កំពត​​​​​​៖នៅវត្តត្រើយកោះ ក្រុងកំពត នាបិណ្ឌ៧កន្លងទៅនេះ ពុទ្ធ បរិស័ទ និងព្រះសង្ឃ បានថ្លែងនិងមានថេរដីកាថា ពិធីបុណ្យ​កាន់​បិណ្ឌ និងភ្ជុំបិណ្ឌឆ្នាំនេះ មានប្រជាពុទ្ធបរិស័ទជាច្រើនបានមកចូលរួម​គ្រប់កិច្ចកម្មវិធីប្រពៃណី នៃពិធីបុណ្យ មិនថា​ពេល​បោះបាយ​បិណ្ឌ ប្រគេន​ចង្ហាន់ព្រឹក ចង្ហាន់ថ្ងៃត្រង់ និងប្រគេនភេសជ្ជៈនៅពេលល្ងាច ដើម្បីសមាទានសីល និងស្តាប់ព្រះសង្ឃ​សម្តែងធម៌​ទេសនា​ជាដើម។
ទាក់ទងនឹងពិធីបុណ្យនេះដែរ ព្រះសាសនបាល ស៊ឹម ពន ព្រះវិន័យធម៌ គណខេត្ត ព្រះអនុគណក្រុងកំពត និងជាព្រះចៅអធិការវ​ត្តត្រើយកោះ មានថេរដីកាថា តាមការពិនិត្យក្នុងរយៈ៧ថ្ងៃកន្លងមកនេះ ប្រជាពុទ្ធ បរិស័ទជិតឆ្ងាយបានមក បំពេញកុសលផលបុណ្យ​នៅវត្តត្រើយកោះ ច្រើន ដូចឆ្នាំមុនៗដែរ។
ព្រះសាសនបាល ស៊ឹម ពន មានថេរដីកាថា ការចូលរួមក្នុងពិធី បុណ្យ កាន់បិណ្ឌ និងភ្ជុំបិណ្ឌនេះ ទី១. ដើម្បីឧទ្ទិសមគ្គ​ផលកុសល​បុណ្យ ដល់បុព្វការីជនដែលបានចែកឋានរំលាយក្ខន្ធទៅហើយ ,ទី២ ដើម្បី បំពេញមគ្គផលកុសលបុណ្យសម្រាប់ខ្លួនឯង តាមរយៈ​ការផ្គត់ផ្គង់់​ចង្ហាន់ដល់សង្ឃ និងចម្រើនចាគៈ , ទី៣.ដើម្បីថែរក្សាទំនៀម​ទម្លាប់​ប្រពៃណីសាសនាកុំឲ្យបាត់បង់។ដើម្បីថែរក្សាទម្រង់នៃ​​ទំនៀម​ទម្លាប់ប្រពៃណីសាសនាឱ្យបានល្អ  ព្រះចៅអធិការ​អំពាវនាវ​ដល់ក្មេងៗជំនាន់ក្រោយ ខិតខំថែរក្សា​ប្រពៃណីបុណ្យនេះឱ្យបានល្អ ។ពិសេសត្រូវចេះស្លៀកពាក់ និងចេះរបៀបប្រណិប័តន៍ឱ្យបានសមរម្យ (សំពះមនុស្សចាស់ មាតាបិតា ជូនតា ថ្វាយបង្គំព្រះសង្ឃ និងព្រះ​ជាដើម )៕
ដោយ៖ សិលា សារិន