២៤នេះថា មកទល់​ពេល​នេះ​ការស្នើសុំមានចំនួន ៨,២០០ ក្បាលហើយ។

ឯកឧត្តមបន្តថា បច្ចុប្បន្នមានកូនសៀវភៅធម្មនុញ្ញវិជ្ជាជីវៈសារព័ត៌មាន​សរុបចំនួន១,២០០ ក្បាលហើយ ដែលកំពុងស្ថិតក្នុងដៃ​អ្នកប្រកប​អាជីពសារព័ត៌មាន និងត្រូវបានអ្នកសារព័ត៌មានដាក់តាមខ្លួនជាប្រចាំ ខណៈអ្នកសារព័ត៌មានផ្សេងទៀតបានប្រើប្រាស់​ធម្មនុញ្ញវិជ្ជាជីវៈ​សារព័ត៌មាន​ក្នុងទម្រង់អេឡិចត្រូនិក។ ទាំងនេះបានឆ្លុះបញ្ចាំងយ៉ាង​ច្បាស់អំពីឆន្ទៈ នៃការគោរពតួនាទីនិងករណីយ​កិច្ចក្នុងអាជីព​សារព័ត៌មាន និងការគាំទ្រយ៉ាងពេញលេញដល់ការអនុវត្តនូវធម្មនុញ្ញ​វិជ្ជាជីវៈសារព័ត៌មានពីសំណាក់តួអង្គ​ក្នុងវិស័យព័ត៌មាននិងសោត​ទស្សន៍។ ការអនុវត្តយ៉ាងពេញលេញនេះគឺដោយសារតែអ្នក​សារព័ត៌មាន អ្នកផលិតមាតិកា និងអ្នកធ្វើការងារ​ក្នុងវិស័យព័ត៌មាន​និងសោតទស្សន៍ បានយល់យ៉ាងច្បាស់អំពីអត្ថប្រយោជន៍នៃ​ធម្មនុញ្ញ​វិជ្ជាជីវៈសារព័ត៌មាន និងអំពីសារៈសំខាន់​នៃការ​ប្រតិបត្តិធម្មនុញ្ញ​វិជ្ជាជីវៈនេះក្នុងការប្រកបការងារប្រចាំថ្ងៃរបស់ពួកគេ ដើម្បីរួមចំណែក​លើកកម្ពស់គុណភាពការងារ គុណ​តម្លៃវិជ្ជាជីវៈ និងធានាប្រសិទ្ធភាពនៃ​ការផ្សព្វផ្សាយព័ត៌មានប្រកបដោយក្រមសីលធម៌និងការទទួលខុសត្រូវ។

អ្នកសារព័ត៌មាន អ្នកផលិតមាតិកា និងអ្នកធ្វើការងារក្នុងវិស័យព័ត៌មាន​និងសោតទស្សន៍ ទាំងអស់ អាចស្នើសុំកូនសៀវភៅធម្មនុញ្ញ​វិជ្ជាជីវៈសារព័ត៌មាន ដោយគ្រាន់តែបំពេញព័ត៌មានក្នុងទម្រង់ស្នើសុំ​អនឡាញ។ សម្រាប់​ការស្នើសុំទាំងអស់ ក្រសួងព័ត៌មាននឹង​រៀបចំ​ការប្រគល់ជូនក្នុងពេលឆាប់ៗនេះ។ ដូច្នេះដើម្បីទទួលបានកូនសៀវភៅ​ធម្មនុញ្ញវិជ្ជាជីវៈ​សារព័ត៌មាន សូមចូលទៅកាន់ទម្រង់​ស្នើសុំអនឡាញ​តាមរយៈQR Code ដែលអាចរកឃើញនៅក្នុងសេចក្តី​ជូនដំណឹងរបស់​ក្រសួងព័ត៌មាន និងតាមរយៈការផ្សព្វផ្សាយ​របស់ប្រព័ន្ធផ្សព្វផ្សាយ​ផ្លូវការ​រដ្ឋ​និងឯកជន។នេះបើតាមការគូសបញ្ជាក់របស់មន្រ្តីអ្នកនាំពាក្យ​ក្រសួងព័ត៌មានដដែល៕
ដោយ៖ ង៉ាន ទិត្យ