(ភ្នំពេញ)៖ សម្តេចតេជោ ហ៊ុន សែន សូមឱ្យសមត្ថកិច្ច នាំខ្លួន លី សាម៉េត បញ្ជូនទៅ​តុលា​ការ កាត់ទោសតាមច្បាប់ ។ នេះបើតាមការបញ្ជាក់លើបណ្ដាញសង្គម facebook ផ្លូវការនារសៀលថ្ងៃទី០៤ ខែវិច្ឆិកា ឆ្នាំ២០២៤ ។

សម្ដេចតេជោ ហ៊ុន សែន បានសរសេរបញ្ជាក់លើបណ្ដាញសង្គមដូច្នេះថា ខ្ញុំសូម​បញ្ជាក់​ជូនថា មិនមែនដោយសារតែវីដេអូសារភាពកំហុស និងសូមទោសមួយនេះ លី សាម៉េត ត្រូវបានរួចខ្លួននោះឡើយ។

ជំនួយការខ្ញុំម្នាក់ឈ្មោះ ដួង តារា ត្រូវបានឃាត់ខ្លួនរង់ចាំការកាត់ទោស ដោយសារ​ជាប់ពាក់ពន្ធ័ឆបោកជាមួយ លី សាម៉េត នេះ។

ពេលនេះ លី សាម៉េត ក្រោយពីរត់គេចខ្លួនបានបង្ហាញខ្លួនហើយ សូមសមត្ថកិច្ច​ដែល​ជានគរបាល ឬកងរាជអាវុធហត្ថ ទៅនាំខ្លួន លី សាម៉េត បញ្ជូនទៅតុលាការ​ដើម្បីកាត់ទោសតាមច្បាប់។

លី សាម៉េត បានសុំពេលព្យាបាលខ្លួននៅផ្ទះមុនពេលចូលខ្លួនឱ្យតុលាការកាត់​ទោស​។ មិនអាចធ្វើបែបនេះបានឡើយ នគរបាលយុត្តិធម៌ត្រូវតែនាំខ្លួន លី សាម៉េត បញ្ជូន​ទៅ​តុលាការតាមនីតិវិធី។

ខ្ញុំសង្ឃឹមថា សមត្ថកិច្ចមិនបន្តឱ្យ លី សាម៉េត បានស្ថិតនៅក្រៅសំណាញ់ច្បាប់​ទៀត​ទេ ៕

ដោយ ៖ វណ្ណលុក