កំពត៖មានប្រសាសន៍នៅក្នុងវគ្គបណ្ដុះបណ្ដាលគ្រូបង្គោលស្ដីពី​ការ​អនុវត្តកម្មវិធីអាហារូបករណ៍សិស្ស ក្រីក្រនៅបឋមសិក្សា និងមធ្យម​សិក្សាចំណេះទូទៅនៃកម្មវិធីជាតិជំនួយសង្គមក្នុងកញ្ចប់គ្រួសារ កាលពីថ្ងៃទី២៥ខែកញ្ញា ឆ្នាំ២០២៤ នៅមន្ទីរសង្គមកិច្ច អតីតយុទ្ធជន​និងយុវនីតិសម្បទាខេត្តកំពត  ឯកឧត្តម ស៊ឹម សុធន ប្រតិភូរាជរដ្ឋា​ភិបាលកម្ពុជា ទទួលបន្ទុកជាអគ្គនាយក​មូលនិធិ​ជាតិជំនួយសង្គម នៃក្រសួងសង្គមកិច្ចអតីតយុទ្ធជន និងយុវនីតិសម្បទាបានបញ្ជាក់ថា កម្មវិធីជាតិជំនួយសង្គមក្នុងកញ្ចប់គ្រួសារ គឺជាកម្មវិធីគោលនយោបាយ​អាទិភាពរបស់រាជរដ្ឋាភិបាល ក្នុងគោលបំណងបង្កើត​ប្រព័ន្ធគាំពារ​សង្គម ដែលមានលក្ខណៈឆ្លើយតប បានគ្រប់ជ្រុងជ្រោយទៅនឹងតម្រូវ​ការរបស់គ្រួសារក្រីក្រ និងសមាជិកដែលងាយ​រងគ្រោះ ចាប់តាំងពីពេល​ចាប់កំណើត រហូតដល់​មរណភាព ។ជួយពង្រឹងស្ថានភាពគ្រួសារ កសាងសង្គមឱ្យមានភាពធន់ និងរួម​ចំណែក​អភិវឌ្ឍសេដ្ឋកិច្ចឱ្យ​ល្អប្រសើរ។ 

ឯកឧត្តម ស៊ឹម សុធន បន្តថា រាជរដ្ឋាភិបាលអាណត្តិទី៧ ក្រោមការ​ដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញនូវគោលការណ៍ណែនាំជំរុញការអនុវត្តកម្មវិធីមូលនិធិជាតិជំនួយសង្គមក្នុងកញ្ចប់គ្រួសារ  ក្នុងគោលបំណងបង្កើតប្រព័ន្ធគាំពារ​សង្គម ដែលមានលក្ខណៈឆ្លើយតបបានគ្រប់ជ្រុងជ្រោយ ទៅនឹងតម្រូវ​ការរបស់គ្រួសារក្រីក្រ និងសមាជិកដែលមាន​ភាព​ងាយ​រងគ្រោះ ចាប់តាំងពីពេលចាប់កំណើត រហូតដល់មរណភាព និងជួយពង្រឹង​ស្ថានភាពគ្រួសារ កសាងសង្គមឱ្យមានភាពធន់ ព្រមទាំងរួមចំណែក​ដល់​ការអភិវឌ្ឍសេដ្ឋកិច្ចប្រកបដោយបរិយាបន្ន។

ឯកឧត្តម ស៊ឹម សុធន ប្រតិភូរាជរដ្ឋាភិបាលកម្ពុជាបន្តថា កម្មវិធីជាតិជំនួយសង្គមក្នុងកញ្ចប់គ្រួសារ ត្រូវបានអនុវត្តជាផ្លូវការនៅ​ខែមេសា ឆ្នាំ២០២៤ ហើយបានដំណើរការ​ចុះឈ្មោះផ្តល់​ប្រាក់ឧបត្ថម្ភគោល សម្រាប់គ្រួសារមានបណ្ណសមធម៌ និងសមាជិក​គ្រួសារដែលងាយរងគ្រោះ ដូចជាស្ត្រីមានផ្ទៃពោះ និងកុមារ​អាយុក្រោម២ឆ្នាំ ជនចាស់ជរាអាយុ ៦០ឆ្នាំឡើង ជនមានពិការភាព និងអ្នកផ្ទុកមេរោគអេដស៍ និងជំងឺអេដស៍។ មូលនិធិជាតិ​ជំនួយសង្គម បានផ្តល់ប្រាក់ឧបត្ថម្ភប្រចាំខែចំនួន៥លើកមកហើយ។ ដោយឡែក កម្មវិធីអាហារូបករណ៍សិស្សក្រីក្រ នៅបឋមសិក្សា និងមធ្យមសិក្សាចំណេះទូទៅ នឹងបញ្ចូលទៅក្នុងកម្មវិធីជាតិ​ជំនួយសង្គមក្នុងកញ្ចប់គ្រួសារ នៅដើមឆ្នាំ២០២៥ខាងមុខនេះ ក្នុងគោល​បំណង បន្តផ្តល់ការលើកទឹក ចិត្តឱ្យកុមារចុះឈ្មោះ​ចូលរៀនបានទាន់ពេលវេលា និងបន្តការសិក្សារហូតដល់ចប់​មធ្យមសិក្សា​ចំណេះទូទៅ៕
ដោយ៖ សិលា សារិន