ព្រះវិហារ៖ លោក ហូ សិទ្ធីគុណ នាយករងខុទ្ទកាល័យសម្តេច​មហាបវរ​ធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រ​កម្ពុជា​បាន​សន្យានឹងជួយអភិវឌ្ឍន៍តំបន់តាថាវ ដែលជាអតីតទីតាំងសមរភូមិក្តៅ​ពេលសម័យសង្គ្រាមឱ្យមានសក្តានុពលទាក់ទាញ ភ្ញៀវទេសចរ ដើម្បី​លើកកម្ពស់ជីវភាពប្រជាពលរដ្ឋ និងគ្រួសារកងទ័ពដែល​កំពុង​រស់​នៅទីនេះ។

ការថ្លែងបែបនេះក្នុងឱកាសដែលលោកអញ្ជើញជាតំណាងឯកឧត្តម ហូ សិទ្ធី ទេសរដ្ឋមន្ត្រីទទួកបន្ទុកនាយកខុទ្ទកាល័យ​សម្តេច​មហាបវរធិបតី បានដឹកនាំក្រុមការងារខុទ្ទកាល័យសម្តេចធិបតី ចុះជួបសំណេះសំណាល សួរសុខទុក្ខ និងនាំអំណោយជាថវិកា សម្ភារជូនដល់​នាយទាហាន នាយទាហានរង និងពលទាហាន ក្នុងអង្គភាពវរសេនាតូចលេខ៣៨៥ ឈរជើងតាមបន្ទាត់​ព្រំដែន​កម្ពុជា-ថៃ ដែលជាអង្គភាពសម្ព័ន្ធមេត្រីភាព ក្នុងឱកាសពិធីបុណ្យភ្ជុំបិណ្ឌ​ប្រពៃណីជាតិកាលពីចុងសប្ដាហ៍កន្លងទៅនេះ។

លោក ហូ សិទ្ធីគុណ បានបន្តថា ក្រោយភ្លៀងចាប់ផ្តើមរាំងស្ងួត លោកនឹង​​ដឹកនាំ ក្រុមការងារចុះមកពិភាក្សា និងសិក្សាឡើង​វិញថា​តើអ្វីដែលយើងអាចធ្វើទៅបាននៅទីនេះ? ដើម្បីផ្សព្វផ្សាយនៅតំបន់នេះ​ឱ្យមានសក្តានុពល ក្រៅពីឈរជើងការពារ​បូរណភាព​ទឹកដី ក៏ប៉ុន្តែយើងមិនអាចចោលបានចំពោះជីវភាពរស់នៅ របស់បងប្អូន​នៅទីនេះបានទេ ក្នុងឱកាសណាមួយដែលយើងអាចផ្សារ​ភ្ជាប់​និងអភិវឌ្ឍន៍ឱ្យក្លាយជាតំបន់ប្រវត្តិសាស្ត្រទេសចរណ៍មួយ ដែលអាចនាំភ្ញៀវទេសចរមកទស្សនានិងផ្តល់ផលប្រយោជន៍ដល់​គ្រួសារកងទ័ព។លោកក៏បានជំរុញដល់ក្នុងក្រុមគ្រួសារកងទ័ព រៀនធ្វើម្ហូប កែច្នៃអ្វីដែលប្លែក។ អ្វីដែលថ្មី ហើយយកទៅផ្សព្វ​ផ្សាយ​តាមរយៈបណ្តាញសង្គមផ្សេងៗ ដើម្បីអូសទាញភ្ញៀវទេសចរ អំឡុងពេលយើងកំពុងឈរជើងការពារព្រំដែនផងដែរ។

សូមជម្រាបថា អំណោយរបស់ខុទ្ទកាល័យសម្តេចធិបតី ហ៊ុន ម៉ាណែត ដែលនាំមកផ្តល់ជូននៅពេលនេះរួមមាន ជូនអង្គភាពវរសេ​នា​តូចលេខ​៣៨៥ ថវិកា៥,០០០ដុល្លារ និងជូននាយ ពលទាហាននូវថវិកា ថ្នាំពេទ្យ ទឹកក្រូច ទឹកបរិសុទ្ធ មី ទឹកត្រី និង​សម្លៀកបំពាក់សម្រាប់​ចែកជូនគ្រួសារកងទ័ព៕
ដោយ៖ សួន លីណា