រតនគិរី៖សាខាធនាគារជាតិនៃកម្ពុជា ខេត្តរតនគិរី រួមជាមួយគ្រឹះស្ថាន​ធនាគារ និងហិរញ្ញវត្ថុក្នុងខេត្តរតនគិរីចំនួន១២គ្រឹះស្ថាន បានរៀបចំ​យុទ្ធនាការ​ប្តូរក្រដាសប្រាក់រៀលចាស់ ទក់ រហែក ជូនសាធារណជន ដោយមិនគិតកម្រៃសេវា និងត្រូវផ្ទេរចូលតាមរយៈ​គណនី​បាគង និង​គណនីធនាគារដែលជាសមាជិកបាគង។កម្មវិធីនេះបាន​ប្រារព្ធនៅ​សួនច្បារសម្តេចតេជោ ស្រុកកូនមុំនៅថ្ងៃទី២៥ខែកញ្ញា ឆ្នាំ២០២៤។

កម្មវិធីយុទ្ធនាការប្តូរក្រដាសប្រាក់រៀលចាស់ ទក់ រហែកនេះ ក្នុងគោល​បំណង ទី១- ដើម្បីលើកកម្ពស់ការប្រើប្រាស់ប្រាក់រៀល ធ្វើឱ្យ សាធារណ​ជន ឬុយុវជន ជំនាន់ក្រោយ​ ស្រលាញ់ ពេញចិត្ត ប្រាក់រៀល យើងធ្វើការផ្សព្វផ្សាយតាមរយៈរៀបចំយុទ្ធនាការ​ស្រលាញ់​ប្រាក់រៀល ប្តូរក្រដាសប្រាក់រៀលចាស់ ទក់ រហែក ដោយជំនួសមកវិញនូវក្រដាស​ប្រាក់រៀលថ្មី ការប្រើប្រាក់រៀល ដើម្បីលើកតម្កើង​មោទកជាតិ។ ទី២- ជំរុញការប្រើប្រាស់ KHQR ប្រព័ន្ធទូទាត់បាគង លើកកម្ពស់ការទូទាត់​ឌីជីថល និងជំរុញបរិញ្ញាបត្រហិរញ្ញវត្ថុ ក្នុងប្រព័ន្ធប្រតិបត្តិការធនាគារ​ឱ្យកាន់តែ ទូលំទូលាយ​ និងទី៣ – ដើម្បីបង្កើតគណនីបាគង និង​គណនី​ធនាគារជូនសាធារណ​ជន​ដោយមិនគិតកម្រៃសេវា នៅតាមស្តង់​គ្រឹះស្ថានធនាគារ និងហិរញ្ញវត្ថុ។

សូមជម្រាបថា ប្រព័ន្ធបាគង បានដាក់ឱប្រើប្រាស់ជាផ្លូវការ កាលពី​ថ្ងៃទី២៨ ខែតុលា ឆ្នាំ២០២០ ដោយធនាគារជាតិ​នៃកម្ពុជា។​ ប្រព័ន្ធបាគង KHQR បានធ្វើឱការទូទាត់ តាមប្រព័ន្ធអេឡិចត្រូនិក ដើម្បីផ្តល់លទ្ធភាពដល់សាធារណជន ធ្វើប្រតិបត្តិការឆ្លងគ្រឹះ​ស្ថានបានយ៉ាងងាយស្រួល រហ័សទាន់ចិត្ត និងមិនគិតកម្រែសេវា។ គិតមកដល់សព្វថ្ងៃនេះសមាជិកបាគងមានចំនួន៧៣ និងកាលពី​ថ្ងៃទី១៩ ខែសីហា ឆ្នាំ២០២៤ ធនាគារជាតិនៃកម្ពុជា បានសម្ពោធ​ដាក់ឱ្យដំណើរការបឋម កម្មវីធីទូទាត់បាគងទេសចរ (Bakong Tourists App) ដើម្បីរួមចំណែកលើកកម្ពស់វិស័យទេសចរកម្ពុជា តាមរយៈការ ផ្តល់ជាមធ្យោបាយទូទាត់តាមអេឡិច​ត្រូនិក ដែលអាចឱ្យទេសចរអន្តរជាតិធ្វើប្រតិបត្តិការទូទាត់ទំនិញ និងសេវាប្រកបដោយសុវត្ថិភាព និងភាពងាយស្រួល ព្រមទាំង​ទទួលបានបទពិសោធន៍ថ្មីនៃការទូទាត់ឌីជីថលនៅកម្ពុជា៕
ដោយ៖ គតិ យុត្ត